1 Isa geŋ yʼa zuune Pariziyeŋ an illiga ɗuwo an rootiyo anʼde, ɗoŋ ɓaadaŋ yi-tiʼn isiyo sanalliyagi, wo yʼa-tiʼn suyyiso batem i ceeriyo ɗoŋ ki Zaŋ, 2 wo kaciŋ yo Isa geŋ ɗuwo iʼni suyyiso batem yode ye, iʼni suyyiso batem sanalliyagí. 3 Iŋkino maŋ yʼa tʼiiziga ti siiɗo Ziide, yʼa-gime ki siiɗo Galile. 4 Wo ki Galile geŋ, i dehu yʼa aɗɗe ti siiɗo Samari. 5 Maŋ yʼa iiney a Sisar, geeger ki Samari goppoŋ ti doome wede Yakup yi-ele a ulí Yusup ti kaaga* 4.5 Kun wollo adda mattup ki Zenez 33.19 wo Zozuwe 24.32.. 6 A ume geŋ i dʼede osso Yakup yʼittiba. Isa yʼiziro kee, yʼiina a ume gen̰n̰o maŋ, yʼurme yʼa-guune biza kʼosso gettiyo a peeɗo tʼize diine.

7-8 Aame Isa yi-guune biza kʼosso yi puukiyo geŋ, kane sanalliyagí an tʼiide kʼadda geeger an di deho munɗa kʼomɓo, maŋ i dʼiido erewo tʼadda kʼille eesiyo kʼahu. Erewo gette Samariten. Maŋ Isa yʼa ti tunde, yʼede: «Erewo no, mʼo kʼeeli ahu, ni-ki siɓe ɗo.» 9 Iŋkino maŋ todʼerewo ti di ruute, tʼede: «Mummino, kee Yawudusu ɗe ki tondiyo ahu soɓo a bey nuŋ Samaritenowo me?» Ki too maŋ kane Yawudiyagi an ki dehu an ki tʼokkiƴe ye ti Samariten me. 10 Isa yi di ruute, yʼede: «Aame koŋ mi yʼ suune munɗa wede Raa yʼeliyo, wo wede i kin tondiyo ahu soɓo me maŋ, a tonde ahu soɓo miŋ koŋ a bey yoŋ me, wo yʼaane yi di tʼeele ahu ɗoŋ i dʼeliyo lekkiyo.» 11 Iŋkino maŋ erewo ti di ruute, tʼede: «Wede no, kee a-kʼede dara ye, wo osso sohoro ɗe kʼa tʼoona ahu ɗoŋ i dʼeliyo lekkiyo ti too me? 12 Kunuŋ kee kʼelkiyo ki ceere mugiyey wede ti kaaga Yakup, wede ay iili osso ettiyo ko? Yode batum yʼa iiɓe, in̰n̰izí wo ti maaladí pay me.» 13 Isa yi di ruute, yʼede: «Wede tuuku yʼiiɓa ahu kʼosso en̰n̰o maŋ, ôrme yʼa yi seeɗa sey. 14 Wo wede yʼiiɓa ahu ɗoŋ nuŋ ni-tʼela maŋ, ôrme yi ki yʼ seeɗa ye baa. Ahu ɗoŋ nuŋ ni-tʼela eŋ, a yode i di tʼisa aa ersa kʼahu okko i di tʼela lekkiyo ere ki daayum† 4.14 Kun wollo adda mattup i Ezayi 12.3 wo Zeremi 2.13; 17.13..» 15 Iŋkino maŋ erewo ti di ruute, tʼede: «Wede no, ahu geŋ kʼo eeli kono ôrme yʼa ki nʼ seeɗa ye baa, wo nʼa kʼetto eesiyo ye.»

16 Maŋ Isa yi di ruute, yʼede: «Mʼodo, mi waaki kulayí, kun tʼedi.» 17 Erewo ti di ruute, tʼede: «Nuŋ daa kulayó.» Isa yi di ruute, yʼede: «Koŋ onamí ɗerec, mi rootiyo kulayí umbo me. 18 Koŋ mi ziɗɗe kuuli paat, wo wede kun lekkiyo aŋken̰n̰o eŋ kulayí ye. Mi ruute ɗerec.» 19 Iŋkino maŋ erewo ti di ruute, tʼede: «Galmeegó, nuŋ ni wolliyo maŋ, kee eŋ nebi. 20 Ti kaaga moŋgiɗagey Samariten an uttile a Raa ekki mokkolo ettiyo, wo kune Yawudiyagi kunʼde ume kʼottilso a Raa a Zeruzalem.» 21 Isa yi di ruute, yʼede: «Erewo no, mʼamɓo onamó, saŋ onniyo tʼaana, aame geŋ kun kʼottila a Meega Raa ekki mokkolo ettiyo ye, wo a Zeruzalem ye. 22 Kune Samariten kun ottilso a Raa wede kun ki yʼ suune ye, wo kaye Yawudiyagi ay ottilso a Raa wede ay yi suune, kono wede a utta ɗuwo yʼettiyo ti di Yawudiyagi. 23 Wo onniyo gette saŋ tʼaana, wo todʼtiŋ tʼiina, ɗoŋ ottilso a Meega tʼaddaŋ soo geŋ, an i-dʼottila ti toogo kʼUnde Raa wo aa Raa yi dehu, kono Meega yi dehu ɗoŋ ottilso iŋkino. 24 Raa yoŋ unde, wo ɗoŋ ottilso a yode geŋ an i-dʼottile ti toogo kʼUnde Raa wo tʼadde soo.» 25 Maŋ erewo ti di ruute, tʼede: «Nuŋ ni suune Almasi Raa yi biire saŋ yʼa etto (wede an yi waaku tʼono Girek Kiris) wo aame yʼiina maŋ, sulɗi pay yʼay tiʼn kizita.» 26 Isa yi di ruute, yʼede: «Nuŋ wede i rootiyo eŋ miŋ Almasi.»

27 Iŋkino maŋ sanalliyagi kʼIsa an aa dʼiina, wo an ziiɗa giggiraŋ aame an wulle Isa yi rootiyto tʼerewo gettiyo maŋ, wo wenɗa soo toŋ ti diinayaŋ yi di roote umbo: «Ɗe ki dehu moo me ti bey kʼerewo?» kunuŋ, «Kun rootiyto tʼerewo moo me?» me. 28 Iŋkino maŋ erewo ti dʼiili toolatú a biza kʼosso, todʼ tʼa ukke kʼadda geeger, tʼiideʼŋ tʼan di ruuto ɗuwo, tʼede: 29 «Kun okki, kun wolla wenɗa en̰n̰o kay, yʼo-tʼiɗɗipe itadó a sulɗi ɗoŋ nʼize pay me. Yode eŋ aasa Almasi Raa yi biire koo maŋ!» 30 Maŋ tʼadda geeger ɗuwo an di dihimo kʼume kʼIsa.

31 Aame erewo tʼiŋgile maŋ kane sanalliyagi an i-di ruute, anʼde: «Wede dooyisadey, kʼedi ki ooma ɗo.» 32 Wo yoŋ yʼan di ruute, yʼede: «Nuŋ omɓadó ede, wo kune kun ki ti suune ye.» 33 Maŋ kane sanalliyagi an di rootiso tuddaŋ, anʼde: «Kunuŋ omɓo wenɗa yi-tʼeeley ko?» 34 Isa yʼan di ruute, yʼede: «Omɓadó te isiyo naabo ki wede i nʼigibo yi dehu, wo nʼa-ti ɗaŋge naabo ere yʼo elo.» 35 Isa yʼan di ruute sey, yʼede: «Ɗuwo an rootiyo, anʼde: “Adda tere piɗe aasa kʼayɗu kollo.” Wo kun ollo, nuŋ nʼun di rooto, kun amɓo edaguŋ, kun wollo domɓi an iine kʼayɗu. 36 Wede ayɗu geŋ ran̰n̰adí yʼa ti tʼoone, wo in̰n̰i yʼa-tʼokume a lekke ki lekkiyo ere ki daayum, kono wede yi giira ti wede iyɗa geŋ, kane miŋ pay ulbaŋ uŋse. 37 Iŋkino maŋ ono an rootiyo geŋ ɗerec: “Wede sooʼŋ ki korso wo wede sooʼŋ kʼayɗu me.” 38 Nuŋ, nʼun igibe ayɗu kʼadda doome wede kune kun ki niibe ye, i dibire ɗoŋ doolo, wo kun aa di-guune a ran̰n̰adaŋ.»

39 Iŋkino maŋ kane Samariten ɗoŋ ti geeger gette, ɗoŋ ɓaadaŋ an di ziipe addaŋ a Isa a ono kʼerewo tʼan ruute, tʼede: «Isa yi-tʼiiɗiba ita a sulɗi ɗoŋ pay tʼize geŋ me.» 40 Geŋ iŋkino kane Samariten geŋ an iina aame kʼIsa maŋ, an di yʼ tommiyo, anʼde yʼa lekke ti kane. Maŋ yoŋ yi dʼize onniyo sire ti kane me. 41 A onniyto gette Isa yʼan diʼn duuye, wo a dooyisadí gette ɗoŋ ɓaadaŋ a jiire sey an di ziipe addaŋ a yode, a onamí ɗoŋ yʼan gizite me. 42 Iŋkino maŋ kane Samariten an i di ruute a erewo, anʼde: «Kaye ay ziipe addey a Isa a ono ɗoŋ ay illiga kuudey, a ono ɗoŋ koŋ mʼay ruute ɗaŋŋal ye. Aŋkeŋ ay zuune ki kotto yoŋ Wede kʼUttiyo ɗoŋ duniya pay.»

43 Aame Isa yi ize onniyo sire a Samari maŋ, tiŋ geŋ yʼa tʼiiziga, yʼa iŋgile ki Galile. 44 Yode batum yʼa ruute, yʼede: «Ɗerec, nebi geŋ ɗoŋ a geeger yʼa ihira ɗaŋŋal, onamí an kʼolliga ye me.» 45 Wo aame yʼiiney Galile maŋ, kaciŋ kane ɗoŋ siiɗo geŋ an di yʼ ziiɗa bey sire, kono kane toŋ maŋ an iide tarnaape Pak ki Yawudiyagi a Zeruzalem me, wo an wullo sulɗi ɗoŋ pay Isa yʼize a onniyo tarnaape geŋ me.

46 Saŋ maŋ Isa yʼa-gime ki Kana geeger ki siiɗo Galile, a ume wede ahu yʼa tiʼn gime toote kʼin̰n̰i bin̰ gen̰n̰o. A geeger Kapernayim i dʼede wede goole adda kʼakuuma, ulí tuddí eeni yʼunto. 47 Aame yʼilliga Isa ti Ziide yʼiina Galile maŋ, yʼa tʼiiziga, yʼa iide, yʼa yʼuuney, wo yi di tommiyo, yʼede: «Galmeeʼki nuŋ, kʼedi in ti ɗeege Kapernayim. Ulo nuŋ tuddí eeni yʼunto, ki di tʼeley bee.» 48 Maŋ Isa yi di ruute, yʼede: «Kune ɗuwo eŋ, aame kun ki wulla sulɗi kʼarmika ye maŋ, kun ki zaapa adduguŋ a Raa ye.» 49 Wo yo wede goole geŋ yi-koɗɗime, yi dʼeesiyo: «Galmeeʼki nuŋ, in ti ɗeege kotok, kono ulo nuŋ yʼunto.» 50 Isa yi di ruute, yʼede: «Ki-kama, ulá yʼuune bee.» Maŋ wede geŋ yʼa umɓe a ono ɗoŋ Isa yi-ruute, wo yʼa-gime. 51 Aame yoŋ a urzi geŋ, ɗoŋ naabadí an aa di yʼikkima, an i di ruute, anʼde: «Ulá yʼuune bee.» 52 Maŋ yoŋ yʼanni tunde, yʼede: «A peeɗo tʼize muno ulo yʼuune bee me?» Maŋ kane an di ruute, anʼde: «Loho a peeɗo ti dihima gollatú, ooriyo ti yʼiili me.» 53 Maŋ yo meekʼulo geŋ yʼa zuune adda kʼaddí peeɗo gettiŋ a-tʼîide a peeɗo ere loho Isa yi di ruute, yʼede: «Ki-kama, ulá yʼuune bee.» Iŋkino maŋ ti onniyo gettiyo yode ti ɗoŋ ɓoozí pay an di ziipe addaŋ a Isa. 54 Geŋ munɗa kʼarmika wede ki sirwe Isa yʼize a kamadí ti Ziide siiɗo Galile.