1 Ai tatoiosi, Paulo bona Siluano bona Timoteo, ese Tamada Dirava bona Lohiabada Iesu Keriso edia ekalesia oreana Tesalonika ai a tore henimuimu: 2 harihari-bada bona maino Tamada Dirava ena amo bona Lohiabada Iesu Keriso ena amo bavabi.

3 Varavaramai e, ai na nega idoidiai Dirava a hanamoamu umui daimui ai. Una na maoro, badina be emui abidadama e badamu, bona emui heura-heheni danu bada. 4 Taunabunai, ai ese Dirava ena ekalesia oreadia vairadiai a heaḡilaimuimu, badina be e butumui taomu daḡedaḡedia bona hisihisidia lalodiai emui haheauka bona emui abidadama o hahedinaraimu. 5 Ina na Dirava ena hanemaoro namona toana: ena basileia, bagunai o hisihisimu basileiana, lalonai do ba heḡereḡere. 6 Badina be Dirava ena kara maoromaoro binai, e hahisihisimui taudia davadia hisihisi baine henidia. 7 A umui ai ida hisi ta animu tauda laḡada baita ani, Lohiabada Iesu mai ena aneru siahudia ida guba amo baema negana ai, Iahi hururu-hururuna ai bainema. 8 Dirava asi dibadia taudia bona Lohiabada Iesu ena sivarai namo asie abia daemu taudia davadia do baine henidia. 9 Davadia binai: Lohiabada vairana amo bona ena siahu hairaina amo mase hanaihanai bae abia, 10 ena helaḡa taudia ida heimodai iabma bainema negana ai. Una dina ai abidadama taudia iboudiai bae hoa, badina be emai haroro o abia dae.

11 Taunabunai, nega idoidiai a ḡuriḡurimu umui daimui ai, Dirava ese baine haeromui ena boiboi ikamonaina ba heḡereḡere, bona ena siahu amo emui ura namodia iboudiai bona emui kamonai karadia baine haḡuḡuru 12 Bena eda Lohiabada Iesu ladana bae imodaia umui daimui ai, bona umui bae imodaimui ia dainai, iseda Dirava bona Lohiabada Iesu Keriso edia harihari-bada heḡereḡerena.