Lad hur Si Liq Phu Awg Suhx Yod hanr liq 1

Yod hanr liq

Awg meh he lehq phehq peg che awg lawn

Yod hanr liq che awr lehr, Liq phu awg pir khuhn ve duhd khad sir khad teq pa mad jad che yaog. Awg kawd loag awg ghiz he lehd a saq teq che ted ceng awg lawn haq te lehq awg khiz penr ve liq khuhn Ghig sa muhd phar mig phar che haq duhd nuhad che yaog. Par sar khar pawehd awg lawn liz laex pawz buhq lar che yaog. Yod hanr ghod che yawd ved awg meh cuhx kig vawr, “Ghig sa har kax che” lehd koz che yaog.

Buhq var he lehq buhq che awg yand

Liq che ve buhq var awr lehr, Yer suq yawd haq jad che cuh yad Yod hanr yaog. Yawd awr lehr, Yud daq chaw ve a saq teq khad haq kha nehax sir lehq Yud daq chaw ve awg lid awg khad teq pa awg lawn laex pawz buhq lar che yaog. Yod hanr buhq lar che awg lawn che teq pa laex lawn awr lehr, su mehz sir gha mawg jaw lehq tawnd gha chehd che awg lawn teq pa haq yug buhq lar che yaog. Buhq che awg khuhq vawr, A.D. 85 khuhq la ma hez ver, che ve khaz nuhr a cehax huh buhq lar che yaog.

A yed ir che awg lawn he lehq awg lawn kha peg

Liq che te koz ve duhd law lar che duhd cuhz nux awr lehr, Ka nad nux maz 20:31 khuhn mawg gha che yaog. Her rar saq chaw ceng haq ha lehg che bon khuhd yug lehq awg lawn nux maz te mar vid lar che yaog. Yod hanr yawd duhd law lar che awr lehr, maq sir jaw ser che awg lawn haq koz gad che ma hez hawg. Kheh ma khuhd khar ve ted ceng haq te lehq Yer suq Khreq phehq che he lehq Ghig sa ve Yad phu phehq che haq, haq yug cawd, mad haq yug cawd che awg lawn haq kha sehax sir ax lar che yaog. Yawd liq che te koz haq buhq che te yand, awg lawn sir vid cheaq keh ver, gha ghaw che chaw teq pa haq yawd haq mehz khuhd tawr daq lehq Yer suq haq yonr tug haq tang vid che yaog.

Awg lawn nux

1. Awg kawd yaw tug tawd (1:1-18)

2. Yer suq kanx tanr te che (1:19-51)

3. Yer suq ve kanx he lehq a yed ir che mar che tawd khuhd (2:1-11:57)

4. Duhd har phehq bawg che teq sinx (12:1-19:42)

5. Kawq teq tuag che awg lawn (20:1-29)

6. A thoq te lehq che kheh te che awg lawn koz mar ax che (20:30-31)

7. Awg leh med ve tawd (21:1-25)

Ghig sa ve Tawd khuhd awg suhr awg sar puhd lag che

1 Awg kawd maq thad liz Tawd khuhd* cawg lar che yaog. Tawd khuhd u ve Ghig sa geh chehd lehq Tawd khuhd u ve awr lehr, Ghig sa phehq che yaog. 2 Tawd khuhd u ve awr lehr, awg kawd maq thad liz Ghig sa geh teq geha chehd chehd che yaog. 3 Yawd haq cud lehq Ghig sa awg gha lia haq te phanr lar che yaog. Kha cawg chehd che awg gha lia awg khuhn lo yawd maq te phanr che ted cear liz mad cawg. 4 Yawd awg khuhn lo co ha teq che ted ceng cawg che yaog. Co ha teq che u ve awr lehr, chaw yad ve Awg ghiz† yaog. 5 Awg ghiz u ve awr lehr, naz hoq che‡ awg khuhn lo pawd tuhaz lehq, naz hoq che awr lehr Awg ghiz haq ma ghad.

6 Ghig sa peha lar che Yod hanr§ meh che chaw te ghad cawg che yaog. 7 Yawd awr lehr sax khiz khanr tug awg pun lag che yaog. Yawd haq te lehq chaw awg gha lia yonr vid tug, Awg ghiz u ve awg lawn yawd sax khiz khanr che yaog. 8 Yawd awr lehr Awg ghiz phehq che ma hez. Kheh ma khuhd, Awg ghiz awg lawn sax khiz khanr tug yawd lag che yaog.

9 Awg ghiz awg cehg mag awr lehr mig gig* thag lo lag lehq chaw awg gha lia haq awg ghiz paw vid che yaog. 10 Yawd awr lehr mig gig haq te phanr lar lehq, mig gig khod-aq lo chehd chehd liz, mig gig yad yawd haq maq sir. 11 Yawd ved chehd kig lo yawd lag liz, yawd ved chaw† yawd haq maq haq yug. 12 Kheh ma khuhd, yawd haq kha haq yug lehq yawd ved awg meh haq kha yonr che chaw awg gha lia haq Ghig sa ve awg yad phehq vid tug yawd a khawag pid che yaog. 13 I hehd haq Ghig sa ve awg yad phehq vid che awr lehr, awg ceng awg khad haq te lehq ma hez. Awg suhr awg sar a lor haq te lehq ma hez. Chaw yad ve a lor haq te lehq liz ma hez. Ghig sa haq te lehq yaog.

14 Tawd khuhd u ve awr lehr, awg suhr awg sar puhd lehq ngag hehd geh chehd che yaog. Yawd ved awg mig awg phond haq ngag hehd gha mawg che yaog. Awg mig awg phond u ve awr lehr, Awr pa lo lag che Yad phu tinr-a ve awg mig awg phond phehq che yaog. Yawd awg khuhn awg bon awg sinx he lehq awg cehg mag cawd che‡ ted ceng kha lawq cawg che yaog.

15 (Yod hanr awr lehr yawd awg lawn sax khiz khanr che awg khuhn kug lehq koz che, “ ‘Ngag khaz nuhr lag tug chaw te ghad awr lehr, ngag haq keh ir che yaog. Awg lawn ghod ver, ngag mad cawg ser thad loar liz yawd cawg chehd vehr che yaog,’ lehz ngag koz lar che awr lehr, chaw che te ghad yaog,” lehd koz che yaog.)

16 A nig awg gha lia awr lehr, yawd peh lawq che ted ceng awg khuhn, awg bon ted ceng peg ted ceng gha lar che yaog. 17 Awg lawn ghod ver, awg lid tawd khuhd awr lehr, Mod ser haq cud lehq pehar lar che yaog. Kheh ma khuhd, awg bon awg sinx he lehq awg cehg mag cawd che ted ceng awr lehr, Yer suq Khreq haq cud lehq phehaq che yaog. 18 Chaw te ghad-eg liz Ghig sa haq mad mawg jaw. Khar thad liz Awr pa pad huh chehd che Yad phu tinr-a awr lehr, Awr pa awg lawn kha sehax saw pheq mar ax peg che yaog.

A kaz tur var Yod hanr sax khiz khanr che

19 Yud daq chaw ve awg hox awg nax teq pa awr lehr, paw khod teq pa he lehq Ler viq chaw teq pa haq Yer ruq sar lehnr med lo tu lehq Yod hanr chehd lo kae pe che yaog. I hehd awr lehr, “Nawg a suawg le,” lehd koz na ngawx che te yand, 20 Yod hanr che kheh te sax khiz khanr che yaog. “Ngag awr lehr Khreq ma hez,” lehd koz, kha sehax thed-e ghad koz vid che yaog. Yawd maq her ka ma khuhd ceh.

21 Kheh te lehq i hehd awr lehr, “Kheh te ver, nawg Ed lid yaq§ lehq la,” lehd koz na ngawx che te yand, “Ngag Ed lid yaq ma hez,” lehz yawd kawq koz vid che yaog. “Lag tug ve* Ghig sa ve cuh kar var u ve te ghad lehq la,” lehd koz kawq na ngawx che te yand, “Ma hez,” lehz yawd kawq koz vid che yaog.

22 Kheh te lehq i hehd kawq koz che, “Nawg a suawg le. Ngag hehd haq peha lar che chaw teq pa haq ngag hehd kawq koz vid gha tug, nawg awg ton awg lawn nawg khawd-ehg kheh koz cheawg le,” lehd koz na ngawx che yaog.

23 Yod hanr kawq koz che, “Ghig sa ve cuh kar var Id sar yaq koz lar che heh, †‘Jawd mawd Ghig sa ve yaq kaw haq thed-e ghad teo,’ lehz heh pir khuhn lo kug chehd che te ghad ve awg khuhd awr lehr ngag yaog,” lehd koz vid che yaog.

24 Chaw u ve teq pa awr lehr, Phar rir sehd teq pa kae pe che chaw teq pa phehq che yaog.

25 I hehd kawq koz che, “Nawg awr lehr Khreq† ma hez, Ed lid yaq liz ma hez. Ghig sa ve cuh kar var u ve te ghad liz ma hez che ver, a thoq te nawg su haq baz tiz sar pid cheawg le,” lehd koz na ngawx che yaog.

26 Yod hanr kawq koz che, “Ngag awr lehr su haq a kaz awg khuhn lo baz tiz sar pid che yaog. Kheh ma khuhd, nig hehd maq sir che chaw te ghad nig hehd awg khuhn lo chehd chehd che yaog. 27 Yawd awr lehr, ngag khaz nuhr lag che chaw te ghad phehq che yaog. Yawd ved khi noz caz haq phi tug lehax liz ngag maq kenr,” lehz i hehd haq koz vid che yaog.

28 I hehd Yod hanr haq kheh te na ngawx che awg ti awr lehr, Ber tar niq khaz‡ khuhn Yawd danr lawg kax ox pax awr lo Yod hanr baz tiz sar pid chehd kig huh yaog.

Yer suq awr lehr Ghig sa ve Yawg nehax yaog

29 Awg khaz nuhr teq ni, Yod hanr awr lehr Yer suq yawd chehd lo lag tod che haq gha mawg che te yand yawd koz che, “Mig gig yad ve vend bax haq yug kha che phad, Ghig sa ve Yawg nehax§ haq ngawx-oq. 30 ‘Ngag khaz nuhr lag tug chaw te ghad awr lehr, ngag haq keh ir che yaog. Awg lawn ghod ver, ngag mad cawg ser thad loar liz yawd cawg chehd vehr che yaog,’ lehd ngag koz lar che awr lehr, chaw che te ghad haq koz che yaog. 31 Awg kawd maq thad ngag yawd haq maq sir. Kheh ma khuhd, Id sar rer laq chaw teq pa yawd haq kha sehax gha mawg gha sir vid tug, ngag lag lehq su haq a kaz awg khuhn lo baz tiz sar pid che yaog.”

32 Kheh te lehq, Yod hanr sax khiz khanr lehq koz che, “Awg ha phu awr lehr, a pia heh te muhd nuh maq lo yaq lehq yawd awg thag huh chehd chehd che haq ngag gha mawg che yaog. 33 Awg kawd maq thad ngag yawd haq maq sir. Kheh ma khuhd, a kaz awg khuhn lo su haq baz tiz sar pid tug ngag haq cuha che phad te ghad ngag haq koz ax che, ‘Yawd awg thag huh Awg ha phu yaq lehq chehd chehd che te ghad haq nawg gha mawg ver, yawd awr lehr daq che kehg che Awg ha phu awg khuhn su haq baz tiz sar pid* che phad phehq che yaog,’ lehd koz ax che yaog. 34 Ngag gha mawg peg lehq, chaw che te ghad awr lehr Ghig sa ve Yad phu phehq che yaog lehz ngag sax khiz khanr che yaog,” lehz Yod hanr koz che yaog.

Awg laq ghuhd awg kawd phehaq che chaw teq pa

35 Awg khaz nuhr teq ni Yod hanr awr lehr, yawd ved awg laq ghuhd ni ghad† geh u huh kawq hox chehd huh, 36 Yer suq lag tod che haq yawd ngawx lehq, “Ghig sa ve Yawg nehax haq ngawx-oq,” lehd koz che yaog.

37 Awg laq ghuhd u ve ni ghad awr lehr, yawd koz che tawd khuhd haq gha kad lehq, Yer suq khaz nuhr ghaq veh che yaog. 38 Yer suq phuhz ngawx lehq, ix mag yawd khaz nuhr ghaq lag tod che haq gha mawg che te yand, “Nig mag a thoq haq ca cheawg le,” lehd koz na ngawx che yaog.

Ix mag kawq koz che, “Rar bid-og, nawg khar lo chehd cheawg le,” lehd koz yawd haq na ngawx che yaog. (Rar bid lehd koz che awr lehr, Sar lar haq koz che yaog.) 39 Yer suq ix mag haq koz vid che, “Lar-oq, nig mag gha mawg tug yaog.” Kheh te cheaq te lehq, ix mag kae lehq, yawd ved chehd kig haq gha mawg che yaog. Awg yand u ve haq, muhd phiq phawd awr uhd nar rir kheh taw gag vehr che haq te lehq, u ve teq ni ix mag yawd geh chehd lar haz che yaog.

40 Yod hanr koz che tawd khuhd haq gha kad lehq Yer suq khaz nuhr ghaq veh che chaw u ve ni ghad awg khuhn ve te ghad awr lehr Sid monr Per troq awg nax var Anr drehr yaog. 41 U ve awg khaz nuhr, yawd awr lehr, yawd ved awg vix var Sid monr haq awg kawd ca che yaog. Yawd haq gha mawg lehq, “Ngag nid-ag Mir six yaq haq gha mawg vehor,” lehd koz vid che yaog. (Mir six yaq lehd koz che awr lehr, Khreq lehd koz che yaog.) 42 Kheh te lehq yawd awr lehr, yawd awg vix var haq Yer suq chehd lo sir ve kae che yaog.

Yer suq Sid monr haq ngawx peg lehq koz che, “Nawg awr lehr Yod hanr ve yad par Sid monr yaog. Nawg haq Per troq‡ lehz koz su kug tug yaog,” lehd koz vid che yaog. (Ker phaq lehd koz che awr lehr, Per troq haq koz che yaog.)

Phid liq he lehq Nar tar ner laq teq pa haq kug yug che

43 Awg khaz nuhr teq ni, Yer suq Gar liq lehd muhd mig lo kae tug duhd chez lar che yaog. Yawd awr lehr Phid liq haq phud daq lehq, “Ngag khaz nuhr ghaq laoq,” lehz yawd haq koz vid che yaog. 44 Phid liq awr lehr, Anr drehr he lehq Per troq ve chehd kig Ber sehd daq med§ yad phehq che yaog. 45 Phid liq awr lehr, Nar tar ner laq haq ca mawg che te yand yawd koz che, “Mod ser buhq lar che awg lid tawd khuhd liq awg khuhn lehd ma koz, Ghig sa ve cuh kar var teq pa buhq lar che liq awg khuhn lehd ma koz, chaw te ghad ve awg lawn haq buhq lar che heh, chaw u ve haq ngag hehd gha mawg peg che yaog. Yawd awr lehr Yod sehq ve yad, Nar sar rehq chaw Yer suq yaog,” lehz Nar tar ner laq haq koz vid che yaog.

46 Nar tar ner laq kawq koz che, “Nar sar rehq med* khuhn daq che awg ceng ted ceng cear tuhaz gha tuawg la,” lehd koz na ngawx che te yand, “Ca ngawx laoq,” lehz Phid liq yawd haq kawq koz vid che yaog.

47 Nar tar ner laq yawd chehd lo lag tod che haq Yer suq gha mawg che te yand, Nar tar ner laq ve awg lawn yawd che kheh koz che, “Yawd awg khuhn her ka che a cehax liz mad cawg che, Id sar rer laq chaw awg cehg mag te che te ghad haq ngawx-oq,” lehd koz che yaog.

48 Nar tar ner laq awr lehr, “Nawg ngag haq khawd-ehg kheh te sir cheawg le,” lehd koz na ngawx che te yand, Yer suq kawq koz che, “Phid liq nawg haq mad kug ser thad liz, a kud cehg awg huhx lo nawg chehd chehd che haq ngag mawg che yaog,” lehd yawd haq koz vid che yaog.

49 Nar tar ner laq Yer suq haq kawq koz khuhq vid che, “Rar bid-og, nawg awr lehr Ghig sa ve Yad phu phehq che yaog. Id sar rer laq chaw teq pa ve Jawd mawd liz nawg phehq che yaog,” lehz yawd haq koz vid che yaog.

50 Yer suq kawq koz che, “Ngag nawg haq a kud cehg awg huhx lo mawg che yaog lehd koz ax cheaq te lehq nawg yonr cheawg la. Che haq keh ir che awg ceng teq pa haq liz nawg gha mawg tug yaog,” lehz yawd haq koz vid che yaog. 51 Yer suq yawd haq te pawz kawq koz vid che, “Ngag nig hehd haq awg cehg mag koz ax laq, muhd nuh maq phaw lar lehq,† Ghig sa ve muhd nuh maq cuh yad teq pa chaw yad ve Yad phu awg khod-aq taz taz yaq yaq te chehd che haq nig hehd gha mawg tug yaog,” lehz yawd haq koz vid che yaog.

*1:1 1:1 Tawd khuhd Yer suq haq koz che yaog.

†1:4 1:4 Awg ghiz Yer suq haq koz che yaog.

‡1:5 1:5 naz hoq che Vend bax he lehq suh che haq koz che yaog.

§1:6 1:6 Yod hanr Yod hanr A kaz tur var haq koz che yaog.

*1:9 1:9 mig gig Mig gig haq liz chaw yad haq liz koz gad che yaog. 17:14-15

†1:11 1:11 yawd ved chaw Yud daq chaw haq koz gad che yaog.

‡1:14 1:14 awg cehg mag cawd che Yer suq awr lehr awg cehg mag cawd che ted ceng phehq che yaog.

§1:21 1:21 Ed lid yaq Awg leh med ve awg yand gag vehr ver, Ed lid yaq tuhaz tug duhd chehd che yaog. Mi 4:5-6, Bon 18:15

*1:21 1:21 Lag tug ve Bon 18.15 haq ngawx.

†1:23 1:23 Isy 40:3

†1:25 1:25 Khreq Khreq awr lehr Her lar saq khuhd te lehq, Mir six yaq awr lehr Her brehd khuhd phehq che yaog. Cuhx kig awr lehr “Nag mand puhr lar che te ghad” lehd koz gad che yaog. Tuhz 40:13

‡1:28 1:28 Ber tar niq khaz Yer ruq sar lehnr med pad huh cawg che khaz haq koz che ma hez. 11:18

§1:29 1:29 Ghig sa ve Yawg nehax Yer suq haq koz che yaog. Par sar khar yawg nehax haq gha dawz vehr che teq hax thad, Yer suq awr lehr laq kan thag huh khanr suh che yaog. 13:1, 18:28

*1:33 1:33 Awg ha phu awg khuhn su haq baz tiz sar pid Awg ha phu gha che haq koz che yaog. Cy 2 haq ngawx.

†1:35 1:35 yawd ved awg laq ghuhd ni ghad Te ghad awr lehr Anr drehr (1:40) he lehq te ghad awr lehr liq che te koz haq buhq sehr phad Yod hanr yaog.

‡1:42 1:42 Per troq Ker phaq awr lehr Ar rar miq khuhd te lehq, Per troq awr lehr Her lar saq khuhd phehq che yaog. Cuhx kig awr lehr “Huhx meh” lehd koz gad che yaog.

§1:44 1:44 Ber sehd daq med Gar liq lehd ghig po nux muhd ni tuhz phawd awr awg naz phawd lo cawg che yaog.

*1:46 1:46 Nar sar rehq med 12:21, Mt 11:21 haq ngawx.

†1:51 1:51 muhd nuh maq phaw lar lehq Yer suq haq te lehq thaer khuhq che awg bon mig gig yad thag huh lag gag che haq koz gad che yaog. Khiz 28:12 haq ngawx.