11
1 Mz nzmu-krde lcde, vz-nqblqamu nqmq krnge mz da lc, da kc tqwaix mz nzvz-nqblq-krnge nqmq kr Kraes.
Nqmq Krgu Kx Takitrde Olvz Ngr Lrmakxtr
2 Rpiamu mz letz scmu kx dcpx mz drtwrmu nqmq krnge x da amrlx kcng tqalvztr-ngrne nimu. X rpi-kzamu kx vz-nqblq-zvzamu nqmq ngr nzangiongr mz makxtr kcng tqaprcbo bamu. X abrtzlvzx nimu mz da lcng. 3 A' navz-nqblq-kzamu da kc tqpibo bamu kx bzkq atrkatiamu drtwr kztemung kxnzrlxngiting. Mzli kc tqyrlwr-lxblr-ngrnamu mz nzangiongr, nar olvz na-akqlvzlr mz nzvz-nqblq-krde nqmq krgu mzli ka, mz nzkrka'-kato-krdr x mz nzrplzpx-krdr nrpa kx kabz Mqngrkxtr badr. Nakrlz-angidramu kx ncblo amrlx kxnzrlxngiting nzmnclzbzng mz Kraes. X olvz nzmnclzbzng mz ncblo, murde olvz kc ayrnrngr nzwzngr mz nrvr ngr blrir Adzm. X Kraes mnclzbz mz Gct. Mz nzmu-krde lcde, mz nzvz-nqblq-krde nqmq krgu mz nzangiongr, ncblo x olvz bletipxng. 4-10 X mz nzangiongr lc, trtakitrdeu ncblo nzakqlvz-krde narde, murde Gct wz-kai-ngrde ncblo mz mqngrde, murde na-amatqlr nide. Dekc ncblo kx akqlvzle narde mz nzangiongr, amanede Kraes kc tqngi nou nzlu-krde. Mz nzrwzkr Gct leplz, ncblo x olvz bletipxng. Murde Adzm trvzpxpuu mz Iv, a' Iv vzpxm mz Adzm. X Gct trwz-ngrdeu Adzm mz nzokatr-krde Iv, a' wz-ngrde Iv mz nzokatr-krde Adzm, murde olvz na-amatqlr ncblo. Dekc olvz kx trakqlvzleu narde mz nzangiongr, amatinede ncblo kxnzrlxngiting, mz nzrtulrtr-krde nzrsakrlr-krdr badr ncblo. X nzmyakr drtq olvz kxmule lc, esz' ncdr olvz kx nqngi narde nzyrlxo x olvz kx nqngi narde nzrpakingr apule ncblo. Delc, mrlz olvz nzakqlvz-krdr nardr mz nzangiongr, nangi rkx ngr nzmnclz-krbzlr mz zmatq kxtubq, murde enjrl na-abrtzlvz-kzlr nidr. 11 Kxmule-esz', a' mz nzaxvctrpe-krbzku lc mz Kxetu, olvz nzmnc-xglelr ncblo, x ncblo nzmnc-xgle-kzlr olvz. 12 Kxmule-esz' Iv vzpx-kaip mz Adzm, a' abzo mzli lc ncblo nzvzpxmqng mz olvz. Drtwr ngrde kx leplz amrlx nzrsakrlrng mz nzmnclz-krbzlr mz Gct kc tqwz-ngrde nigu.
13 Mwx elx mzli ka drtwrmu esz'ti mz nzrpi-krnge kx nar olvz na-akqlvzlr mz nzkrka'-kato-krdr x mz nzrplzpx-krdr nrpa kx kabz Mqngrkxtr badr. 14 X mz drtwrgu, trtakitrdeu ncblo nqngi nardr nzboi-krdr, murde mz nqmq krgu ngi da kx myangr drtqdr. 15 A' rpiku kx mrlz nzboikr nqngi nar olvz, murde lqngipx mz nzobq-krgu. X opxm kx Gct kabzle nqngi nardr nangi dalr nzakqlvz-krde nardr. Delc takitrde nzakqlvz-krdr nardr da kc tqwai nzpipx-krbole bamu. 16 Bzkq kxvecpx-lzbqm mz da lc, murde alvztr-ngrne nqmq lc mzli kc tqmnc-ngrbo bamu, x dzbe lrmakxtr amrlx neng Gct nzvz-nqblq-kzlr. * 11:2 Pol ycmnetr-ngrde nqmq krdr mzli lc, a' trngiu natq kx rngidrlvz-ngrmle kx navz-nqblqku mzli ka. 11:3 Mz drtwr Gct x mrkc Heven leplz amrlx nzrsakrlrng, murde wz-ngrde nidr amrlx mz mqngrde. 11:4-10 Mzli lc mz nqmq krdr ngi da kx myangr drtq olvz kx nqngi narde kxnzmusr-ngrdr lcng. Trkrlzkuu drtwr angidr ngr natq Pol mz nzrpi-krde kx, ‘murde enjrl.’ A' nzrtekqtr-krgr vz-nqblqle kzdq drtwr kxnzrkrlzng. 11:16 Drtc' amrlx kcng tzmnclzbzng mz zmatq ngr King r Rom, lrmakxtr kcng mrlcde tzvz-nqblqlr nqmq lc. A' trngiu drtwr ngrde kx navz-nqblqku mzli ka mrka mz trmctu nyzgu.
Da Kx Akipxle Kxnzrlxngiting Mz Nzmungrkxtr
17 Trabrtzlvzwxu nimu kxmu nzvz-nqblq-krmu kzdung nqmq ngr makxtr kcng tqaprcbo bamu, myapxbz mz nqmq krmu mz Nzmungrkxtr kx atrkatile kzdung kztemung. 18 Xlrx kx nimu lrmakxtr akipx-lzbqmu mz dzbedeng mzli kc tqyrlwr-lxblr-ngrnamu mz nzangiongr. X lxngitix kxpipz kx nrpa lc ngi da angidr. 19 A' krlz-kzx kx kzdung nzakipxngr lcng nzvzpxmqng mz nztu-amqngikr kzdung nimu mz da kxtubq, murde ma tqprtrpzmu mz kxnzvz-rbrng, a' nakrlzngr neke tubq mz nzobqkr Gct. 20 Kxmule-esz', a' mzli kc tqyrlwr-lxblr-ngrnamu mz nzmulvzngr Kxetu rgu, nqmq krmu atrkatile nide, mz nzakipx-lzbq-krmu. X apusr-ngrnamule trngiu Nzmungrkxtr. † Mzli lc pnz, leplz amrlx mrlc nzakipx-lzbqng mz dzbede nzling, dzbede kx nznginidr bcnyr x dzbede kx trpnzngr scdr da. Mz nqmq krdr, mzli kc leplz tzvz-ngrmlr mz ma nyz kzdq bcnyr, bcnyr lc badr kztedeng nzmung me esz' mz dakxnzng kx mrlzvxi kxkqlu. A' leplz kx trpnzngr scdr da, nzmung me kzble mz ma nyzde, x dakxnzng nadr pipz. X mrkc tzwxbu-ngrdr nzkrlzlr nzrmcngr leplz kx nzmu-zpwxng. Mz letz lc, Pol ngyangr drtwrde murde kxnzrlxngiting kx nzngi bcnyrng nzvz-nqblqlr nqmq lcpwz mz nzyrlwr-lxblrkr kxnzrlxngiting ma nyzdr mz nzangiongr x mz nzprtr-krdr mz Nzmungrkxtr.
21 Murde kxmule-esz' yrlwr-lxblramu, a' leplz amrlx trnzakilru dakxnzng nadr badr kztedrng. A' kc doa ngq-txpwzle dakxnzng nade. X mzli lc nimu kxnzngi bcnyrng nzmu-zpwxng x nzrmnq-zlwzng waen, a' leplz kx trpnzngr scdr da nzbrtaleng. 22 Bzkq aleamu da lc. A' mu-kaiamu mz ma nyzmung, x mz nibrde sc tqyrlwr-lxblr-ateamu badr kztemung kxnzrlxngiting. Murde amyatibzmu drtq leplz kcng tzbrtaleng mz nzobqszo-krmu lrmakxtr neng Gct. ?Nike napibo bamu? ?Mrlz nzglqlz-krnge nimu mz da lc? Trtingr!
23 A' nqmq kc tqkam Kxetu bange x aprcpebo bamu nide sele. Jiszs, mz nrlckxbq ngr zbq kc tqamwangr Judzs nide, kalzmle bret. 24 Awi-ngrbzle mz Gct, lopxile, x rpibzle mz ncblo nedeng kx, “Krlc ncvr nrkrdrtqnge, nzkabz bamu. Rtrngzti-zvzbzmu da lc mz nzdcpxkr drtwrmu ninge.” ✡ Asaea 53:12; Matiu 26:29; Mak 14:22-25; Luk 22:14-20 25 Mz nqmq lcpwz, mz nibr nzmulvz-krdr Nzamyangr, glqlzmle kap ngr waen, x rpibzle badr kx, “Waen lc ngi rkx ngr Nzesz'tikr Drtwr Gct Kc Ate tqyrlqbzle badr leplz mz nzyrleokr mepyr rnge. Rtrngztibzmu da lc mzli kznikeng mnq-ngrnamule, mz nzdcpx-zvzkr drtwrmu ninge.” ‡ Nzmungrkxtr ngi rkx ngr nzprtrngr mz da kxmrlzting kcng tzvzpxmqng mz Nzesz'tikr Drtwr lc Tqmrna. Krlcde seleng—nzipqpxngr alwx, nzamrlzngr nrkrdrtq mz zyagox, nzrlxngitingr kx xplr, nzesz'tikr drtwr kxnzrlxngiting, nzatubqtikr Jiszs nidr mz nzobqkr Gct, x kzdu-kzng da kxnzmulr lcng. [Jeremaea 31:31-34; Nzrlaszngr 24:8]
26 Drtwr ngrde kx, mz nzngq-krmu bret lc, x nzrmnq-krmu waen lc, navz zvz nzaelwapx-krmu nzbzkr Kraes nigu amrlx, vz vz krlzmle mzli kx yzlu-mou-ngrmle.
27 Mz nzmu-krde lcde, doa kx vz zvz nzamane-krde Kxetu mz Nzmungrkxtr, da kc tzwai kzdung nimu, atrkatilr Nzesz'tikr Drtwrdr badr Gct kc tqyrlqle mz nrkrdrtq Mrlxde mz nzyrleo-krm mepyr ngrde. 28 Dekc, na-aoti-angidr-kaingr drtwrmu nqmq krmu mz Nzmungrkxtr. X sc tqmupeamu bret x tqrmnqpeamu waen ngrdeng kc ate, murde ma tqatrkatiamu kztemung mz nqmq krmu. 29 Murde Gct sa na-ayrplapxle doa kznike prtr mz Nzmungrkxtr, a' vz-rbr murde trkrlzleu drtwr ngr nrkrdrtq Kxnzmcpx. ✡ 1 Korint 10:17 30 Dekc kxnzkqlung mz nimu tzyangrngape-ngrdr x tzyagoxpe-ngrdr. X kzdung nimu tzbzpe-ngrdr. § 11:29 Murde kxnzrlxngiting amrlx kxnzmulr esz' mz nzobq-krde, mz nzngini-krdr nrkrdrtqde. 11:30 Trngiu drtwr ngrde kx zyagox x nzbzngr amrlx nzvzpxmqng mz nzayrplapxkr Gct leplz.
31 A' naobqtr-kaiku mz nabzgu, mz nzmnclz-krbzku mz me pnz drtwr Kxnzmcpx, murde ma tqprtrku mz nzayrplapx-alokr Gct nigu. 32 A' mzli kc tqmc-ngrde kx vz-rbrku mz nqmq krgu, ayrplapxle nigu, murde natekqtrku nqmq nr drtwrgu x trpnzngr nzayrplapx-alo-krde nigu mz Hxl.
33 Mz nzmu-krde lcde, kx mzlengeng x inwengeng, mzli kc tqyrlwr-lxblr-ngrnamu mz Nzmungrkxtr lc, aodu-lzbqamu mz nivz. 34 Doa kx suti drtwrde nelzde nakrlc angidr, namu pnz kai ma nyzde, murde ma tqbatrpzle nzayrplapxkr Gct nimu mz nzvz-rbr-krmu mz Nzmungrkxtr.
Mzli kc navz-ngrmc, sa napi-zpwx-mopwo du da, mz nzayzlu-krbo nike piamu mz letz scmu.
*11:16 11:2 Pol ycmnetr-ngrde nqmq krdr mzli lc, a' trngiu natq kx rngidrlvz-ngrmle kx navz-nqblqku mzli ka. 11:3 Mz drtwr Gct x mrkc Heven leplz amrlx nzrsakrlrng, murde wz-ngrde nidr amrlx mz mqngrde. 11:4-10 Mzli lc mz nqmq krdr ngi da kx myangr drtq olvz kx nqngi narde kxnzmusr-ngrdr lcng. Trkrlzkuu drtwr angidr ngr natq Pol mz nzrpi-krde kx, ‘murde enjrl.’ A' nzrtekqtr-krgr vz-nqblqle kzdq drtwr kxnzrkrlzng. 11:16 Drtc' amrlx kcng tzmnclzbzng mz zmatq ngr King r Rom, lrmakxtr kcng mrlcde tzvz-nqblqlr nqmq lc. A' trngiu drtwr ngrde kx navz-nqblqku mzli ka mrka mz trmctu nyzgu.
†11:20 Mzli lc pnz, leplz amrlx mrlc nzakipx-lzbqng mz dzbede nzling, dzbede kx nznginidr bcnyr x dzbede kx trpnzngr scdr da. Mz nqmq krdr, mzli kc leplz tzvz-ngrmlr mz ma nyz kzdq bcnyr, bcnyr lc badr kztedeng nzmung me esz' mz dakxnzng kx mrlzvxi kxkqlu. A' leplz kx trpnzngr scdr da, nzmung me kzble mz ma nyzde, x dakxnzng nadr pipz. X mrkc tzwxbu-ngrdr nzkrlzlr nzrmcngr leplz kx nzmu-zpwxng. Mz letz lc, Pol ngyangr drtwrde murde kxnzrlxngiting kx nzngi bcnyrng nzvz-nqblqlr nqmq lcpwz mz nzyrlwr-lxblrkr kxnzrlxngiting ma nyzdr mz nzangiongr x mz nzprtr-krdr mz Nzmungrkxtr.
✡11:24 Asaea 53:12; Matiu 26:29; Mak 14:22-25; Luk 22:14-20
‡11:25 Nzmungrkxtr ngi rkx ngr nzprtrngr mz da kxmrlzting kcng tzvzpxmqng mz Nzesz'tikr Drtwr lc Tqmrna. Krlcde seleng—nzipqpxngr alwx, nzamrlzngr nrkrdrtq mz zyagox, nzrlxngitingr kx xplr, nzesz'tikr drtwr kxnzrlxngiting, nzatubqtikr Jiszs nidr mz nzobqkr Gct, x kzdu-kzng da kxnzmulr lcng. [Jeremaea 31:31-34; Nzrlaszngr 24:8]
§11:30 11:29 Murde kxnzrlxngiting amrlx kxnzmulr esz' mz nzobq-krde, mz nzngini-krdr nrkrdrtqde. 11:30 Trngiu drtwr ngrde kx zyagox x nzbzngr amrlx nzvzpxmqng mz nzayrplapxkr Gct leplz.