1-3 Wandakali-mane Gotena pii oko wayumane nembo natene ato, balana asini epene oko awua tepa alu, koo tupa piyaini. Wuane pua teke, yuu okona pitisa akali kawane atalaini tupa pitaka-mane Gotena mana tupa ole dindi lo wayumane wato mina napene ato, koo piyaini teke. Tene okonena, pitisa akali kawane tupamane wandakali utupane laiya nalene, tenga-mane mo tika piyaini. Pitisa akali kawane okomane bala tanena koo piyane tupa apialu, wandakali waka tupana koo piyaini tupa apialu peakale nembo toto, yia memepi, bulumakaopi, okonetaka tupa peyoto, Gote lo opa mawua atalainipia. Wandakali-mane koo piyaini tupa Goteto apeakale loto, pitisa akali kawane okonemane opa tupa Gote maiyu, minditaka epene tupa petesini maiyu piyane. Goteto pitisa akali kawane utupane mindiki-mindiki lo yapa lo moto, wandakali tupa moyo balana piape utupane peakale lalane. * Pit 9:7; 16:6

4 Pitisa akali kawane oko bala tane-mane piape okone pukale loto, napiyane. Jia. Wamba Goteto akali Etone ee lo moto, pitisa akali kawane piape okone peakale leaipia. Wuane pua teke, andipa Goteto akali mindi ee lo meya-kola, balato pitisa akali kawane oko atoto, piape okone piyane. * Ek 28:1 5 Wuane pua teke, Kataisato bala tanena gene oko laiyu loto, namba pitisa akali kawane atoto, piape okone pukale naleaipia. Jia. Wamba Goteto bala lamawuato, andipa namba nimbana ayiane ateyo-kola, nimba nambana iwanane atele leaipia. 6 Gotena pii pepa pelene eya waka mindimane Jisasa andayo loto, wamba akali Meleki-seteke bala pitisa akali atoto, piape pua ateane pua teke, nimbatopi pitisa akali atoto, piape okone pua atapowa atolopele layene eya. * Sam 110:4; Ip 6:19-20; 7:1-2

7 Wamba Jisasa bala Gesemani yuu okona atea-angi, Goteto bala moyando, bala oma napulu-peya nembo toto, balato ai lo yamataka loto, Gote nimbato namba moyape lo pote leaipia. Jisasa bala Gotena pangosa atoto, pote lea-kola, Goteto Jisasana pote leane okone ale wato, bala minu tai laya yaepia. * Mt 26:36-46; Pl 2:6-8 8 Jisasa bala Gotena iwanane ateane tekeko, bala tandaka neane okonemane Gotena pii wato minu atene mana oko meaipia.

9-10 Goteto Jisasa mo kuai wete laya alu, bala lamawuato, wamba akali Meleki-seteke bala pitisa akali atoto, piape okone pua ateane pua teke, nimbapi pitisa akali atoto, piape okone pua atolopele leaipia. Goteto wuane lea-kola, Jisasa bala wandakali molo-peke lolane akali oko atoto, balana pii wato minalaini wandakali tupa pitaka saka atapowa atolane tene oko guleaipia.

11 Wamba Meleki-seteke bala pitisa akali kawane ateane wuane pua teke, Jisasa balatopi pitisa akali kawane atoto, piape pua atalane okonena, nanimato mana kambua yakama langulane eya tekeko, yakamato wamba ini kapoyale mana mia na-piyaini. Tene okonena, nanimato pii mana utupane pitaka yakama languyale, pitete wete eyama.

12 Yakama Kitisene gulalu ateai-kola, mali kambua pea-ko. Andipa yakamatopi Kitisene mana lamaiyane tisa atape-pene tekeko, yakama tane-mane mana kuai lo mia napene mee atalaini. Tene okonena, wamba bulupane yakama Kitisene guloyale atoto, pii mana meaini utupane wandakali mindimane dee lapone teke yakama mana langulu-peke lape-pene guleya-ko. Yakama tomo keato mindi nanape-pene. Jia. Yakama andu ipane nolo-peke lape-pene ateyai. * 1Ko 3:1-4

13 Anu peakale nambato wuane leyope. Jisasato wandakali nanima mo kuai laya yane lo nembo natalane wandakali okone bala andopane kambolo atoto, andu no atene atalane. 14 Akali mindimane pii mana lamalua-kola, Kitisene mindimane balana pii okone ale wato, akali okonemane pii kuai lo langeya, kopeta langeya nembo talane akali okone bala Kitisene wandakali tai mindi atoto, tomo keato no atene atalane.