कलस्सीइ च्वंगु मण्डलीयात
पावलं च्वःगु पौ
पावलं च्वःगु पौ
म्हसीका
थ्व पौ पावलं एफिससं पुर्बय् लाःगु एशियाया कलस्सी धाःगु शहरय् च्वंगु मण्डलीयात च्वःगु खः। थ्व मण्डलीयात पावल थःम्हं हे नीस्वनाथकूगु मखु, अय्सां पावलं भाला कयातःगु मण्डलीत मध्ये थ्व नं छगू खः। वं थःनाप ज्या याइपिं विश्वासीतय्त एफिससं अन छ्वल। अन च्वंगु मण्डलीइ फताहा गुरूतय्सं दुहां वयाः परमेश्वरयात म्हसीकेत व धात्थेंयागु मुक्ति कायेत मनूतय्सं स्वर्गदूततय्त पुजा याये माः धकाः धयाजुल धयागु खँ पावलं न्यनातःगु खः। उलि जक मखु व फताहा गुरूतय्सं म्हय् चिं तये हे माः, अले नसा व मेमेगु खँय् नं व्यवस्थाय् धयातःथें याये माः धकाः नं धयाजुल।
पावलं थ्व पौ अज्याःपिं फताहा गुरूतय्गु विरोध यायेत हे च्वःगु खः। येशू ख्रीष्टया पाखें जक हे मुक्ति दइ, मेमेगु धार्मिक विश्वास व थितिकुतिं झीत ख्रीष्टपाखें अलग याइ धयागु हे थ्व पौया मूखँ खः। गथे ख्रीष्टपाखें परमेश्वरं फुक्क सृष्टि यानादीगु खः अथे हे ख्रीष्टपाखें हे वय्कलं फुक्कं थःलिसे मिलय् यानादी। ख्रीष्टलिसे छप्पँ जुयाः जक हे मनूतय्सं मुक्ति काये फत। पावलं पतिइ विश्वासीतय्गु चालचलन गथे जुइमाः धकाः नं बांलाक क्यनातःगु दु।
थ्व पौ कलस्सीइ ज्वनावंम्ह तुखिकस खः। वनाप फिलेमोनया दास ओनेसिमस नं वंगु दु।
धलः पौ
न्ह्यखँ ................................. १:१-८
ख्रीष्टया स्वभाव व ज्या ....... १:९–२:१९
ख्रीष्टपाखें न्हूगु जीवन ......... २:२०–४:६
क्वचाय्कूगु ........................ ४:७-१८
कलस्सी
1
पावलपाखें ज्वजलपा
1 परमेश्वरं हे ख्रीष्ट येशूया प्रेरित यानातःम्ह जि पावल व किजा तिमोथीपाखें 2 कलस्सी च्वंपिं ख्रीष्टयात विश्वास याना च्वंपिं परमेश्वरया मनूत फुक्कसितं ज्वजलपा!
झी परमेश्वर बाःया दया माया व शान्ति छिमिके दयेमा।
सुभाय् व प्रार्थना
3 जिमिसं छिमिगु निंतिं प्रार्थना यायेबलय् झी प्रभु येशू ख्रीष्टया बाः परमेश्वरयात न्ह्याबलें सुभाय् बियाच्वनागु दु। 4 छाय्धाःसा छिमिसं येशू ख्रीष्टयात विश्वास यानाच्वंगु व परमेश्वरया मनूतय्त दया माया यानाच्वंगु खँ जिमिसं न्यना तयागु दु। 5 छिमिगु निंतिं स्वर्गय् तयादीगु आशाया निंतिं हे विश्वास व माया यानागु खः। अले सत्यगु वचन व भिंगु खँ न्यंकः वयाबलय् छिमिसं अनन्त जीवन दइ धयागु खँय् आशा याःगु दु।
6 गथे छिमिसं सत्य वचन व परमेश्वरयागु धात्थेंयागु दया मायायात बांलाक थुइका काल, अथे हे थ्व भिंगु खँ फुक्कभनं न्यना वनाच्वंगु दु। अले थुकिं इमिगु नुगलय् बांलाक ज्या यानाच्वंगु दु।
7 थ्व हे वचन छिमिसं जिपिं थें ज्याःम्ह प्रभुया दास इपाफ्रासया पाखें सय्का काःगु दु। व विश्वास याये बहःम्ह ख्रीष्टया छम्ह दास खः।* १:७ कल ४:१२; फिले २३ 8 पवित्र आत्मां छिमित बियादीगु मायायागु खँ जिमित वं हे कंगु खः।
9 थ्व खँ न्यंसानिसें पवित्र आत्मायागु बुद्धिं छिमिसं परमेश्वरयागु इच्छा बांलाक सीके थुइके फये मा धकाः जिमिसं प्रार्थना याना वयाच्वनागु दु। 10 प्रभुयात यःकथं याना जुयाः छिमिसं वय्कःयात लय्ताय्के मा, भिंगु बांलाःगु ज्या यानाच्वने फये मा, अले परमेश्वरयात अज्ज बांलाक म्हसीकाः वने फये मा, 11 वय्कःयागु तसकं तःधंगु शक्तिं छिमित बल्लाकादी मा, अले छिमिसं न्ह्यागु खं लय्तातां सह यानाच्वने फये मा धकाः जिमिसं प्रार्थना यानाच्वनागु दु।
12 परमेश्वरयात दुनुगलंनिसें सुभाय् ब्यु, छाय्धाःसा वय्कलं थः मनूतय्त तयादीगु जःयागु राज्यय् छिमित नं दुथ्याकादीगु दु। 13 वय्कलं हे झीत शैतानयागु खिउँगु राज्यं लिगनाः थः यःम्ह काय्यागु राज्यय् हयादिल। 14 वय्कःया काय्नं हे झीत पाप क्षमा यानाः छुत्कारा बियादिल।* १:१४ एफि १:७
दकलय् तःधंम्ह ख्रीष्ट
15 येशू ख्रीष्ट हे खने मदुम्ह परमेश्वरयागु
खने दुगु रूप खः।
वय्कः थ्व संसार हे सृष्टि
मयाःनिबलय्निसें दुम्ह खः।
16 छाय्धाःसा परमेश्वरं वय्कःया पाखें
स्वर्ग व पृथ्वीइ दुगु फुक्कं,
खने दुगु, खने मदुगु,
अले फुक्क शक्ति, राज्य व अधिकार
दय्कादीगु खः।
अले थ्व फुक्कं वय्कःया निंतिं हे
दय्कादीगु खः।
17 वय्कः सृष्टि मयाःनिबलय्निसें
दीम्ह खः।
अले फुक्क वय्कःयागु हे
लिधंसाय् च्वनाच्वंगु दु।
18 मण्डली वय्कःयागु म्ह खः,
अले वय्कः मण्डलीयागु छ्यं खः।
वय्कः हे दकलय् न्हापा दुम्ह,
अले दकलय् न्हापां
सिनाः म्वानावःम्ह खः।
वय्कःयात फुक्कसियां
प्रभु यायेत थथे यानादीगु खः।* १:१८ एफि १:२२-२३
19 वय्कःयागु थःगु फुक्क स्वभाव
ख्रीष्टयाके दुगुलिं परमेश्वर लय्तायादिल।
20 परमेश्वरं सृष्टि यानातःगु स्वर्ग
व पृथ्वीइ च्वंगु फुक्कं
वय्कःया काय्नं क्रूसय् हाय्कूगु हिं
थःलिसे मिलय् यानादिल।* १:२० एफि २:१६
21 छिपिं नं न्हापा मभिंगु ज्याखँय् जुयाः परमेश्वर नाप तापानाः वय्कःया शत्रु जुयाच्वंगु खः। 22 तर आः वय्कःया काय्नं थः हे सिनाः छिमित हाकनं वय्कः नाप मिलय् यानादीगु दु। वय्कः छिमित थःगु न्ह्यःने पवित्र, शुद्ध व दोष मदुपिं यायेत हे थथे सिनादीगु खः।
23 उकिं छिमिसं भिंगु खँयागु आशा मत्वःतुसे दुनुगलंनिसें क्वात्तुक विश्वास याना च्वँ। थ्व हे भिंगु खँ संसारय् च्वंपिं फुक्कसितं न्यंकूगु दु। थ्व ज्याय् प्रभुं जि पावलयात च्यः यानादीगु खः।
मण्डलीयागु निंतिं पावलं याःगु ज्या
24 छिमिगु निंतिं थथे दुःख सिया च्वने दुगुलिं जितः तसकं लय्ता वः। ख्रीष्टयागु म्ह मण्डलीयागु निंतिं फये मानिगु वय्कःयागु दुःख जिं थःगु म्हय् फयाः पूवंके। 25 परमेश्वरं हे जितः वय्कःयागु वचन छिमित स्यनेकने यायेत मण्डलीया च्यः यानादिल। 26 न्हापांनिसें सुनानं थुइके मफुगु थ्व गुप्ति खँयात आः ख्रीष्ट येशूया पवित्र मनूतय्त ध्वाथुइकादिल। 27 थथे व गुप्ति खँ मनूतय्त ध्वाथुइकादीगु परमेश्वरया ग्वसाः खः। अले गुप्ति खँ थ्व हे खः -- “ख्रीष्ट छिपिं यहूदीमखुपिन्के नं दी। अले परमेश्वर लिसे छिपिं नं तःधनी।”
28 उकिं जिमिसं फुक्कसितं ख्रीष्टयागु खँ न्यंका जुयागु खः। फुक्कसितं ख्रीष्टयात क्वात्तुक विश्वास याकाः परमेश्वरया न्ह्यःने यंकेत जिमिसं ख्याच्वः बिया अले स्यनेकने यानाः वयाच्वनागु दु। 29 ख्रीष्ट येशूं बियादीगु तःधंगु शक्तिं हे जिं थथे दुःख सियाः थ्व ज्या यानाच्वना।