7
Alat a Israel lotovi 144,000
1 Beti noris aŋel tovat lotoil, sua len nanot, sua len nais, sua len nasaut mai sua len nawes. Loil gol nǝlan gail hǝn nǝlan asike b̃eṽuv nǝtan o nǝtas o nǝhai ideh.* Jer 49.36; Dan 7.2; Zec 6.5 2 Ale noris aŋel togon togǝm len naut namityal tovisi lan, ikad natesua hum nǝstam hǝn b̃ip̃os gat nabuburutan len natite ke siGot nǝkadun nǝmauran. Ale ikai habat van hǝn aŋel tovat galenan, aGot tolav mai galito nǝdaŋan hǝn lǝb̃emǝdas nǝtan mai nǝtas. 3 Ikai ke, “Mititoh bai! Samtemǝdas nǝtan o nǝtas o nǝhai gail vǝbar namtb̃ip̃os gat nǝstam len nabunǝhon naslev siGot sidat gail b̃inoŋ.”* Eze 9.4-6 4 Ale nosǝsǝloŋ hǝn nap̃uruŋan salit aŋel top̃os gat nǝstam len nabunǝholito ke lovi siGot. Ip̃os gat nǝstam len 144,000 dan nahǝmar p̃isi ta Israel:
5 12,000 dan nahǝmar Jutah,
12,000 dan nahǝmar Reupen,
12,000 dan nahǝmar Kat,
6 12,000 dan nahǝmar Aser,
12,000 dan nahǝmar Naftali,
12,000 dan nahǝmar Manasseh,
7 12,000 dan nahǝmar Simeon,
12,000 dan nahǝmar Levi,
12,000 dan nahǝmar Issakar,
8 12,000 dan nahǝmar Sepulun,
12,000 dan nahǝmar Josef,
12,000 dan nahǝmar Penjamin.
Nǝ-sal-suhi-an seb̃iltiluṽoh
9 Husur natgalenan noris nab̃iltiluṽoh, avan ideh edǝdas b̃eṽuruŋi. Logǝm len naluṽoh hǝn nǝvanuan naut tiltile p̃isi, logǝm len nahǝmar p̃isi, logǝm len nǝvanuan nabi tiltile gail p̃isi mai nasoruan p̃isi. Ale loil a m̃o len nab̃iltihai bǝtbǝtah mai len nǝhon aTuhsipsip. Losun nahurabat topǝhapǝhw ale len navǝlalito lutariv nǝpashǝt nadet.* Nadet ehum namǝtu, ebǝlav, ikad nǝpashǝte mai ikad naṽite lotohanhani. Len naut a Israel lob̃ilb̃il hǝni hǝn lǝb̃eṽusani ke lotowin sǝhor aenemi salit gail len nǝb̃alan o hǝn b̃eṽusan nahǝhaṽuran salito. 10 Ale len nab̃iltidoldol lukai habat ke, “Nǝ-lav-kuvi-an dan na-lǝŋon-isa-vǝsa-an egǝm len aGot sidato tobǝtah len nab̃iltihai bǝtbǝtah, mai egǝm len aTuhsipsip!” 11 Ale aŋel gail p̃isi loil dar vis nab̃iltihai bǝtbǝtah mai nǝvanuan totibau gail mai natit tovat lotomaur. Luteh len tan, b̃ov kǝta vi pan, a m̃o len nab̃iltihai bǝtbǝtah hǝn lǝb̃ilotu hǝn aGot ke,
12 “Kitin! Na-sor-sal-suhi-an,
nǝyalyalan hǝn nǝbathumǝnas,
namitisau hǝn nǝmauran tonor,
nasipaan, na-putsan-nahǝsan-an,
nab̃iltidaŋan,
mai na-lǝboi-buni-an hǝn b̃igol natite;
tevi tǝban aGot sidato vi sutuai vi sutuai.
Ganan!”
13 Beti sua len nǝvanuan totibau gail eus ginau ke, “Alategai lotosun nahurabat pǝhapǝhw gail, lovi ase? Logǝm len naut a be?” 14 Ale nusor vari ke, “Nǝsalǝboi. Nasub̃, gaiug golǝboi, gikele.”
Beti ikel mai ginau ke, “Lovi alat lotolavutur len nǝboŋ hǝn na-b̃iltilǝŋon-isa-vǝsa-an gail. Lokǝkas nahurabat salit len nǝda heTuhsipsip, gol lotopǝhw yesyes.* Dan 12.1; Mat 24.21; Mak 13.19 15 Imagenan loil a m̃o len nab̃iltihai bǝtbǝtah siGot, ale loum san len nalennǝyal mai nalenmariug len naim san. Ale gai tobǝtah len nab̃iltihai bǝtbǝtah dereh tikabut gol galito, havhav hǝn galito. 16 Asike lumalkǝkat, asike lumaduh boŋ ideh am. Asike nǝyal esun masuṽ hǝn galito, asike napudan ideh ilat karkar hǝn galito. 17 Husur aTuhsipsip toil rivuh len naut tokad nab̃iltihai bǝtbǝtah dereh tekǝtkǝta tǝban galit hum tovi vanuan nasipsip salito. Dereh tesǝhar galito vi lan nabǝko gail hǝn nǝwai nǝmauran. Ale aGot dereh tigar namǝtarur gail p̃isi dan namǝtalito.”† Len naves 16-17, ris Psa 23.1-2; Isa 25.8, 49.10; Eze 34.23
*7:1: Jer 49.36; Dan 7.2; Zec 6.5
*7:3: Eze 9.4-6
*7:9: Nadet ehum namǝtu, ebǝlav, ikad nǝpashǝte mai ikad naṽite lotohanhani. Len naut a Israel lob̃ilb̃il hǝni hǝn lǝb̃eṽusani ke lotowin sǝhor aenemi salit gail len nǝb̃alan o hǝn b̃eṽusan nahǝhaṽuran salito.
*7:14: Dan 12.1; Mat 24.21; Mak 13.19
†7:17: Len naves 16-17, ris Psa 23.1-2; Isa 25.8, 49.10; Eze 34.23