युहन्ना ने लिखा हुआ तीसरा पत्र
योहान लिखेल तीसरो पोत्रो
ओलखात
तीसरो योहानान पोत्र प्रेरित योहान द्वारे मसीन जेल्मान 50-100 वोरह्यान विचीम लेखाय जायेल ईतो। योहान सोताह लेखणारान रूप माय नाह केत, पुण सोताह तो डावालो किथे 1:1 एने 2 योहान 1:1 माय बी किथे। ओहलो मानाय जाथे काय योहान योहानान गेत जो हाजाली खुबेर लिखेल ईतो एने इफिसुस माय रेतेन तीन पोत्री 1 योहान, 2 योहान, 3 योहान हेते।
योहान ज्यी पोत्रीह गयुस नावान एक माणहाह लिखेल ईतो। योहान गयुसाह एक दोस्तीन रूप माय किथे एने बुरहो केरनारा बायह्याख ने पावणाह उठाड़ने बोहाड़ने जुवे, जा फिरतेह निसाण आप्यो।
रूपरेखा
1. योहान तान पोत्रान ओलखात आप्यो। 1:1
2. ओवतो तो गयुसाह खुस किरेह एने बायह्याख ने पावणाय केरने जुवे केरीन निसाण आप्यो। 1:2-8
3. तान बाद तो दुय दिहरा एदमी, दियेत्रफुस एने दिमेत्रयुस ने वात केरने। 1:9-12
4. तो सेवली वार तान पोत्री लेखणेन बोंद किरेह। 1:13-14
1
1 ✡ 1:1 प्रेरितान काम 19:29; रोमीयो 16:23; 1 कुरिंथीयो 1:14योहान डायलान उगे रेन मोंगाल्ला गयुसान नाव, जाह मी खेरीच मोंग केरथु।
2 एय मारा मोंगाल्ला हाती, जिहकेरीन तु जीव माय वोड़ती केरने बाजरिनोह, तिहेस केरीन तु आखी वातु माय वोड़ती किरहे, ते हाजालो रिहे ओहली मी विन्ता केरथु। 3 काहाकाय जेवी बी बुरहो केरनार बाहख आवतेह एने तार ती खेरली गोवाय देतेह, ते मी जुलूम खुस एय जाथु, जी खेरायी माय तु खेरीच जिवेह। 4 मार सोरा खेराय माय चालतेह ज्यो होमलीन माहु ज्यी खुसी जुड़ेह, तोलो दिहरा कायताच केरीन नाह जुड़ेत।
गयुस ने बोक्ती
5 एय मारा मोंगाल्ला हाती, पारका बायाख हिऱ्यो जो काय तु किरेह, ताह तु ईमानदारी माय किरेह। 6 ता मोंडलीन ओंगाण तार मोंगान बाराम पुरावो दियेल हेते। एने जो बोगवानान माणहान केरता हाजो हे, इहकेरीन ताह तु वाटी लागाड़हे ताहार तु जुलूम हाजो किरहे। 7 काहाकाय ता यीशुन नावान केरता निकेल रेनाह, एने बिगेर बुरहो केरनार माणहा फाय रेन कायच नाह लेतेह। 8 तानकेरता ओहला माणहाह गेराम हादणे जुवे, काय आपु बी खेराय माय तान हाती बोणहु।
दियेत्रफुस एने दिमेत्रयुस
9 मी मोंडलीह थोड़ोक लिखेल ईतो, पुण दियेत्रफुस जो ता माय पुडारी बोणने हुदेह, तो मारी नाह होमलेत। 10 तानकेरता जेवी मी आवुह ते तान कामे जा तो किरेह एर केरावुह, एने आमरा बाराम खाराब खाराब वातु किथे; एने ज्या पोर ओलोस खुस नाह ईत पुण बायाख बी आहने नाह लेत, एने जा आहने लेणे होद्तेह ताह आहने केरनेन रोकेह एने मोंडलीन बाहेर काड़ देणे हुदेह।
11 एय मोंगाल्ला, खाराबान नाह पुण हाजालान गेत बोण। जो हाजो किरेह, तो बोगवाना उगे रेन हे; पुण जो खाराब काम किरेह तो बोगवानाह दिखेल नाह सोतो। 12 दिमेत्रयुसान बारा माय आखा पुरावो आपेल हे; एने आमु बी गोवाय देतेह, एने तु जाणेह काय आमरी गोवाय खेरली हे।
सेवल्यो नमस्कार
13 माहु जुलूम काय तुवाह लेखणु एतो, पुण साई एने पेन केरीन लेखणे नाह हुदीत। 14 पुण मी जेल्दीच तुवाह मीलाह ओहली मार आसा हे, तेवी आपु आमने सामने वातु केरहु।
15 तुवाह सान्ती जुड़ती रेय। न्यावाला हाती तुवाह नमस्कार केतेह। तावाला आखा जोड़ीदाराह नाव ली लेन नमस्कार किय दिज्ये।
✡1:1 1:1 प्रेरितान काम 19:29; रोमीयो 16:23; 1 कुरिंथीयो 1:14