Nzryr-krbz Pol Kx Ayrnrngr Mz Timoti
Natq Ngr Nzaplxtqngr Mz Nzryr-krbz Pol Kx Ayrnrngr Mz Timoti
Aposol Pol yrbzle letz lc mz Timoti, x apusr-ngrde nide mrlxde. Mz kzdung nzvzpxkr Pol nzvzng badr. ✡ Aposol 16:1-3; 17:14-15; 18:5; 19:22; 20:4-5; Rom 16:21; 1 Korint 4:17; 16:10; 2 Korint 1:1, 19; Filipae 1:1; 2:19-23; Kolosia 1:1; 1 Tesalonika 1:1; 3:1, 6; 2 Tesalonika 1:1; Filimon 1:1; Hibru 13:23 Mz nzwz-krde, Timoti tu mz mzlirdr Pol badr dzbe lrmakxtr mrkc Efiszs x mz provins kc Esia, mz nzmnclz-krbzle mz zmatq ngr Pol. Kxmule-esz' trnzyrlqu nide nzngini-krde ‘kxaclve’ o ‘aposol,’ a' nzaclve-krde myaszlzle ncblo kxaclvele dzbe makxtr kc esz', murde mcpxle leplz kxnzaclvelr lrmakxtr.
Mz Aposol 28, Pol sc tqmncpxm mz presin mrkc Rom. A' mz drtwr kzdung kxnzalvztr-ngrdr mz Nzryrngrkxtr, mwx nzaopx mou drtq Pol mz presin, x sc tqvzpx mou mz nzyapwxtipx-krde Nrpakxmrlz. Murde kzdq letz kx trnzyrou mz Nzryrngrkxtr rpile kx Pol krlzbzle Spen. Yrle letz 1 Timoti mz mzlir yiz 62—63 AD mz nibr nzrmcngr mz Jiszs. Mz nibrde, mz yiz 64 AD kzdq nyr kxetu odatile kzdq nctq Rom. King Kc Etu Niro abetitr-ngrde lrmakxtr kc Rom x kapxle natq kx bzkq nzlxngiti Jiszs. Krkcng tzrlxngiting nalolvzng x nanibqng. Mz yiz 67 AD Pol nzamncpx-mop mz presin nzwrde krali. Letz ayrnrngr lc tqyrbzle mz Timoti, yrle mz mzlir nzwrde kcng li tqmncpx-ngrmle mz presin.
Mz letz kcng tqyrbz Pol mz Timoti x Taetus alvztr-ngrde kxmu nqmq kr leplz kxnzaclvelr dzbe lrmakxtr.
Mrkcng Mz Letz Lc
Timoti na-atubqtibzle kzdung nzalvztr-rbr-ngrng. [1:1-20]
Kxnamu kxnzrlxngiting nzangio-lxblr-krdr Gct. [dckrlzde 2]
Leplz kcng tztakitrdr nzaclve-krdr dzbe lrmakxtr. [dckrlzde 3]
Pol pibzle mz Timoti kxnamu nzale-krde nzwz-krde. [dckrlzde 4]
Pol alvztr-ngrde da kx nartrngztibzng mz nzvz-rbrkr lrmakxtr. [dckrlzde 5]
Pol alvztr-ngrde Timoti x lrmakxtr mz da kxkqlu. [dckrlzde 6]
1
1-2 Nim la Timoti, ninge Pol, aposol kc tqmcpx Mevalu Jiszs, mz nzvz-nqblq-krde natq Gct kc tqarlapxle nigu, ncdr Mevalu Jiszs kc tqbrti drtwrgu. Nzatwzlr-ngrdr ninge mz nzwztr-krbo badr.
Apubo bam trtem angidr mz nzrlxngiti-krgi. X krka'-ngrne kx Gct Trtegu x Kxetu rgu Mevalu Jiszs nayc mz drtwrdr nim x naokatrlr nim mz zmrlz ngrdr kxmyalz x namnc-zpwxq.
Nzalvztrngr Kx Nzvz-rbrng
3 Mzli kc tqmncbe-ngrgi mz taon Efiszs, pibo bam kx namncme elr, x ninge kc tqvzpex mz provins kc Masedonia. X mzli ka suti drtwrnge kx namncbeq elr, murde na-atubqtibzme nzalvztrkr leplz kcng tzalvztr-rbrng. 4 Pibz badr kx bzkq nzamatqlr be kc bqnc tzpokiangr x pepz kc tqyrlwrlz-ngrm drtq melrmqdrng. Da lcng tqrkatrpz nzakipx-lzbqkr leplz, a' trnzokatrlru nzwzkr Gct kc tqvzpxm mz nzrlxngitingr.
5 Timoti, suti drtwrnge kx nivz navzpxm mz nzalvztr-krgi, murde nabz leplz neging natubq, nqmq nr drtwrdr trnavz-rbru, x nzrlxngiti-krdr natu-amqngi mz nzmrlzti-lzbq-krdr. 6 Murde kzdung leplz nzesablqtipelr da lcng tqmrlz, murde naprtrng mz nzycmnengr kx trokatrleu leplz. 7 Nzrpilr nanginidr kxnzalvztr mz Lou sc Mosis, a' trtakitrdeu. Murde kxmule-esz' natqdr tubq mz drtwrdr esz'-krdr, a' trnzkrlzlru da kcng tzycmnetr-ngrdr x drtwr ngrde.
8-11 Krlzku kx Loukxtr okatrle leplz mzli kc tzvz-nqblq-ngrdr drtwr ngrde angidr. X drtwr ngr Loukxtr naesz'ting mz drtwr ngr Nrpakxmrlz kc tqaprcm Gct kc tqmyalz bange. Murde yrlq-ngrbzle Loukxtr trngiu dalr nzatubqtingr leplz kxnztubqng, a' mz nzatubqti-krde leplz kxnzvz-rbrng murde nzrpwa'-ngrdr Loukxtr x nzpxtxpx-ngrdr nzvz-nqblq-krdrle. Nidr leplz kxnzatrkatilr Gct, kxnzaleng alwx, kxnzpxtxpx-ngrdr Gct x kxnzpxtxpx-ngrdr da kxtrng amrlx. X nidr leplz kxnznibqlr trtedr x lxedr, x leplz kc-kzng, x kxnzrmwiming badr doa kx trngiu krnalzdr, x ncblo badr ncblo, x olvz badr olvz. Nidr kxnzpnang doa kx na-amwalrng, kxnzpokiang, x kxnzpokiang mz mz kxnzetung mz kot, x kxnzaleng da kx rpwa'-ngrde Nrpakxmrlz.
Nzawikr Pol Mz Nzyckqkr Drtwr Gct
12 Awibo mz Kxetu rgu Mevalu Jiszs, murde abr drtwrde ninge mz nzwztr-krbo bade, x axplrle ninge mz nzale-krnge nzwzngr lc. 13 A' mzli kc pnz pibqtix Kraes, x alex da kxkqlu kx aetq-ngrbo drtqde, x atrkati-zlwz-kzx doa nedeng. Kxmule-esz', a' Gct yckqti drtwrde ninge. Murde trkrlzwxu kx alex da kx vz-rbr, x rtrngzti-ngrbole mz nzvz-nqblq-krde trnzrlxngiti-krngeu. 14 A' zmrlz ngr Kxetu rgu sc tqmyatxlz-esz'ngr mz nzipq-krde ninge. X nzrka-krmle bange nzbrkr drtwr x nivz mz nzaxvctr-lzbq-krbo mz Mevalu Jiszs. 15 Da zpwxtx, x takitrde nzrlxngitingr mz nabz atwrnrngr kx Mevalu Jiszs vzm mz nrlc mz nzarlapx-krde kxnzaleng alwx. X ninge kx myapxbz mz alwx kcng tqale-zvzx mzli kc. 16 X Jiszs Kxnzmcpx trngyati-aniu drtwrde ninge mzli lc, kxmule-esz' myapxbo mz alwx rngeng. A' mcpxle ninge mz nzaelwapx-krde nzetukr zmrlz ngrde, mz nzarlapx-krde ninge mz alwx lcng. X nzarlapx-krde ninge lc tqaelwapx-kz-ngrde nzvqtikr drtqde nzarlapx-kz-krde leplz amrlx. Murde nalxngiti-kzlr nide x narmcti-kzlr nzlungr kxboi.
17 Mz nzngini-krde King,
Kx lu zvz, trnzmcu,
Nide txpwz Gct,
Naglqlz-zvzku,
X na-angio-zvzku nide. Eu!
Naglqlzku nide,
Na-angioku nide. Eu! * Krlc nabz #9 mz Buk Ngr Nzangiongr.
18 Mrlxnge Timoti, natqnge lcng nakabo bam nzvz-nqblqlr natq kcng tzpipx-pnzlr profet ngr lrmakxtr mz nzwzngr lc tqrtrngztipebzme. X na-aoti angidr drtwrm natq lcng, murde naxplrq mz nzota-krm mz nrlarde nyz Kxetu. 19 X nalolvz-amqngi-zvzq nzrlxngiti-krm, x nabzm nalqngi. Murde krkcng tzpxtxpx-ngrdrng nzrlxngiti-krdr yrkrpxpebz. 20 Kzdung nidr nzling drtqdr Haemznezs ncdr Aleksada. Aprcpebo nidr mz mq Setzn, murde drtwrdr naopx x nayrtqpx-lzbqng mz nzycmne-atrkati-krdr Gct.
✡^ Aposol 16:1-3; 17:14-15; 18:5; 19:22; 20:4-5; Rom 16:21; 1 Korint 4:17; 16:10; 2 Korint 1:1, 19; Filipae 1:1; 2:19-23; Kolosia 1:1; 1 Tesalonika 1:1; 3:1, 6; 2 Tesalonika 1:1; Filimon 1:1; Hibru 13:23
*1:17 Krlc nabz #9 mz Buk Ngr Nzangiongr.