នាវកោរាញឞ្រាសងើយនាវតឹមរាង្លាប់មហែ ១ តីមោថេ 3

កោរាញតាផូងញឆីងមាឞ្រាសយេឆូក្រីស

1 នាវងើយអ្យាទីងាន់៖ «ឞូម៝សអីអុចជានកោរាញម៝ត់អ្វាញ់ផូងញឆីងមាឞ្រាសក្រីសយេឆូ ការអីពាង់អុចជានជេងនតីលការអីឞូយើកងាន់»។* 2 លាសនទ្រីនើមកោរាញម៝ត់អ្វាញ់ផូងញឆីងមាឞ្រាសក្រីសយេឆូ អ៝ន់ពាង់ជេងឞូនុយ្សមោគែសអោសជានទូនតីលនទើអ្យើសតាពាង់ ជេងឞូនុយ្សគែសអូរង្វាយទើម*ហ៝ៈ ឞូនុយ្សគឹតញជីងនាវអ្វែសនាវអ្យើស ឞូនុយ្សឞ្លាវម៝ត់ញជ្រាង់ឆាក់ គុងាវអ្វែស ឞ្លាវរ៝មឞូនាច់តាជៃពាង់នើម ឞ្លាវនតុមនតីឞូ‌* 3 យើនមាមោញុលនទ្រាញ់ មោតឹមល៝ក់តឹមរាលាច់ឞាល់ មោជ៝យនាវមាឞូ មោកើញអីរមាព្រាក់ ជេសរីគែសនូយ្សនហ៝ម់មលែសរាមេនហ៝ៈ។ 4 អ៝ន់ពាង់ជេងឞូនុយ្សឞ្លាវម៝ត់អូរក៝នរានាក់វ៝ល់ពាង់នើម នអ៝ប់មាអ៝សក៝នពាង់ឞ្លាវអ្យាត់នាវ ជេសរីយើកពាង់ដ៝ង់។ 5 លាសពាង់មោឞ្លាវម៝ត់អ្វាញ់រានាក់វ៝ល់ពាង់នើម មើមពាង់ឞ្លាវម៝ត់អ្វាញ់ផូងញឆីងកោរាញឞ្រាស! 6 ឞូនុយ្សមហែឆឹតញឆីង មោអោសអ៝ន់ពាង់ជានកោរាញម៝ត់អ្វាញ់ ក្លាចលាសពាង់នហីអេងឆាក់ ជេសរីជេងគែសទោយ្សតឹមឞានមាឆាតាង់ †អីកោរាញមពោលឞ្រាសអ្យើស។ 7 រាលាវឞើសនៃអ៝ន់កោរាញម៝ត់អ្វាញ់ផូងញឆីងមាឞ្រាសយេឆូក្រីស តាង់ងក៝ចនាវអ្វែសមាពាង់ឞើសផូងអីមោញឆីងមាឞ្រាសយេឆូ ដ៝ង់ ក្លាចលាសឞូមឺចរាម៝តពាង់ ជេសរីតុបតានាវនទើមឆាតាង់ ។

ឞូនុយ្សកើលជានការតាផូងញឆីងមាឞ្រាសយេឆូក្រីស

8 ជេសរីផូងឞូនុយ្សអីកើលជានការតាផូងញឆីងមាឞ្រាសយេឆូក្រីស តឹមឞានកើតនៃដ៝ង់ អ៝ន់ពាង់ជេងឞូនុយ្សគុងាវអ្វែស មឞើសងើយឆ៝ង់ មោរ៝ង់មានទ្រាញ់ មោអោសកើញមាព្រាក់។* 9 អ៝ន់ឞូនុយ្សអីនៃជេងឞូនុយ្សញអោតន៝ប់ទឹងលែៈនាវញឆីងនទើអីកោរាញឞ្រាសលែៈញហើជេសមាឞ៝ន់ អ៝ន់ពាង់ជេងឞូនុយ្សអីលែៈគឹតតានូយ្សនហ៝ម់មោអោសជានមានទើអ្យើសនទើមោអ្វែស។* 10 អ៝ន់ឞូរាល៝ងនូយ្សនហ៝ម់ពាង់ល៝រប៝ត់ លាសមោអោសឆៃគែសនាវមានទុយ្សតាពាង់ អ៝ន់ពាង់ជានការជេងឞូនុយ្សកើលជានការតាផូងញឆីងមាឞ្រាសយេឆូក្រីស ទោ។* 11 ល៝ង់អីអូរពាង់‡អ៝ន់គែសកើតនៃដ៝ង់ អ៝ន់គុងាវអ្វែស លើយងើយកែកឞូ អ៝ន់ជេងឞូនុយ្សអីគឹតញជីងនាវអ្វែសនាវអ្យើស ជេសរីតានទើពាង់ជានអ៝ន់ឆ៝ង់ទាទេ។* 12 ឞូនុយ្សអីកើលជានការ ជេងឞូនុយ្សគែសអូរង្វាយទើម§ហ៝ៈ ជេសរីឞ្លាវម៝ត់អ្វាញ់អ៝សក៝ន នអ៝ប់មារានាក់វ៝ល់ពាង់នើមដ៝ង់។* 13 លាសឞូនុយ្សកើលជានការពាង់ជានអ្វែស ឞូមរាយើកពាង់ ជេសរីពាង់ឞ្លាវមឞើសងក៝ចមា*នាវញឆីងមាឞ្រាសក្រីសយេឆូ នអ៝ប់មានូយ្សនហ៝ម់ឞាញ់ដ៝ង់។

នាវពោល អុចមឞើសល៝រ

14 គ៝ប់ញចីសឆ៝ម់បុតអ្យាញជ្វាល់អ៝ន់មៃល៝រ គ៝ប់អុចហាន់ម៝ប់មៃគើញ យើនមាអេហ៝ៈគឹត។ 15 លាសគ៝ប់ជ៝ៈត៝ត់ ឆ៝ម់បុតអ្យាមរាកើលមៃ អ៝ន់មៃគឹតម៝សនទើអ្វែសមាជានតាផូងញឆីងមាកោរាញឞ្រាស ជេងឞាល់មពោលកោរាញឞ្រាស†អីរេសងាន់។ ផូងអីនៃកោរាញឞ្រាសអ៝ន់ញជ្រាង់នាវនតុមនតីមានាវងាន់ នទ្រែលមាមឞើសងក៝ចនាវងាន់ពាង់នើម នទ្រីខាន់ពាង់ជេងន៝ប់តឹមឞានមាមែសនតូរជានអ៝ន់ជៃជេងន៝ប់។

16 មោគែសឞូនុយ្សទើយតឹមរាលាច់នទើឞើសទ៝ង់អ្យា ទុតក្វ៝ង់ងាន់នទើអីកោរាញឞ្រាសលែៈញហើអ៝ន់ឞ៝ន់តានាវញឆីង នទើអីនទ៝ប់អាល៝រនើស៖

កោរាញឞ្រាសលែៈញហើជេសអ៝ន់ឞ៝ន់គឹតនាល់ឞ្រាសក្រីស អីជេងឞូនុយ្សងាន់‌

ឞ្រាសហ្វេងអ្វែសលែៈញហើពាង់ឆ៝ង់ងាន់‌

ផូងតោងពារ់លែៈឆៃពាង់។

ឞូមឞើសងក៝ចពាង់លាមផូងអីមោទីផូងអីឆ្រាអែល ‌

ឞូញឆីងមាពាង់តាលាមនែសនតូអ្យា‌

ជេសរីកោរាញឞ្រាសនហាវពាង់គុនទ្រែលពាង់នើមតាកាលើត្រោក។*

*3:1 ៣:១-៧៖ ការ ២០:២៨-៣១; តត ១:៥-៩; ១ពេ ៥:១-៤

*3:2 ៣:២៖ មោលាស «ជេងឞូនុយ្សមោគែសល៝ម់អូរ» មោលាស «ជេងឞូនុយ្សគែសតឹមនអាប់ទូតឹទើម»។

*3:2 ៣:២៖ ១ពេ ៤:៩

†3:6 ៣:៦៖ មោលាស «ជេងតុបតានាវនទើមឆាតាង់ »។

*3:8 ៣:៨៖ ការ ៦:៣

*3:9 ៣:៩៖ ១តម ១:១៩

*3:10 ៣:១០៖ លក ១៦:១០

‡3:11 ៣:១១៖ មោលាស «ឞូអូរអីឞូនុយ្សកើលជានការតាផូងញឆីងមាឞ្រាសយេឆូក្រីស »។

*3:11 ៣:១១៖ ១តម ៥:១៣; យាក ១:២៦

§3:12 ៣:១២៖ មោលាស «ជេងឞូនុយ្សមោគែសល៝ម់អូរ» មោលាស «ជេងឞូនុយ្សគែសតឹមនអាប់ទូតឹទើម»។

*3:12 ៣:១២៖ ១តម ៣:២; តត ១:៦

*3:13 ៣:១៣៖ មោលាស «ពាង់គុន៝ប់តា»។

†3:15 ៣:១៥៖ មោលាស «ជេងញីសកោរាញឞ្រាស»។

*3:16 ៣:១៦៖ កាល ៤:៤; យហ ១:១៤; ការ ១:៩; មក ១៦:១៩