12
P̃elaga wo kiena yaru nap̃a mlelaga
1 Erau lala, sa nap̃a Ntewa sinena miye amiu ruru nena ga, kila po pan amiu pap̃isi, sineun neviun manene van amiu vena monar atam̃an kiamiu malena wetelu vania. Monar ave wa ruru wo, sa nap̃a amiyawawo tasnemiu pania sane kup̃ap̃aena tai nap̃a amla pania. Naga pe pe kup̃ap̃aena re sane sur mali tai nap̃a am̃em̃ar mare, ana naga pe kup̃ap̃aena nap̃a sane mali, a yoko Ntewa kilia kekaran manenea. Naga ke narui p̃elaga mesmesu na kilaen lotena va Ntewa nap̃a mesmesun nap̃a akila. 2 A ve atam̃an re sane naviowaena lala na yomarava nini awere amiu vena ataveve kiena p̃elaga, ana silaga, monar atam̃an Ntewa kila kiamiu sitomena la imi ve urviu sina. Sanene, yoko kiamiu p̃elaga kilia vilonia, kilia imi wo silaga, a yoko akilia ayaloro ataveve nasinenanena kiena ne Ntewa, nap̃a po, merarava a mesmesu nap̃a mesmesu silaga. 3 Nepisawal visena la nene pan amiu, komin nap̃a Ntewa pe lemam pan inu, mligan lua inu, mligan yum̃aena nene e lum̃au narui. A nesape nevisa re m̃ena suri tai van amiu, sane pe pon re si nap̃a asum̃a akila kiamiu sitomena apa manene metava poli. Tekila kiena yum̃aena sanape, ana kieta sitomena la monar mesmesu, monar su ga tano. 4 1Kor 12:12Tap̃atete tevisave ita na tepo laa taulu tap̃ena lala, komin ita na sane tas nen yaru taaga, nap̃a kana korowasa la asum̃a ga, ana korowasa la peve taaga nene kiela yum̃aena na kilaena la susum̃a ga. 5 Sane ita moki, ana Kristo p̃ere ita make ga tepim tepe taaga, ana sane inu nep̃asine ko, a ko op̃asine inu. 6 1Kor 12:4-11A Ntewa pe lemam pan ita, a tam̃an nakiliaena tap̃ena lala pan ita, nap̃a sane nalaena lala nap̃a naga kian plan pan ita vena teyum̃ae temio. A ita veve taaga monar tom̃areran teyum̃ae temio ya nap̃a mla pan ita. Sanene,
visae Ntewa tam̃an van ko sape kiom̃a, ko na ove navisawalen visena nap̃a mla pan ko, ana monar okila omio pupia lelagaena nap̃a sape sane kiena visena nene pe lelaga pap̃isi,
7 pona visae kiom̃a, ko na ove naiilaen yum̃aena na sum̃are, monar okila omio kiom̃a m̃areraena wetelu,
pona visae kiom̃a, ko na ove navianena yaru e visena kiena ne Ntewa, ko na monar yepem̃a m̃aen ruru kilaena,
8 pona visae kiom̃a, ko na ove naiilaaren sitomena kiena yaru lala, ko na monar ositom urmin kilaen,
pona visae kiom̃a, ko na ve nalaen naiilaena, monar owar ve moki,
pona visae kiom̃a, ko na ove nasumonen yaru lala e yum̃aena kiena ne Ntewa, ko na monar ve omalum re,
pona visae kiom̃a, ko na ve naiilaen la nap̃a asike e pog m̃arera, ko na monar okekaran kilaena.
9 A naga ke nene narui p̃elaga wo tap̃ena la nap̃a akila:
kiamiu sinesiena e yaru tap̃ena lala monar ve lelaga,
monar aure vetan p̃elaga viowa lala,
monar auarar ruru p̃elaga wo la m̃arera,
10 monar avinaia amiu sane ave namratava taaga ga,
monar akilali nap̃a avisu sane ane yoko kilia kila ruru p̃elaga navatanonena va la ga wa,
11 ve atam̃an re nap̃a kiamiu sitomena m̃arera na kilaen suri wo la kovio sina vetan amiu,
monar akila sane kapi vivaga sa Ninuna Wa sum̃a vivaga ruru e amiu,
12 monar akekaran navisaarena kiena ne Ntewa nap̃a kiamiu sitomena wasinea sane yoko kila wo van amiu sa ga nap̃a naga pisa,
pogos nap̃a avane naloge viowaena, monar akila kiamiu sitomena ve piavi,
monar alen silaga,
13 pogos nap̃a li nalelagaena tap̃ena lala limala plasan suri lap̃asa, monar akekara aliureure suri van la,
a monar akekaran visuaren yaru tap̃ena lala e m̃amiu um̃a.
14 Mat 5:44; Luk 6:28A nanene suri si lap̃as nanini narui nap̃a monar asitom ruruia vena kilaen va yaru tap̃ena lala:
visae lap̃asa asum̃a akila kare amiu komin nap̃a amlelaga e Yesu, monar akila wo van la. Ve avis re viowa van la, ana aviun Ntewa visa ruru la,
15 visae lap̃asa amloge po komin suri nowo tai, amiu m̃ena monar akekara amio la,
visae lap̃asa asum̃a atagin ke sur tai, amiu m̃ena monar atag amio la,
16 visae amiu amio tap̃ena lala, monar asu ruru ga amio la nap̃a kiamiu sitomena ve taaga ga,
visae ayum̃ae amio tap̃ena lala, ve aligan amiu re metavan la, sane amiu na apo, ana akekaran ga narin yum̃aena lala, a akekaran ayakol amiu amio yar la nap̃a ave torokaki,
visae akila suri lap̃asa, ana ve asitom re avisave ape manmarua, ana akila kiamiu sitomena vito su ga tano,
17 visae yaru lap̃asa akila viowa van amiu, ana ve akila maran re si naviowaena van la, ana silaga monar asitom̃alia vena akila suri punu ga nap̃a yoko yaru la akilia avisu kilale asape po a mesmesu,
18 a visae kiamiu suri viowa tai sike likan amiu amio yar tap̃ena lala, monar akila suri make ga nap̃a sike e limamiu vena were si sum̃arena imi sike pun amiu punu ga.
19 Erau lala, sineu si amiu pap̃isi nane nepisa sur la nene pan amiu. Lap̃as sina sanini, sane:
“Visae lap̃asa akila viowa van amiu, ana ve akilali nap̃a ala nakoaena van la. Akilia aligania van Ntewa vena naga lip̃ere mare la sirau, komin visena tai sike e Siriena Wa rui, nap̃a Ntewa sape,
in ke narui nap̃a yoko nela nakoaena van yeririna lala, inu ke narui nap̃a yoko nelamaran va la nap̃a akila ke piowa.” Nav 32:35
20 A sanene, visae kiamiu nasinekar la asum̃a ga, monar akila ruru la, sa nap̃a visena na Siriena Wa pisa, nap̃a sape
“Visae kiom̃a nasinekar visokaria, ola kinanena vania, visae moto karia, ola wii vania. Visae okila sanene, yoko okila naga mawan kiena p̃elaga viowa vap̃isi,
vano vano-o pona kekaran nap̃a amiu lua ave erau wo sina yo.” P̃akaiwa 25:21,22
21 Taveve suri la nene, nepisa sanene pan amiu, nesape ve atam̃an re p̃elaga viowa taulu amiu, ana monar ataulu p̃elaga viowa e kiamiu p̃elaga wo lala.