Ulibra wi Naşibaţi 1 TIMOTE 1

Uţup uŧeek wi

Pawulu apiiŧuŋ

Timote

Uţup ujuni

Ulibra wi uwo kakaarta kaŧeek ki pawulu apiiŧuŋ Timote. Pawulu abi ya ubeeka wi Liŧtra pţup Uţup Ulil Unuura. Dul di di Timote abiiŋ afëţ. Wi aŧiinkuŋ Pawulu wi wi akakuŋ ţi bgah bi Kriŧtu. Agakandër na Pawulu ŋyaaş ŋŧum akak alemp na a. Woli Pawulu aŧiink kë pnŧuk pi banfiyaaruŋ pi uŧaak uloŋ pajun pdek Naşibaţi kafeţ këme bţup bloŋ bawo da, Timote i i ajaaŋ ayil da aya ţiini na baka kaţaŋ baka. Abi yila du Efeŧ aya atëŋţën pnŧuk pi banfiyaaruŋ Kriŧtu panwooŋ da. Dul di di kakaarta ki kaţënkuluŋ. Aleşana ţi ka ajaka aya aji na banfiyaaruŋ banwooŋ da balipara bañaaŋ bankjukanuŋ uko umpaţuŋ na Uţup Ulil Unuura. Aţupa kak jibi banfiyaaruŋ Kriŧtu bawooŋ kawo ţi pnŧuk pi banfiyaaruŋ na jibi bawooŋ kadat bankwooŋ ţi kadun ki baka.

Hënk di ifah yi ulibra wi iwooŋ:

1. Pjukan pi banţilanuŋ aji bawo bajukan Bgah (1.1-20)

2. Hum di ñaaŋ awooŋ kañehan Naşibaţi kabot kadëmana (2)

3. Ulemp wi banwooŋ ţi kadun ki pnŧuk pi banfiyaaruŋ (3)

4. Ulemp wi Timote (4)

5. Baaţ bayoţ na bantohi (5)

6. Hum di bawooŋ kaţaŋ banŋaluŋ itaka (6)

Pwul mboş

1 Nji Pawulu, nanjañan i Yeŧu *Kriŧtu dpiiŧu. Naşibaţi nabuuran i nja na Yeŧu Kriŧtu anwooŋ mnhaţ mi nja baţuuŋ kë nwo nanjañan. 2 Dpiiŧu, iwi Timote abuk naan na manjoonan ţi pfiyaar Kriŧtu, añehan Naşibaţi Aşin nja na Yeŧu Kriŧtu Ajugun bawulu bnuura na mñaga babot bajoobţënan ŋhaaş.

Plipara pjukan pi baţilan

3 Wi nji kayaaŋ uŧaak wi Maŧedoniya, dkooţu aji iduka du ubeeka wi Efeŧ ihilna ido bañaaŋ baloŋ banwooŋ da ajukan iko impaţi baţañan pdo haŋ. 4 Jakan na baka bawut kabi kaduka duka ţi ŋţup ŋanwooŋ ŋaanwo manjoonan, na jibi mnşini manyeenkiiruŋ. Ŋţup mënţ ŋaji ŋaţij blaţar ţañ kaduk pdo uko wi Naşibaţi aŋaluŋ unjaaŋ udolana ţi pfiyaar Kriŧtu.

5 Dţup uţup wi ţiki dŋal bañaaŋ banfiyaaruŋ baŋalad. Uŋal mënţ uwoona ţi uhaaş ujinţ, uşal unuura na pfiyaar panjoonanuŋ. 6 Kë banjaaŋ bajukan iko impaţi başë low uko mënţ, ukaaŋ kë baneem ţi bţup banwooŋ baanka udooni. 7 Baŋal pwo bame ţi uko wi bgah, aşë wo baamme uko wi bajaaŋ baţup, wi bajaaŋ bajukan na mntëŋ mnweek.

Uko wi bgah bawooŋ na manjoonan

8 Ŋme kë *bgah bawo bnuura kë ŋşë wo i kajukan ba jibi Naşibaţi aŋaluŋ. 9 Ŋme bnuura kë Moyiŧ aanwul wul bgah pa ñaaŋ naŧool, awul ba pa bañaaŋ banjubanuŋ: bampataţiiŋ, baññoomuŋ Naşibaţi, banjaaŋ bado ipekadu, banjaaŋ bakar katim ki Naşibaţi, banjaaŋ baţopan katoh ki Naşibaţi, banjaaŋ bafiŋ başin baka, banin baka, banjaaŋ bafiŋ bañaaŋ, 10 bankdoluŋ iko iţop, banjaaŋ bapiinţ na biinţ ji baka këme baaţ ji baka, banjaaŋ bamob bañaaŋ kawaap, baţilan na banjaaŋ bamehna kaşë kaţilan na bañaaŋ bŧi bampokuŋ pjukan pnuura. 11 Pjukan mënţ pawoona ţi *Uţup Ulil Unuura wi Naşibaţi andëmuŋ akuţ aŧum na bnuura aţu'ënuŋ pdo kaţup.

Ulemp wi Timote

12 Dbeeb Yeŧu *Kriŧtu Ajugun, anwulnuŋ mnhina mi plempara. Atenën, afiyaarën aşë du'ën ndo kalempara, 13 nji mbiiŋ akar ţfa katimul, ahajan bankţaşuluŋ, awo naŋoonk, kë aşë ñagi'aan, awin kë dwo ţi kapaam awo mënfiyaara. 14 Kë hënk di Yeŧu Kriŧtu Ajugun aŧumanaanuŋ na bnuura, ado kë nwo ţi ploolan na a, nhilna nfiyaara mbot nŋal bañaaŋ.

15 Bañaaŋ bŧi bawo kate uţup wi, ţiki ujoonani : Yeŧu *Kriŧtu abi ţi umundu pa pbuuran bado ipekadu, kë nji dwooŋ naŧeek ţi baka. 16 Kë aşë ñagi'aan, aţëpna ţi nji, nwooŋ naŧeek ţi baka, kadiiman kamiir kaweek ki ajaaŋ amiir bañaaŋ. Hënk baloŋ baluŋ kafiyaara kakaana ubida wi mnţo.

17 Iwi inwooŋ Naşih te mnţo,

iwi inwooŋ iinkba,

iwi i nin ñaaŋ aloŋ awooŋ aanhil pwin,

iwi inwooŋ aloolan ţañ,

pdëm na mndëm manwo ţi iwi te mnţo.

Uwo haŋ.

18 Timote abuk naan, uko wi Uhaaş wi Naşibaţi ubiiŋ aţëpna ţi bañaaŋ aţup ţi iwi utëŋţënu ihinan igut ugut unuura. 19 Mëbaan iliinŧ ţi pfiyaar pi nu, ibot iwo na uşal unuura. Baloŋ bapok pţaş uko wi ŋşal ŋnuura ŋi baka ŋakjakuŋ na baka, ukaaŋ kë pfiyaar pi baka paneemi. 20 Himene na Alekŧandër bawo ţi bukuŋ mënţën, kë nşë wutar baka *Ŧatana bajukna pwo baankak akar katim ki Naşibaţi.