1 Petrus
Horok Lirna La'an
Ri ma naran Petrus hi'i horok eniyeni. Petrus eni Yesus Nin man lernohi pakunohi ida nano ri idaweli woro'o enihe. Petrus aku horok eni laa ri Kristen ma ka namwali Yahudi man minle propinsi Asia Tatana (ors eni aile Turki wali warak). Lere onne ri Kristen man min lolo onne lernala wewerek pananaka ono hi akin naili'il Yesus. Heruwali rin hi'i apinpinha, la heruwali rin wakunu rano'onyaka (2:11-12; 2:15; 3:16; 4:4). Heruwali ramwali ri nin hophopon wahwahan, la hi onne lernala apinpinha nano hi makromon (2:18-20). Maeke heruwali sus ono hono akin ka naili'il Yesus (3:1, 6).
Ende Petrus hi'i horok eni aku laa na'alap hi akin, leke hi akin eren namkene naili'il Yesus lolo rir wewerek pananaka na'akeme. Petrus na'aheni kenen panatal noro apinpinha ik lernanala nodi kunukunohi nahenia namlolo kokkoo ik akin naili'il Makromod Yesus, ono lo'o ik akin namkene lere ik lernala apinpinha ri nauroin namlolo kokkoo ik akin naili'il Yesus wawa'an (1:6-7; 4:12). Ai na'aheni lo'o ik lernala wewerek pananaka ono ik akin naili'il Yesus, wa'an rehi kala ik kemen Makromod Lalapa la hi'i ha man wa'an mamani (4:19). Petrus nala nounaku namehin na'alap hi akin leke hi ramkene hi'i ha man wa'an la hi akin namkene naili'il lere hir lernala wewerek pananaka warna-warna.
Horok Ihin
1. Petrus nala wanakunu man hari horok eni (1:1-2).
2. Ik lernaledi morimori worworu nano ik Amad Makromod Lalap, Makromod Yesus noro idewe Roh Kudus (1:3-12).
3. Makromod Lalap hi'i ik kamwali Ai ananhe, de wa'an rehi ik hi'i ha man wa'an mamani (1:13-2:10).
4. Petrus nala nounaku ri na'akeme leke derne rakani noho nin ma nodi molollo, nala nounaku ma namwali hophopon wahwahan, nala nounaku ri man ho, la nala nounaku namehin ri na'akeme (2:11-3:12).
5. Petrus nala nounaku ri man lernala wewerek pananaka ono hi akin naili'il Yesus (3:13-4:19).
6. Petrus nala nounaku laa man panulu lolo agame noro ri ma nadedem (5:1-11).
7. Petrus nala lira man horu (5:12-14).
1
Petrus nala hiyene aroro
1 I wal'u na'ahoru man Makromod Lalap niliyedi me'e! Ya'u eni Petrus ma namwali hophopon ma nodi Yesus Lirna, la ya'u hi'i horok eni aku ki mi man ko'u nano minim nohorai, man holiyala lolo propinsi Pontus, Galatia, Kapadokia, Asia noro Bitinia.
2 Ik Amad Makromod Lalap, niliyedi mi ono onne lernohi Nin panaeku man An hi'iyedi nano nonolu me'e, la Roh Kudus hi'i mi mamwali Nin ri mememen man moumou dewdewe, penia mim derne makani Yesus Kristus, la Ai rarna na'amouwedi mi nano minim dohohala na'akeme.
Ya apanak Makromod Lalap na'amoli nala Nin rere'e haharu rehirehi lewlewen ki mi, la hi'i mi akim eren moiliwi mahuwele.
Ik lernala or'ori dardari ma kan horu
3 I wal'u na'ahoru! Mai ka'uli kasa'a Makromod Lalap ma namwali ik Makromod Yesus Kristus Aman! An kukul Nin aki man wa'an wake'e maika, de nala morimori worworu maika. Ik lernala morimori worworu onne, ono Ai na'amori wali'ur Yesus Kristus nano Nina makmaki onno. Onne penia ik kamkene kawiya'ar Ai. 4 Ende ik kauroin nahenia lere man mai Makromod Lalap nala rere'e harharu man wa'an wake'e maika. Rere'e harharu onne Ai na'akenedi lolo a'am raram leke nala Ai ananhe na'akeme. Rere'e harharu onne namwali linikir kanaru man wa'an mamani, ono linikir kanaru onne kan yak, kan popo, la kan herre laa ewi-ewi. 5 Memen mim lernala rere'e harharu man Ai na'akenedi onne ono mi akim naili'il Makromod Lalap, de Ai nodi Nin ke'eke'el an'anha nadiyaka mi hehen nanumene lere noho eni nin man horu. Enleke lere onne Ai nalhari or'ori dardari ma kan horu man Ai na'akenedi nala ki mi, ono An huriyedi mi nano dohohala nin molollo me'e.
6 Ende mi akim nahuwa'anedi here! Kade ors eni mim malui mahehel ono mim lernala apinpinha noro kenene panatal wo'ira na'akeme, maa ka nalo'ol minim wewerek pananaka onne horuwedi me'e. 7 Kenen panatal noro apinpinha onne mim lernale leke ri nauroin nahenia mi akim naruri naili'il kokkoo, ee ka! Kenen panatal noro apinpinha onne naise aiye man ri nodi na'awoir mahe leke nauroin nahenia maha onne namlolo mahe ihi, ee ka! Enimaa mi akim ma naili'il onne wa'an narehi nano mahe onne, ono mahe onne lere man mai moluwedi me'e. Ende rakan lere alam Yesus Kristus nalhari kemen mai noho wawan wali'ur, mim lernala ul'uli sasa'a, honoor hanawa, la Ai na'akulu na'alapedi mi ono mi akim namkene naili'il Ai.
8 I wal'uhe, nano nonolu mi kam do'onala Yesus, maa mi maramyak Ai rehi. Enla ors eni mi kam do'on Ai makun, maa mi honorok akin naili'il Ai, penia mi akim nahuwa'an wake'e! 9 Mi akin nahuwa'an, ono mi mauroinedi nahenia Makromod Lalap huriyedi mi nano dohohala nin molollo, la naledi or'ori dardari ma kan horu ki mi me'e. Onne na'akeme namwali ono mi akim naili'iledi Ai me'e.
10 Nabi-nabi nonolu enihe konohiyedi mi nahenia Makromod Lalap kukul Nin aki wawa'an ki mi, penia lere eniyeni mim lernala or'ori dardari man ma'aruru onne. Nonolu eni hir loi honorok Horok Lape, la wakuku leke rauroin mouropo rere'e harharu man Makromod Lalap nouwedi me'eni. 11 Lolo Kristus Nin Roh man howok lolo nabi enihe raramne, Makromod Lalap konohi hi nahenia lere man mai Kristus man An kikan namwali Rai laa ewi-ewi lo'o lernala wewerek pananaka nammori horu mene lernala ul'uli sasa'a ma narehi nalewen wake'e. Onne penia nabi-nabi onne koklolo ra'inau leke hi rauroin ma'anana An mai, la hi'ihehewi Ai nala or'ori dardari maika. 12 Nonolu onne Makromod Lalap konohiyedi nabi enihe nahenia or'ori dardari man An nouwedi eni lo'o ka namwali hirira kulere, maa namwali lere man mai, penia hir konohi inhawe ma namwali noro mi lere eniyeni. Enimaa rakan ors eni Makromod Lalap Nin Roh nano a'am raram nala ke'eke'el an'anhe Nin ri ma nodi Lir Wawa'an enihe, leke hir konohi mi mouropo panaeku ma na'ono or'ori dardari ma kan horu eniyeni. Hophopon a'am raram enihe raram nodi do'on rauroin or'ori dardari ma kan horu onne haenhi.
Ik lernaledi morimori worworu me'e, de hi'i ha ma namlolo mamani
13 Ende loi honorok wawa'an leke mi mamkene lernohi Makromod Yesus Lirna Wawa'an, la madiyaka mi kemen leke yono hi'i ha man ailanna. Mawiya'ar mehe Makromod Lalap Nina rere'e haharu man Yesus Kristus nala ki mi lere An wali wali'ur mai noho wawan. 14 Mi mamwaliyedi Makromod Lalap ananhe, de derne makani wawa'an, la yon lernohi minim monmono kamanna man ailanna me'e. Nonolu eni mi ka mauroin Makromod Lalap makun, de mim lernohi minim monmono kamanna onne mamani. 15 Ende yon hi'i dohohala me'e, maa hi'i ha ma namlolo mamani, leke lolo minim hini'i wenewhe na'akeme mi maise Makromod Lalap man moumou dewdewe wake'eni, ono Ai penia ma napolu mi lernohi Ai. 16 Ende yon hi'i dohohala, ono lolo Horok Lap raram Ai na'aheni, “Yono mim hi'i dohohala me'e, ono Ya'u penia ma na'alehe dohohala wake'e.” * Im. 19:2
17 I wal'uhe! Lere mim hi'i lir napanak, nadedem mi mapolu Makromod Lalap, “Papa.” Enla yon hamlinu nahenia Makromod Lalap penia man ho'ok kail ri mormori na'akeme lernohi dohodoho rira hini'i wenewhe, la Ai ka na'ili naloho ri. Ende wa'an rehi mi mamka'uk Ai, la madiyaka minim morimori wawa'an leke hi'i ha ma namlolo mamani hehen nanumene minim lere horu, ono lere mim holi lolo noho wawan eniyeni mi maise ri man ko'u nano rir nohorai, de morile ri namehin nin nohe.
18 Derne makani Makromod Lalap, ono mi mauroin nahenia An pairedi minim okon raka man lap wake'e leke huriyedi mi nano minim morimori lo'olo'ol man mi upum a'um naledi ki mi eni. Morimori lo'olo'ol onne kan min haida, la ka nala haida man wa'an ki mi. Makromod Lalap ka nodi ha man pelek molu naise maha noro pere pair iknik okon raka, maa 19 Ai nodi Kristus rarna man wella ai wawan wake'e. Kristus mehe namwali Pipdumana ma na'alehe salida man Makromod Lalap naire namwali honoi kanani nodi pair iknik okon raka man lap onne. 20 Lere noho eniyeni kaale makun, Makromod Lalap niliyedi Yesus namwali Rai laa ewi-ewi. Enla lere alam ma na'urani noho nina man horu eni, An hopon Yesus mai noho wawan leke na'ohu nahala minim dohohala la nala or'ori dardari ma kan horu ki mi. 21 Makromod Lalap ma na'amori wali'ur Ai nano Nin makmaki, kikan Ai laa a'am raram, la na'akulu na'alapa Oin Naran. Yesus Nin hini'i wenewhe onne hi'i mi akim naili'il Makromod Lalap. Enpenia mi akim namkene naili'il Ai, la mi mawiya'ar Ai wawa'anedi, ono mi mauroin inhawa man An nouwedi na'akeme namwali.
Ik ida ma naramyaka ida wawa'an
22 I wal'uhe, lere eniyeni mim derne makaniyedi Makromod Lalap Lirna Wawan ma namlolo me'e, de mi kemmu ra'amou ra'adewedi nano dohohale me'e. Ende mi ida ma nararamyaka ida molmolle ri noro lodon walin mememen. Onne penia ya'u nounaku mi leke mi ida ma naramyak ida eren wawa'an modi honorok aki man mou, 23 ono mim lernaledi mormori worworu nano Makromod Lalap man mori laa ewi-ewi! Morimori man mai nano ri mormori, ka nalo'olo moluwedi, maa morimori worworu man mai nano Makromod Lalap kan molu laa ewi-ewi! Enla mi kam lernala morimori worworu nano ri mormori, maa mim lernala morimori worworu onne nano Makromod Lalap, ono mim kokaledi Ai Lirna Wawan man mori laa ewi-ewi. 24 Horhorok aile lolo Horok Lap ma na'aheni, “Ri mormori noho wawan rira morimori namnenehe noro penek man pelek maki, la rir morimori ma'aruru namnenehe naise audipi man pelek namlau haenhi. Penek namlauwedi, la audipi mehen nadiyauredi, * Yes. 40:6-8 25 maa Makromod Lalap Lirna Wawan namkene laa ewi-ewi!”
Enla Makromod Lalap Lirna Wawan onne namnenehe noro Lira Wawa'an man rin loikaruwedi ki mi me'eni!