1 ሃካሊያ ናኣዚ፥ ኔሄሚያ ኬኤዜ ባካ ያዺኬ፦

ዓርፄክሲሴ ፓሪሴይዳ ካኣታዼንቴ ላማታማሳ ሌዖኮ ኪስሌዎ ጌይንታ ዓጊኖና ታኣኒ፥ ኔሄሚያ ዼኤፖ ካታሞ ሱኡሳይዳ ዓኣኔ። 2 ዒማና ታ ጌርሲንሢዳፓ ፔቴ ሃናኒ ጎዖሢ ሜሌ ዓሲና ዎላ ዪሁዳ ዓጫፓ ታ ኮራ ሙኬኔ፤ ዬሩሳላሜንታ ዲዒንቲ ባብሎኔ ዔውቱዋዖ ዓቲ ዓኣ ዓይሁዶ ዓሶንታ ዎዚ ዓኣቴ ታኣኒ ዔያቶ ዖኦጬኔ። 3 ዬያሮ ዔያታ፦ «ዲዒንቲ ባብሎኔ ዔውቱዋዖ ዓቲ ዓኣ ዓይሁዶ ዓሳ ዼኤፒ ሜቶና ዻውሲንቲናይዳ ዓኣኔ፤ ሃሣ ዬሩሳላሜኮዋ ዲራ ሻሂንቲ ዶዒ፥ ማርሾ ካራኣ ታሚና ሚቺንቴኔ» ጌይ ታኣም ኬኤዜኔ። 4 ታኣኒ ዬያ ቢያ ዋይዛዖ ዴዒ ዬኤኬኔ።

ሚርጌ ኬሊያኣ ሙኡዚ ሃሺ ዖዪ ታ ዴዔኔ፤ ዬካፓ ፆኦሲ ታ ሂዚ ጌይ ሺኢቄኔ፦ 5 «ናንጊና ናንጋ ጎዳ ማዔ ጫሪንጮ ፆኦዛሢዮ! ኔኤኒ ዼኤፒኬ፤ ኑኡኒ ዒጊቹሞና ኔ ቤርታ ዔቃንዳኔ፤ ኔኤኒ ኔና ናሽካዞንሢንታ ኔኤኮ ዓይሢፆ ካፓዞንሢንታ ዎላ ቢያ ጫኣቃ ጫኣቁሞ ኔ ካፓኔ። 6 ፆኦሲዮ! ኔኤኮ ዓይሎ፥ ዒስራዔኤሌ ዴሮኮ ዻቂንቶሮ ሮኦሮና ዋንቶና ታ ሺኢቃ ሺኢጲፆ ዋይዜ፤ ታኣም ማሌ፤ ኑኡኒ፥ ዒስራዔኤሌ ዴራ ማዼ ጎሞ ታኣኒ ቡኡፃኔ፤ ጎኔና ታናንታ ታኣኮ ቤርታኣ ዓዶንሢንታ ኑ ዻቤኔ። 7 ኔኤም ዋይዞ ዒፂ ኔኤኮ ዓይሢፆዋ ቢያ ኑ ሄርቄኔ፤ ኔኤኮ ዓይላሢ፥ ሙሴ ዛሎና ኔ ኑም ዒንጌ ዎጎና ዳምቦና ኑ ካፒባኣሴ። 8-9 ‹ዒንሢ ዒስራዔኤሌ ዴራ፥ ታ ጊንፆ ጉሙርቂሢና ዒንሢ ሃንቲባኣቴ ሜሌ ዴሮ ባኣካ ታ ዒንሢ ዜርቃንዳኔ፤ ጋዓንቴ ዒንሢ ሃንጋ ታ ባንሢ ማዒ፥ ታ ዒንሢ ዓይሤ ባኮ ማዺ ዒንሢ ኩንሤቶ ዴንዲ ዓጮኮ ጋፖ ሄላንዳኣና ዎዚ ዒንሢ ዜርቂንቴያ ማዔቴያ ታኣኒ ካኣሽኪንታኒ ዶኦሬ ቤዞ ላሚ ታ ዒንሢ ቡኩሲ ዔኪ ሙካንዳኔ› ጌይ ኔኤኒ ሙሴም ኬኤዜ ቃኣሎ ኔኤሲ ማሌ። 1፡8-9 ሌዊ. ዓኬ 26፡33፤ ላሚ. ዎማ 30፡1-5።

10 «ናንጊና ናንጋ ጎዳሢዮ! ሃኣታ ኔኤኮ ዓይሎኬ፥ ኔ ዴሮኬ፤ ሃያኮ ቤርታ ኔኤኮ ዼኤፖ ዎልቆና ዶዶ ኩጮና ዓውሲ ኔ ዔያቶ ዻቂሼኔ። 11 ሃሢያ ኔ ታ ሺኢጲፆ ዋይዜ፤ ሃሣ ኔና ቦንቻኒ ናሽካ ሜሌ ኔ ዓይሎኮዋ ሺኢጲፆዋ ዋይዜ፤ ሃኖ ታኣኒ ማዻኒ ማሌ ማሊፃ ጊኢጋንዳጉዲ፥ ሃሣ ካኣቲኮዋ ዒና ሚጪንታንዳጉዲ ማሂ ታና ማኣዴ።»

ታኣኒ ዒማና ካኣቲም ዎይኖ ዑዦ ሺኢሺ ዒንጋሢኬ።