1 Lau Paulo, Dirava ena ura dainai vada e boirigu, Keriso Iesu ena aposetolo taugu ai vada e halaogu, varavarada Sostene ida, 2 raruosi Dirava ena ekalesia Korinto ai o nohomu taumui a hahenamo henimuimu. Keriso Iesu lalonai vada e hahelaḡamui, helaḡa taumui vada e gwauraimui. Umui, bona Iesu Keriso, edia Lohiabada bona eda Lohiabada, ladana e hahaneamu taudia iboudiai, 3 harihari-bada bona maino bavabi, ita Tamada Dirava ena amo bona Lohiabada Iesu Keriso ena amo.

4 Nega idoinai Dirava na hanamoamu umui daimui ai, badina be Dirava ena harihari-bada na Keriso Iesu lalonai vada e henimui. 5 Taunabunai, ḡau iboudiai ia lalonai vada e hataḡalaimui, hereva ai bona lalo-parara ai danu, 6 Keriso idibana umui lalomui ai vada e hamomokania heḡereḡerena. 7 Taunabunai umui na harihari ḡauna ta ai asio dabumu, hari iseda Lohiabada Iesu Keriso ihahedinaraina o nariamu negana ai. 8 Ia ese baine haginimui tutuka-tutuka ela bona dokona; bena Lohiabada Iesu Keriso ena mai dinana ai ta ese basine habadelaimui. 9 Dirava na momokani; bona ia ese vada e boirimui, ia Natuna Iesu Keriso ida ba hetura.

10 Varavaragu e, eda Lohiabada Iesu Keriso ladana ai na noimuimu, iboumui ai hereva tamona ba gwauraia; heiri-heiri na bogaragimui ai basie vara, a lalo tamona ai bona lalo-hadai danu tamona ai ba hedaro boubou. 11 Badina be, varavaragu e, Kloe varavarana ese sivaraimui vada e hamaorolaigu, e tomu umui na o noho heai-heaimu. 12 Readia umui ta ta o tomamu “Lau na Paulo ena”, “Lau na Apolo ena”, “Lau na Kefa ena”, “Lau na Keriso ena”. 13 Be, Keriso na vada e haheparara a? Paulo e hasatauroa umui daimui ai a? Eiava Paulo ladana ai e bapatisomui a? 14 Lau ese Dirava na hanamoamu, badina be umui ta asina bapatisoa, Krispo bona Gaio mo; 15 ta bema toma lau na sibogu ladagu ai na bapatisomui na garina. 16 Stefana ena ruma taudia danu na bapatisodia; asina diba ḡoeva ta danu na bapatisoa eiava. 17 Badina be Keriso ese e siaigu dia taunimanima ibapatisodia totona, a sivarai namo iharorolaina; bona dia aonega herevadia amo basina haroro, Keriso ena satauro na asi siahuna baine mia na garina.

18 Badina be satauro herevana na kavakava, mase dalana ai e rakamu taudia ediai; a mauri dalana ai ta rakamu tauda edai ia na Dirava ena siahu. 19 Buka Helaḡa ai e torea heḡereḡerena, eto, Aonega taudia edia aonega baina ha-orea, lalo-parara taudia edia lalo-parara danu baina dadaraia. 20 Aonega tauna be edeseni ai? Itorena tauna be edeseni ai? Ina tanobada ai hereva e hedavelaimu tauna be edeseni ai? Dirava ese tanobada ena aonega na kavakava ḡauna ai vada e halaoa, ani? 21 Badina be Dirava ena aonega binai: tanobada na aonega amo Dirava se dibava negana ai iena ura vada e hedinarai, haroro kavakavana amo e abidadama heniamu taudia na do bae mauri. 22 Taunabunai, Iuda taudia ese toa e noiamu, Helene taudia ese danu aonega e tahuamu; 23 to ai ese Keriso vada e hasatauroa na a harorolaiamu. Una na hekwakwanai ḡauna Iuda taudia ediai, bona kavakava ḡauna Helene taudia ediai; 24 to e boiridia taudia, Iuda bona Helene danu, ediai Dirava ena siahu bona ena aonega. 25 Badina be Dirava ena kavakava ese taunimanima edia aonega e hereaiamu; bona Dirava ena manoka-manoka ese taunimanuma edia goada e hereaiamu.

26 Varavaragu e, Dirava ese e boirimui na ba laloa; dia hoho mai emui aonega, tau-anina aonegana; bona dia hoho mai emui siahu, tanobada siahuna; bona lohia danu dia hoho. 27 A tanobada ena kavakava ḡaudia Dirava ese vada e abi hidi, aonega taudia ihahemaraidia; bona tanobada ena manokamanoka ḡaudia danu Dirava ese vada e abi hidi, goada ḡaudia ihahemaraidia; 28 bona tanobada ena ḡau pipikidia bona ena hedadarai ḡaudia bona lasihidia ḡaudia danu Dirava ese vada e abi hidi, ia ese miadia ḡaudia baine ha-oredia totona. 29 Taunabunai, tau ta Dirava vairanai basine heaḡi. 30 Dirava na Keriso Iesu lalonai vada e hamaurimui; bona Keriso Iesu ena amo aonega bona kara maoromaoro bona hahelaḡa bona hahemauri vada eme henida; 31 Buka Helaḡa ai e torea heḡereḡerena, eto, Heaḡi tauna ese Lohiabada baine heaḡilaia.