5
Rima Bung Ramangia
1 Niani xumana disup, baing Xaitamoxi Belsasa tongtongia taunga sabanga mana yonggaxing yanaming 1,000, saing nung wain ranguadi. 2 Belsasa nung wain mua baing tabina ba daxap xuba gol xaung silbadi dima. Xubadi li muganganoa Nebukadnesa xapdi sangua Urana Numanoa Yerusalem. Bo ba nung manadi rangua lipuxing yanamdi, hainindi xaung haining bakbak luwamdi. 3 Binabu daxap xuba goldi dima, axadi daxapdi sangua Urana Numanoa Yerusalem. Baing xaitamoxi(a) gabu lipuxing yanamdi, hainindi xaung hainging bakbak luwamdi, ding dinung manadi. 4 Dinung wain mua, baing diti babudingdi yadingdi, axadi ditongtongiadi mana gol, silba, bras, ain, xai xaung siang.
5 Hata sibuna li, lipua rimang uxundi dowa masok dibung mana rimang anggonggama wa kabukabu nagunggam rubinia xaitamoxi numania. Xatamoxi(a) bagu rima bung mua. 6 Ramramonoa usa maxuwangia. King tuxundi dilulu, saing kindi haringingadinga sup.
7 Xaitamoxi(a) wagi lipu sintukkamdi, lipu hatung suxinganamdi* kimbo Kaldiadi. Maxixinga 11 xauna., xaung lipu tuakkamdi ba dima maxania. Baing harua na Babilon lipu xabiangamgadi li ba, “Lipu gaxarea titi buninga li saing baxanga namuxinoa nanga, bagula ngasina imang xaitamoxiam sabuxana na ba sau, saing bagula ngahing gimunggimung gol waxungtuania. Bagula sok lipu yaya tuwama maluxu yonggaxigia!”
8 Ne bungina lipu xabiangamgadi ba diluxu masup ma, dingia tela sanga ba titi buningua kimbo baxanga namuxionoa na xaitamoxi(a) te. 9 Binabu Xaitamoxi Belsasa maxuwa haringing sibuna saing ramramonoa usa sibuna. Yonggaxing yanamindi xauna, dahangguyang sibuna.
10 Xaitamoxi bauna ina lungu xaitamoxi(a) gabu yanamdi dibibi, baing luxu ragu taungamia. Harua ba, “O Xaitamoxi, uwa bungingbunginalo! Ramramom usau tai. Uhatum xumanau tai. 11 Lipu tela wa yonggaximia xap hatuminga rangua uranadi duwa eta lo. Bungina tibum, dibagu daxabia lipua li hatumingang xaung xabianganoa ditubu bila uranadi. Tibum Xaitamoxi Nebukadnesa mogu ba wa yanama etua mana lipu sintukkamdi, lipu tuakkamdi, lipu hatung suxinganamdi xaung lipu tingungamdi. Tibum xaitamoxi(a) libu bila ba. 12 Lipua ba yanoa Danyel. Xaitamoxi(a) uxu ba Beltesasa. Hatuminganoa xaxaina xaung maxaxaya, baxagi mana xabianga maringina. Sanga ba baxanga mibingadi namuxidingdi, hatanga axamang hisangamdi masok xaung baxanga mauxanganadi namuxidingdi dahaxi buk. Uwagi mana ma to, baing bagula baxanga buninga namuxinoa naung.”
13 Binabu daxap Danyel ma xaitamoxi(a) maxania. Xaitamoxi(a) xusunga ba, “Ung Danyel, dingia tela tibugu xaitamoxi(a) xai ma sangua Yuda, maxuna? 14 Ngalungu ba oxop hatuminga rangua uranadi, xaung hatumingam xaung xabiangam ditubu, xaung xabiangam maring buk. 15 Menau daxap lipu xabiangamdi digabu lipu tuakkamdi dima maxagia bu dititi buninga li dibaxanga namuxinoa nanga, ne ding sanga ba te. 16 Ning ngalungu ba ung sanga ba ubaxanga mibingadi namuxidingdi xaung ubaxanga maxanganadi namuxidingdi dahaxi buk. Nabu ung sanga ba utiti buninga li saing baxanga namuxinoa nanga, bagula ngasina imang xaitamoxiam sabuxana naung ba usau, saing bagula ngata waxu gol waxumtuania. Bagula usok lipu yaya tuwama maluxu yonggaxigia.”
17 Baing Danyel haxuya na xaitamoxi(a) ba, “Heku. Yahangamdi utuxudiyu kimbo usinadi na lipu tela. Ne bagula ngatiti buningua naung, saing bagula ngabaxanga namuxionoa naung.
18 “O Xaitamoxi, Urana Eta Loam Sibuna sina yaya na tibum Nebukadnesa ba wa xaitamoxi. Sina haringinga, yaya xaung ralana na. 19 Haringia sibuna, binabu numanuma longgalo xaung bakbak longgalo xaung xuaxua longgalo dimaxuwa sibuna mana xaung dilulu. Adi xaitamoxi(a) bo ba ungdi mati, bing ungdi mati. Adi bo ba nai ba duwa, bing duwa. Adi bo ba itidi ba daxap yaya, bing itidi. Adi bo ba tatuadi, bing tatuadi. 20 Ne bungina itina saing hatuminganoa ribaina, bing Urana hitixiya sangua yabanoa wa kabukabu xaitamoxiamia, saing yang sabanga hanggalang. 21 Disuka mala sangua lipudi. Xap hatuminga asaxama saing wa rangua donki abungindi. Xang tatubang(a) bila bulmakaudi, saing langina mana hinaxaga, laing xabia ba Urana Eta Loam Sibuna wa etua mana yongga longgalo duwa titia, saing mogu lipu gaxarea muruna mana ba wa etua manadi.
22 “Belsasa, ung ba garanoa saing oxop yabanoa. Uxabia axadi li, ne utatuaung te. Tegu. 23 Ne uitiung uyamu Toxoratamona long xaiyama. Utabina ba daxap xuba Urana Numanamdi dima maxamia, saing ung gabu yonggaxim yanamindi, hainimdi xaung hainim bakbak luwamdi, ang ganung manadi. Uiti uranadi yadinggadi ditongtongia mana silba, gol, bras, ain, xai xaung siang. Ding ba sanga ba dibagu te, sanga ba dilungu te, sanga ba daxabia axamang tela te. Ne uiti Urana maxunama yanoa te, ina tuxu walingama xaung axamandi ulibudi rimania. 24 Binabu Urana sina rima ma (ba) bung ulekka ba.
25 “Ulekka bung ba bing:
mene, mene, tekel, parsin
26 “Haruanga namua bing:
Mene† Mene—namuxinoa titi. —Urana titi xaidapkadi uwa xaitamoxi, saing yonggaxima supkuba.
28 Peres§ Peres—namuxinoa hata. Haruanga Parsinrima bung ba mogu xumana bila hatadi. —Urana hata yonggaxima. Sina hataina na Midiadi xaung hataina na Pesiadi.”
29 Baing Belsasa tabina ba disausau Danyel mana xaitamoxi imanging sabuxana, dihing gimunggimung gol waxungtuania saing dahabingia ba Danyel sok lipu yaya tuwama maluxu yonggia.
30 Yambong baing dung Belsasa, Babilon* kimbo Kaldiadi. xaitamoxidinga. 31 Baing Darias lipu Midiam xap yongga bungina nianindi 62.