PILIMON
Pilimon tayekelesiy teitan, tage natouwat yagan Onesim bo isawl. Mtowen gog Onesim isawl in, mo Pawl iban, ikatimlakay sinapun Yeisuw Kelis. Mtowen Onesim itam Yeisuw nakaleiwag waseg, mo iyekelesiy. Mapuna Pawl ilel Pilimon nalet va̱gan Onesim bikow, beiyum binek natovek, bisek Pilimon nalet, bivin, mo beilub nuwan. Mata ge bikavikun.
1
Nakabsilamaw
1 Yey Pawl, wa̱deil ases peinan Yeisuw Kelis angamag yey. Soug bwadag Timotiy nakases. Gunalet neiw, kukin. Kalin nuwem ya̱koum Pilimon, peinan dawotets katanok-wan.
2 Kalin nuwem-vak numet Apiy, son Alikip. Taw towen soug yey nakatawtoun Yeisuw nawotet silma̱nin.
Kalin nuwem tayekelesiys babaw simwey kutitapwa̱louls wambunatum.
3 Tamads Yowbad son daGuyaws Yeisuw Kelis bisiwyoubumiy, mo beitaw nuwamiy.
Pilimon ansinap bwein
4-5 Tut babaw aninuweim-wan, annitoug va̱gan Yowbad bilabeim. Ikalin nuwag waseg Yowbad, peinan naligen bulagan musiwa̱youb waseg daGuyaws Yeisuw, o wasigeis natayekelesiys babaw, sona mutoukum pines tasiyas sisiy daGuyaws Yeisuw.
6 Anitoug pines simwey, va̱gan kid bitakayasis amsinap bwein, mo bikakins Yeisuw nasiwa̱youb avakaein wasigeis ya̱kids.
7 Yeisuw angamag amnes singaya ibwein, peinan ya̱koum bo nukusiwyoubus tasiyas; mapuna yey ikalin nuwag, amwa̱saw peinan aligen bulagan musiwa̱youb wasigeis tayekelesiys.
Pawl initoug va̱gan Pilimon beitam waseg Onesim
8-9 Peinan musiwa̱youb avakaein, kweitan youd anitoug waseg yak. Kelis waseg bweina bakabtakeim, tage nag bayakeikay waseg yak; bayowal-wan. Yey Pawl tamwey yey, nases wa̱deil Yeisuw Kelis peinan.
10 Ayowal waseg yak silma̱nin natug Onesim. Yey ases wa̱deil bo avkek natug mtowen, peinan bo isimounid daGuyaws waseg.
11 Kweiboug nag ilabeim bwein; tut gog towen singaya bilabeid bwein.
12 Bo akayeb mtowen neiyum niwekeim, ikalin nuwag seikwan.
13 Sivinag kid bakayus natug towen, atimapum ya̱koum, peinan ililabeig wa̱deil nases. O yey nases wa̱deil peinan takawein liva̱nen Yeisuw yey.
14 Nag gog, awoum basilponay o bakayus gamag towen; awoum. Adok beivag sivinam mutouwat towen; awoum basimkineim va̱gan sinap to bwein bukuvag; tage tatoneim-wan bukutam, bo bwein.
15 Adok tut kadiyakus waseg niyamkwaneim mutouwat towen, va̱gan beiyum biwekeim mo bisesun bisigeg mugwamag bwanabwein towen.
16 E, mutouwat towen bo imlavag bwadam, peinan isimounid Yeisuw waseg. Yey-vak apwa̱kit waseg taw towen; tage ya̱koum-vak kadiloka bukupwa̱kit peinan bwadam tatoneim. Bo iyekelesiy, mo imlavag bwadam-vak daGuyaws waseg.
17 Kukin bweina bawekeim ambwabwal yey, kadiloka kutam waseg mtowen, peinan ma̱wana yey.
18-19 Kukin aveiyag nises niyageg nanoum waseg, igaw yey mo bamop. O kukin aveiyag nibakew waseg yak, igaw yey mo bamop-vak.
Yey Pawl wanamag nalel, “Igaw bamop mo bikadilok.”
Adok awoum bata̱lay waseg yak, kululuwam silma̱nin, peinan kweiboug nakatimlakeim Kelis wayagan mo nukuyekelesiy.
20 E, veiyoug yak, bweina bukwanow aygag, bukusiwyoub mtowen Onesim, daGuyaws Kelis yagan waseg, mo beitout nanoug.
21 Mulet towen nalel neiw. Akakin-wan bo bukwanow aygag, tage mo bukwatimweis musiwa̱youb bivakaein.
22 Youd kweitan-vak balivan waseg yak. Mukwanitoug waseg Yowbad, adok mo bilikugs, baw; sivinag a̱bag kwatineg wambunatum peinag yey.
23 Epapil soug yey nakases wa̱deil, Yeisuw Kelis nawotet peinan; mtowen ikalin nuwan waseg ya̱koum. Anilivan ma̱wan.
24 Ma̱wan-vak tasiyas sigwey nakawwotet, Mak, Alistak, Dimas, Luk.
25 DaGuyaws Yeisuw Kelis bisiwyoub kululuwam ya̱koum.
Yey Pawl.