11
Ama Lamtua Allah mee-baah at dua man muun isi ngas
1 Hidi kon oen doong bel auk kai hnukat mesa, man blatas sa el hnikan na. Kon Ama Lamtua Allah prenta auk noan, “Yuhanis, ku haung tia, le laok sukat Auk Um in Kohe-kanas Tene ka, nol un mija in tunu-dadung man ne kota Yerusalem ma. Nol kaih totoang atuil man in kohe-kanas ne aa ngas.✡ Yeskial 40:3; Sakarias 2:1-2 2 Mo sukat Um in Kohe-kanas sa kintal la deken tia, ta maan na sao son bel bangsa-bangsa didang, man taan Auk lo ngas. Mam oen maas kida, le tao hmomos auk kota la, didiin bulan 42, (nas lelo 1.260).✡ Lukas 21:24 3 Mam Auk nutus Auk atulin at dua se na, le oen daid Auk mee-baha. Mam oen pake kitu-kaod dael ili, nol aa deng Au, didiin leol 1.260 nas hidis.”
4 Ama Lamtua Allah mee-baah Sakarias sa, dul meman son deng mee-baah dua nias lolo hmunan nua. Oen banansila el kai saitun ina dua, nol maan in todo hadut dua, dil saol lakos bus el Ama Lamtua Allah. Lamtua Allah nam, totoang atuil in ne apan-kloma ki ngias Lahin.✡ Sakarias 4:3, 11-14 5 Eta muik atuli in le tao dadaat saol Ama Lamtua Allah mee-baah dua nias sam, mam ai puit deng oen bahan nas le tuun hnining oen musu las totoang. Nini ela lam, totoang atuil man le tao sus one ngas, taon elola ko mates hidi. 6 Dedeng oen duas daid mee-baah taung Ama Lamtua se apan-kloma kia ka, Un beles kuasa le tukan ulan na. Un kon beles kuasa le tao ui mata ngas daid dala, nol kuasa le kil in daat bili-ngala se apan-kloma kia, muding oen in koma ka.✡ Lahi-lahi las Buk laih hmunan na 17:1; Dehet in Puit deng Dale Mesir 7:17-19; Samuel mesa la 4:8
7 Eta oen oras in tek deng Ama Lamtua in teka-teka ngas mana le hidi son nam, mam muik hmukit in tao tele dadahut mes puti maa, deng bolo in susa-daat, man muik in pesa lo ka. Un hote-dait labang oen duas, didiin un tao tehen one nol keo teles.✡ Danial 7:7; Apan-kloma Hnika Balu 13:5-7; 17:8; Danial 7:21 8-9 Nini ela lam, oen duas mates se kota tene, man hmunan nu atuli las keo oen Lamtuan na se kai sangsuli dapa ka. Ta kota na, daid daat banansila el Sodom nol Mesir se dedeng hmunan nua ka. Mam atuli las pasang soleng mee-baah nas nitun nas se lalan, le nang se na didiin lelo tiul tailuang. Hidim atuil deng totoang bangsa-bangsa lias, ngala-ngala lias, nol dasi-dasi lias, maas le lingut niut dua nas. Oen kon bel dola le puan lo,✡ Yesaya 1:9-10 10 undeng oen dalen kolo in tinang atuil at dua nas in mate ka. Lole taom oen duas man tao didaa totoang atuil in se apan-kloma ki ngias in nangan na. Tiata oen leo-leo tao fesat, le tunang bel apa sa-saa.
11 Mo hidi lelo tiul tailuang ngam, Ama Lamtua Allah beles duas hngasa le oen duas nulis pait. Totoang atuil in net oen duas sas pepeten undeng lii.✡ Yeskial 37:10 12 Hidim mee-baah dua nas ming fala mes muun deng apan nua, man tadu oen noan, “Hoe! Mi duam saek maam se ni tia!” Kon oen duas saek lakos apan nua, le nopen kabut one. Ngat net ela kon, oen musu las langan tukun.✡ Lahi-lahi las Buk nomer dua la 2:11 13 Nahkitu lam, muik lul-beko muun isi. Eta kit kaih totoang um in se kota la ngas sam, deng uma hngulu lam, mes lea. Nol muik atuli lihu iut mates. Atuil didang man maet lo ngas, lii ana lo. Mo mam oen kon todan Ama Lamtua Allah, undeng Un man kil bandu se sorga.✡ Apan-kloma Hnika Balu 6:12; 16:18
14 Nini ela lam, in daat nomer dua la kuhit son. Mo doha lo! Ta in daat nomer tilu la, le maa lolen.
Huu kliung nomer itu la — Ama Lamtua Allah nol Yesus Kristus kil bandu se apan-kloma kia
15 Hidi nam, Ama Lamtua ima-ii deng sorga nomer itu la huu un klingu la. Nahkitu lam, auk ming fala mamo-mamo maas deng sorgas, le tek noan,
“Halas ni in kil bandu se apan-kloma kia ka,
suma Ama Lamtua Allah nol Kristus,✡ Dehet in Puit deng Dale Mesir 15:18; Danial 2:44; 7:14, 27
Un nam Lamtua Allah Atulin man Un hulin meman son deng hmunan nua ka.
Ama Lamtua Allah nam Lahi, man kil bandu napiut didiin hidi nutus lo.”
16 Tulu at buk dua beas aat man daad se dela-del in prenta, man saol nol Ama Lamtua Allah sila ka ngas kon, ming faal nas. Kon oen senet le hai bukun nas didiin silan nas lako huud se dale, nol naka-naka Ama Lamtua Allah, 17 noan,
“Ee Lamtua Allah!
Kaim Lamtuan na!
Kaim Allahn!
Lamtua man prenta totoang.
Lamtua man kuasa totoang.
Lamtua man muik lolo hmunan nua.
Lamtua man muik hahalas nia.
Kaim nodan mamo se Lamtua,
undeng Lamtua pake Un kuasa man muun isi ka,
le kil bandu se apan-kloma kia.
18 Mo bangsa-bangsa las komali,
lole oen dai muid Ama Lamtua lo.
Mo halas ni Ama Lamtua kon komali,
undeng oen dai taan Un lo.
Halas ni oras sa maa lius son,
le Ama Lamtua hukung atuil man dai toe muid Un lo ngas.
Halas ni oras sa maa lius son,
le Ama Lamtua tao dudus atuil man tao dudus atuil didang ngas.
Halas ni oras sa maa lius son,
le Ama Lamtua keket-ketan atuil in mate ngas dasi las.
Halas ni oras sa maa lius son,
le Ama Lamtua balas Un ata kas in susa-kae ka.
Nas Ama Lamtua mee-baha las,
nol Ama Lamtua atulin nas,
tuan-ana, muda-blalan.
Lamtua balas bel totoang,
atuil man in todan Ama Lamtua ngala ka ngas.”✡ Buk in Naka-nahalit 2:5; 110:5; 115:13
19 Hidi nam, auk ngat net se sorga, Ama Lamtua Um in Kohe-kanas sa hnitan na holsai. Kon auk ngat net kaban, man hmunan nu oen pake le pesang Ama Lamtua Allah prenta in dulas se batu ngas. Kon bisain dait lako-pait. Lelat ulan dukun tene tupang apa, nol apan-kloma ki kon heheko, hidim ulan es el baut ngele naih deng apan nua.✡ Apan-kloma Hnika Balu 8:5; 16:18; 16:21
✡11:1 Yeskial 40:3; Sakarias 2:1-2
✡11:4 Sakarias 4:3, 11-14
✡11:6 Lahi-lahi las Buk laih hmunan na 17:1; Dehet in Puit deng Dale Mesir 7:17-19; Samuel mesa la 4:8
✡11:7 Danial 7:7; Apan-kloma Hnika Balu 13:5-7; 17:8; Danial 7:21
✡11:8-9 Yesaya 1:9-10
✡11:11 Yeskial 37:10
✡11:12 Lahi-lahi las Buk nomer dua la 2:11
✡11:13 Apan-kloma Hnika Balu 6:12; 16:18
✡11:15 Dehet in Puit deng Dale Mesir 15:18; Danial 2:44; 7:14, 27
✡11:18 Buk in Naka-nahalit 2:5; 110:5; 115:13
✡11:19 Apan-kloma Hnika Balu 8:5; 16:18; 16:21