Manö Kamɨŋ Repelesin 7

Isrel nɨbi bɨ iru nöp God kƚiñ nɨpe udla

1 Pen kuöyaŋ u nɨŋnö, ejol mɨhau mɨhau ram mɨnöŋ goƚ mɨhau mɨhau ke ke urak mɨdöm, pɨnöm mɨhau mɨhau udöl mɨdöm, mɨnöŋ naböŋ, ñɨg solwara, mab gau, naij gagnɨm, a göm, naböŋ kale ke añɨ añɨ udöl gɨ mɨdeila. * 2 Pen yad nɨŋnö, ejol ap sɨdö lɨm göp gau nɨbö, God Bɨ Pör Kamɨŋ Mɨdöp nan kƚiñ rɨk lep nɨpe u damöm, ejol mɨhau mɨhau God hagö söl ram mɨnöŋ ñɨg solwara gɨ naij gɨnɨg gaila anɨb gau kalɨp haga, 3 “Pɨdöŋ gim! Nɨbi bɨ God hon nɨp wög gɨ ñɨbal gau kƚiñ nɨpe u nable kale laŋ rɨkaiun; hainö pɨnöm yube, amöm ram mɨnöŋ, ñɨg solwara, mab nan gau gɨ naij gɨnɨm,” a ga. *

4 Pen manö ap hagla nɨŋnö, nɨbi bɨ God kƚiñ nɨpe nable laŋ rɨkla anɨb gau, Isrel nɨbi bɨ iƚ ke ke gau jɨm ñɨla u wan hadred podi po dausan (144,000). *

5 Nɨbi bɨ anɨb gau, Juda iƚ u kale 12,000;

Ruben iƚ u kale 12,000;

Gad iƚ u kale 12,000;

6 Asa iƚ u kale 12,000;

Napdalai iƚ u kale 12,000;

Manasa iƚ u kale 12,000;

7 Simion iƚ u kale 12,000;

Lipai iƚ u kale 12,000;

Isaka iƚ u kale 12,000;

8 Sebyulan iƚ u kale 12,000;

Josep iƚ u kale 12,000;

Benjamin iƚ u kale 12,000,

u me, jɨm ñɨla u wan hadred podi po dausan me u.

9 Pen manö kalɨ kƚiñ rɨkpin anɨbu naböŋ nɨŋ damem, kauyaŋ u naböŋ nɨŋem nɨŋnö, Bɨ sea kiŋ asɨka u abe, Sipsip Pi u abe mɨdlö nɨŋöl gɨ, nɨbi bɨ iru nöp amgö ilö adö kale au urak mɨdeila. Nɨbi bɨ anɨb gau, ram mɨnöŋ ke ke la rö, iƚ ke ke la rö, hañ ke ke la rö, manö yabɨƚ ke ke la rö, gau nɨbö gau nɨbö apöm mɨdeila. Nɨbi bɨ wö ralep rö mɨdageia anɨb gau, magöŋhalö waƚɨj rud nöp yɨmöm, galon uɫaŋ ud mɨdöl gɨ, 10 God hib nɨpe haglö adö arö nɨŋöl gɨ, wɨñ kub hagöm hagla,

“God hon sea kiŋ bɨs göp u abe,

Sipsip Pi u abe hanɨp nan a gɨmil gɨ aij gɨlö u me,

kamɨŋ arnabun,” a gɨla. *

11 Ejol gau magöŋhalö Bɨ sea kiŋ asɨk mɨdeia u abe, bɨ manö ud asɨkep gau abe, nan kamɨŋ mɨhau mɨhau gau abe, kalɨp bɨg gɨgabö gɨ mɨdeila. Kale ap lug kugom yɨmöm, ubör yɨhöŋ göm, God hib nɨpe u dap ranöm, 12 hagla,

“Nɨŋö yabɨƚ!

God hon hib ke halö mɨdöp, a gun,

hib nɨpe hagno adö araŋ.

Nɨpe mailö aij ke halö mɨdöp, a gun,

hib nɨpe hagno adö araŋ.

Nɨpe gasɨ aij ke yabɨƚ mɨdöp, a gun,

hib nɨpe hagno adö araŋ.

Nɨpe ga u, nɨp aij yabɨƚ, a gun,

hib nɨpe hagno adö araŋ.

Nɨpe aij ke yabɨƚ mɨdöp, a gun,

hib nɨpe hagno adö araŋ.

Nɨpe nan nɨhön gɨnam a gɨnab u, u nöp gɨnab, a gun,

hib nɨpe hagno adö araŋ.

Nɨpe kƚö ke yabɨƚ mɨdöp, a gun,

hib nɨpe hagno adö araŋ.

God hon hib nɨpe u pör pör nöp hagno adö araŋ.

Nɨŋö yabɨƚ!” a gɨla. *

Kuöyaŋ ilön udagnaböl

13 Pen bɨ kub manö ud asɨkep anɨb gau bɨ ap, yɨp hag nɨŋöm haga, “Nɨbi bɨ waƚɨj rud lɨbal anɨb gau an? Pen kale gai nɨbö aubal?” ö ga.

14 Hageia hagnö, “Bɨ kub. Yad nɨŋagpin; pen ne nɨŋban,” a gɨnö. Anɨg hagnö, yɨp haga, “Nɨbi bɨ gai i kalɨp marö ñɨlö, bɨsƚam yabɨƚ mɨdöm kamɨŋ aubal. Pen kale Sipsip Pi hagape nɨpe u udöm, waƚɨj kale gau uɫ maɫɨ gɨlö, rud göp. * 15 Anɨb u me,

“Kale God sea kiŋ iƚ aŋ au mɨdöl gɨ, sɨdö aŋ, sɨbön yaŋ,

sabe gep ram raul mɨgan nɨpe u wög nɨpe göl gɨ, gɨpal.

Bɨ sea kiŋ bɨs gɨ mɨdöp u

kalɨp abad mɨd aij yabɨƚ gɨnab. *

16 Kalɨp kɨyö kuöyaŋ gagnab, ñɨg nan kuöyaŋ gagnab,

sɨdö kal kuöyaŋ nɨŋöm ilön gagnab. *

17 Nɨhön gɨnɨg: Sipsip Pi sea kiŋ aŋ au mɨdöp u,

sipsip abadep bɨ kale mɨdöm,

kalɨp uɫ gɨ ñɨg ilam junab gau arö,

ñɨg kamɨŋ magö ñeb u ñɨŋnaböl.

Pen God nɨpe mɨɫöŋ ñɨg kale u

magöŋhalö wik gɨ yunab,” a ga.