1 YAWEI yu na det trubalawan God en yu seibum mi.

Mi oldei jinginatbat langa yu deitaim en naitaim.

2 Yu irrim mi.

Mi jinginatbat langa yu blanga album mi.

3 Aibin abum loda trabul en mi gulijap binij.

4 Mi jis laik detlot pipul hubin olredi dai.

Ai nomo fil strongbala na.

5 Olabat bin libum mi miselp,

jis laik aibin gitkil en leidanbat langa greib garram ola dedbala pipul.

Im jis laik yu God, bin fogedabat mi en kaan dum enijing blanga album mi.

6 Yubin tjakamdan mi langa det dipwan en dakwan greibyad.

7 Yubin brabli wail langa mi en im jis laik yubin tjakam mi langa solwoda en detlot weib tjakambat mi oloba.

8 Yubin meigim main frenmob tenawei en bradin brom mi en deibin libum mi miselp.

Mi trep na en ai kaan ranawei.

9 Main ai dubala wikwan brom kraikraibat.

YAWEI, ebridei mi jingat langa yu.

Wen mi prei langa yu mi oldei lidimap main bingga langa yu.

10 YAWEI, ai jinggabat detlot dedbala pipul.

Olabat gin luk ola klebabala ting yu dumbat? Najing.

Olabat gin jandap en preisim yu? Najing.

11 Olabat gin tok blanga det filing blanga laigim pipul olataim en blanga yu trubalawei? Najing.

12 Olabat gin luk blanga yu klebabalawei deya langa det dakbala pleis? Najing.

Olabat gin sabi blanga yu gudbalawei deya langa det pleis weya yu nomo jinggabat olabat enimo? Najing.

13 Bat YAWEI, mi jingat langa yu blanga album mi.

Ebri moning mi prei langa yu.

14 YAWEI, wotfo yu nokambek mi?

Wotfo yu gibit mi bekboun?

15 Brom wen aibin yang aibin ardimbat en aibin gulijap binij.

Mi brabli wik na dumaji yubin dum detmatj nogudbala ting langa mi.

16 Dumaji yu barn binji im jis laik fladwoda gaburrumap mi.

Yubin gulijap binijimap mi.

17 Ebridei ol detlot nogudbala ting brom yu kaman langa mi brom ebri said jis laik fladwoda,

en olabat jidan raidaran langa mi.

18 Yubin meigim main gudfren olabat libum mi,

en det dakbala pleis na main fren.