1 Guna nuwonúwana tuwaina alatuwokoimi, segowo. Ida spwagógana Tomoya taiyao pasina kouyāwana! Ame dogoiyadi boi alatuwokoimi go, ame aginimneidi manumi geya ilausiguta. Moe komi ami vabodaboda manuna.

2 Ami dodōkana kidi weiniya‡a Weiniya: Kidi Diyuu idi nuwonúwana goi Totuyoyowo moe weiniya nakae unana weiniya tayamo yoguyogu baailina kidi Diyuu yaidi. baailidi nakae. Amo tauyadi toguinuwa goyogoyoidi be nakae sakava ana tokupwana goyogoyo.‡b Sakava ana tokupwana goyogoyo: Ame tauyadi Diyuu nakona Yeisu bogina sinumise go, sigéona bego kidi Totuyoyowo itoboinedi sakavaidi sikupoidi Diyuu nakae. Tauna Yeisu ana tonumisayao Totuyoyowo sitamyabidi bego sakavaidi sikupoidi. Ame tauyadi sinuwonúwana sakava ana kúpwana goi tomota itoboinedi Yeisu ina bodao goi sikaaiyaka go, sibágala. Ameko Paulo tupwana ivaponuponuyedi. Ava koroto neta kusina o powona buugoyaidi, geya itoboineyeta itapwaroro. Tauna ame tauyadi Totuyoyowo geya sivaitedita Yeisu ina bodao sisiukoidi geya. Latuwodi sakavaimi sikupoidi nakae Yaubada ina Katukeda idige bego komi Yaubada ina bodao. 3 Moitamo. Kidi sinuwonúwana sakavaidi adi kúpwana goi kidi Yaubada ina bodao go, kita moe Yaubada ina bodao mooitamoida. Kita Baloma Kimaasabaina goi tataaimámina Yaubada yaina. Kita tauyawana gagágasa Guyau Yeisu manuna go, geya tanumiseta toinida sakavaida ina guinuwa yaina goi. 4 Go neta yau bego sakavaigu ina guinuwa anumise nakae amo tauyadi, yau magu guinuwa dedevidi itoboinegu nakae aguinuwe. Avatau neta inuwonúwana bego itoboine sakavaina ina guinuwa pasina Yaubada ivayoko ina boda, neta latuwogu, itoboinegu tauyana akalisave. 5 Guna numisayana unana ame nakae: Guna bíbina mlina maliyalina ainima aito bogina ababanedi, e sakavaigu sikupo, yau bíbina goi Isileli tubuna, guna dala Beniyamina,†a Rom 11:1. yau tokanaiberiu tayamo,‡ Tokanaiberiu tayamo: Kidi Diyuu niyadi yoina Iberiu. Aiyuwoina Iberiu moe Diyuu youyuwoidi. Ameko Paulo ilatuwokoidi ina sinapu madabokina o yawoina ana madabokina moe Iberiu nakae unana tauyana itoboine ikanaiberiu. Diyuu neta Isileli sinaena sikaaiyaka nakona sikanaiiberiu go, Diyuu asa liliudi goi sikaaiyaka nakona sikanaagiriki. yau Parisi,†b Gui 23:6, 26:5. tauna Yaubada ina Katukeda akibobosi. 6 Yaubada ina Katukedayana manuna magu salau apoisógana. Nakae apoikíkina bego Yeisu ana totugugunayao amtulidi!† Gui 8:3, 22:4, 26:9-11. Yaubada ina Katukedayana ana lovina adi kibóbwata manuna yau geya guna pikwanamo. Nakona konuwonúwana amo guinuwayadi dedevidi go, geya. 7 Go sem boi mainao anuwonúwana bego ame guinuwayadi sowogu be guna dedevina ababane go, ame tuta anuwonúwana guinuwayadi geya basabasaidimo Guyau pasina. Go geya kada guinuwayadi kaka geya basabasaidimo yaigu geya, 8 go sem anuwonúwana kaga liliuuna geya basabasaidimo yaigu unana neta ida Tomoya Guyau Yeisu ayagoi, moe bei dogoiyadi ikalisavedi. Tauyana pasina kaga liliuna akalavedi be nakae avayokoidi tomota mosamosaidi nakae bego itoboinegu Guyau akabi 9 o tadigo kada, ‘Yaubada bei idovatusigu, e igitegu yau spwagoogonigu Guyauyana taiyao.’ Ame nakae: Yau kiboobosigu Yaubada nuwona goi geya kada ina Katukeda ana kabikáwana pasina geya, go sem moe Guyau ina guinuwa aba numisa pasina. Yau kiboobosigu unana Tauyana ivayokoigu nakae guna numisa pasina. 10 E yau Guyau goi akaaiyaka, e bei Tauyana ayagoidoko ame nakae: Ina togaga yawoigu goi aalotowo; togagayana moe nakae Yaubada ina togaga goi Yeisu ikaitáoe. Aiyuwoina latuwogu ina gedageda asiuko bei ina kámasa goi atapate, 11 e bei nakona itoboine yau nakae tokámasa yaidi goi Yaubada ikaitaoegu.

12 Geya kada moe bogina ayoisi geya o geya kada guna paisewa bogina alukavavedoko baige akámasa geya, go sem yau nava aatokuma bego itoboinegu guna taoyamna ayoisi. Moe manuna Guyau Yeisu bogina iyoisigu. 13 Segowo, yau geya anuwonuwoneta bego moe bogina ayoisi go, tayamo dogoi aguuinuwe moe kaga liliuna mligu goi anuwoilavedi go, tovavalákuna nakae kaga matagu goi akaanakova bei ayoisi. 14 Magu tokuma alokoina aseivata ana alaitúwana goi bei guna vaiwówana akabi. Vaiwowanayana moe Yaubada iduduwegu yábana yawoinina manuna guna spwagógana Guyau Yeisu taiyao pasina.

15 Tauna liliuda yaida avatauwa neta bogina numisa goi tamatuwo, ame guna nuwonuwanayana nuwoda goi tayoisiikavāte. Ego avatauwa komi neta ituli ta nuwonúwana nuwomi goi koyoisiikavate, e Yaubada nakae bei nuwonúwana mooitamoina ikaiwoduwe yaimi. 16 Go dogoi gagaina moe taaketōiya nakonakae Yaubada bogina ikaiwoduwe yaida.

17 Madabokimi taiyao, segowo, yau imi kaba gita kovatotowonēgu† 1Ko 4:16, 11:1; Pil 4:9; 1Tk 1:6; 2Tk 3:7,9. be nakae avatauwa neta ama tapata goi siiketoiya, e tauyadi kodumakavatēdi bego kovatotowonēdi. 18 Bogina koyagoi. Boi tuta badabadaina bogina alatuuwokoimi go, ame tuta magu táiya nakae alatuwokomneimi maniyedi tonumisa polapola yaimi sikaaiyaka; tauyadi Guyau ana kerose ana kaleyayao idi ketoiya goyogoyo pasina. 19 Tauyadi yawoidi ana kaba lukavava moe bei sivailai vata. Idi yaubada moe toinidi idi vikaiya. Idi guinuwa aba omayamaya moe idi kaba taimámina. Nuwodi goi poyapoya sinapuna siyoisiikavate. 20 Taabu kovatotoowonēdi. Bogina koyagoi. Kita yábana tomotaida,‡ Yábana tomotaida: Paulo ina nuwonúwana ame nakae: Amo tutayana Sisa Roma goi latuwona tomota silokasa ituli ta kasa goi bei da Roma idi sinapu sivatotowone be nakae tomota sivatulukoidi. Tauna kita yábana goi geya tabibineta go, tuwo kita yábana tomotaida itoboineda ida sinapu nakae Yaubada be nakae yábana ana tokaiyakoyao bei tomota tavatulukoidi. e mada uyáwana ada Toyava tatuuyaosi bei maeko goi ima; Tauyana ida Tomoya Yeisu Guyau. 21 Tauyana ina togaga goi itoboine bei kaga liliuna ivasobusobuyedi. Tauna moe togagayana goi wowoda neenetaidi bei ikaigaviledi, e bei wowodayadi moe Tauyana ina taoyamna wowonina nakae.