1 Mi jingat langa yu, YAWEI.

Mi askim yu brabliwei blanga album langa mi.

2 Mi dalim yu blanga ola main trabul,

en blanga wen mi woribat tumatj.

3 Wen ai kaan dum enijing mowa,

oni yu na sabi det wei blanga mi.

Langa det roud weya mi wok,

main enamimob bin pudumdan trep blanga mi.

4 YAWEI yu lukaran.

Nobodi iya hu wandi wokwok garram mi.

Nobodi nomo fil sori langa mi, najing!

En nomo eni seif pleis blanga go haidim miselp.

5 Mi jingat langa yu, YAWEI.

Yu na det seifwan pleis blanga mi.

Ai wandim oni yu wanbala langa main laif.

6 YAWEI, ensim main preya.

Ai kaan dum enijing mowa na!

YAWEI, seibum mi brom main enamimob!

Olabat tjeisimapbat mi en olabat brabli strongbala.

7 Deigimat mi brom dijan jeil wulijim ai gin preisim blanga yu neim.

Wen ola pipul blanga yu garra luk yubin brabli kain langa mi,

wal olabat garra majurrumap miselp raidaran langa mi.