1 Niani mugamugangama Belsasa wa xaitamoxi mana Babilon, Danyel mip, saing bagu axamandi bila mibingadi hatumingania bungina kinu uxaingania. Bung mibinganoa (mari). Bila li.

2 “Yambong baguba nga Danyel ngabagu axamang tela bila mibinga. Ngabagu baing yang haringindi dimesa maxagia, dima mana sanga luwadi luwadi dilibu tega rubangrubana. 3 Baing asaxa (diang? change throughout whole chapter) sabanga luwa luwa disok sangua tega. Ding maxang taininau te, xangxana.

4 “Mugamugangama bila layon, ne (ina?) banggitongindi bila matikomkom. Ngabagu mua laing dunia banggitongindi saing diti dirang mali mana king luwa bila lipu. Baing xap lipu hatuminganoa.

5 “Baing ngabagu asaxa (diang) luwa, bagunganoa bila bea* bea—Bea bing asaxa sabanga sibuna. Kindi ditubu, buxading saing king guandi dimaxaya.. (It was crouching), saing taranga wagiang tuwa suxungunia, waing lia. Baing waxungtuang tela bala ba, ‘Umesa oxong mututuxana sanga maung!’

6 “Sup, baing ngabagu asaxa tuwa, saing bagunganoa bila lepat† lepat—Pusi sabanga tela, mauxanganoa bila 55 kilo.. Ne mang banggitonging luwa luwa duwa ubunia, saing ina toxong luwa luwa. Xap haringinga ba wasa mana lipudi.

7 “Sup, baing ngabaguyu axadi bila mibingadi disok yambong baguba, saing ngabagu asaxa luwa luwa sok baing. Ngamaxuwa sibuna mana. Haring sibuna saing axamang longgalo dimaxuwa buk mana. Waindi ain, sabanga sibundi. Hamunanggia bixuandi, xangdi masup, saing baraxinta wauyu bing ruhauti kinia. Asaxa li xan tela mana riang tuwadi, saing salamindi 10.

8 “Ngahatum mua mana salamindi, baing ngabagu salam nanung tela sok maluxuʼm teladi. Xup salaming tuwa dimuga mana. Salamga li maxandi bila lipu, saing ing suxungunoa, hasua maina.

9 “Ngabagu mua, baing ngabagu axadi li:

11 “Baing ngabaguyu namua na salam nanuna ba hasua. Ngabagu laing dung asaxua ba mati, saing dahanggalangia sangganoa yabia. 12 Ne asaxa teladi ba, dunia haringingadingdi ba duwasa mana lipudi, ning diyunga asaxadi ba duwa monga to.

13 “Ngabaguyu axadi bila mibingadi disok yambong baguba, saing ngabagu tela bagunganoa bila lipu tela ma rangua Urana, ma liwe mana mugapdi. Ma rangua Lipu Xaidap Mugauama saing daxap ma maxania. 14 Xap yaya, ralana xaung haringinga longgalo ba wa etua mana axamandi, saing bakbak longgalo, numanuma longgalo xaung xuaxua longgalo dituxu oxatanoa. Wa etua mana axamandi bungingbunginalo, haringinganoa bagula sup te, saing sanga ba dahanggalangia yonggaxinoa te.

15 “Nga Danyel, gamogua mauxana, saing axamandi ngabagu bila mibingadi hatumingagia dilibu nga ngahatum xumana manadi. 16 Ngala haxek rangua tela mana adi dili kabukabu maxania, saing ngaxusunga mana axadi li namuxidingdi.

“Binabu baxanga axadi ba namuxidingdi nanga ba, 17 ‘Asaxa sabanga luwa luwa bing xaitamoxi luwa luwa bagula duwa titia. 18 Ning Urana Eta Loam Sibuna lipuxindi bagula daxap yongga ba, saing bagula duwa etua mana bungingbunginalo.’

19 “Baing ngabo ba ngaxabia rangrang mana asaxa luwa luwa namuxinoa, ala xan tela mana riandi, axamandi dimaxuwa buk mana, waindi ain xaung king guandi bras. Hamunanggia bixuandi manadi, xangdi masup, saing baraxinta wauyu bing ruhauti kinia. 20 Xauna, ngabo ba ngaxabia rangrang mana salam 10 duwa toxonia xaung mana salam hauna sok saing xap salam tuwa yabadinga, ala ina maxandi xaung ina suxungunoa saing hasua maina. Bagu bila yanoa dali riandi. 21 Ngabagu mua baing salamga li haunggauna Urana lipuxindi saing dalidi mua, 22 laing Lipu Xaidap Mugauama ma, Urana Eta Loam Sibuna baing! Suxuya xai mana lipuxindi, saing xaidaba ma bungina daxap yonggua.

23 “Baing baxanga nanga ba, ‘Asaxa luwa luwa bing yongga luwa luwa bagula sok titia. Bagula maxang tela mana teladi. Bagula xang titi longgalo masup, ruhautidi saing hamunanggiadi. 24 Salam 10 bing xaitamoxi 10 bagula dimesa etua mana yongga li. Baing tela muli bagula mesa, maxang tela mana adi dimuga mana. Bagula tatua xaitamoxi tuwa. 25 Bagula harungia Urana Eta Loam Sibuna saing sina salaga Urana Eta Loam Sibuna lipuxindi. Bagula tuba ba xugia taungading sabungamdi xaung hanaunaungadingdi. Bagula wa etua mana Urana lipuxindi sanga mana niani tela xaung niani luwa rangua niani hataina.

26 “ ‘Ning lipu suxuyangamdi bagula dirung mari bu disuxuya, saing bagula dunia haringinganoa xaung dahanggalangia disahi masup. 27 Baing bagula Urana Eta Loam Sibuna lipuxindi daxap haringinga ba duwa etua mana axamandi. Bagula haringingading sibuna xaung bagula duwa etua mana yongga longgalo duwa titia. Urana Eta Loam Sibuna yonggaxinoa bagula wa bungingbunginalo, saing yonggadi yayam longgalo bagula disabu mana xaung disu mana haruanganoa.’

28 “Ina naga. Axamandi ngabagudi bila mibinga disup. Ne nga, Danyel, ngamaxuwa buk, sanga mana ramramogua usa. Ne ngayameng axadi ba hatumingagia.”