5
Yeisu ina vatulúkwana koya goi:
Tomota adi dedevina manuna
Tomota adi dedevina manuna
(Luke 6:20-23)
1 E bodayadi Yeisu igitedi, tuwo ituko ina koya goi itusobu go, ina tovatotowanayao mlina goi sima. 2 Sima, ivatowo ivatulukoidi, idigo kana,
3 ‘Avatauwa komi balomaimi goi kootokai,
e komi Yaubada ina bodayauwo bei ikalibubumi,
tauna ami dedevina bogina koobabane.
4 Avatauwa komi mami kategeda,
e Yaubada bei ikipaiwolemi,† Ais 61:2.
tauna ami dedevina bogina koobabane.
5 Avatauwa komi sakuululumi,
e Yaubada poyapoya ame ana madabokina
bei ivinimi imi kaba lovina,† Sam 37:11.
tauna ami dedevina bogina koobabane.
6 Avatauwa komi balomaimi siikaloga
nakae maemi siyapayápasa
Yaubada ina kivavasa manuna,
e Yaubada bei ivauyaonemi,† Ais 55:1-2.
tauna ami dedevina bogina koobabane.
7 Avatauwa komi neta tonuwokapisi,
e Yaubada bei inuwokapisiyemi,
tauna ami dedevina bogina koobabane.
8 Avatauwa komi neta nuwomi maavadaidi,
e Yaubada bei kogite.† Sam 24:3-4.
Tauna ami dedevina bogina koobabane.
9 Avatauwa komi neta tomota adi tovagudagúdala,
e Yaubada bei ivayokoimi kina natunao.
Tauna ami dedevina bogina koobabane.
10 Avatauwa komi neta tomota sivakaleyemi
imi kibóbwata pasina,
e komi Yaubada ina bodayauwo bei ikalibubumi.† 1Pi 3:14.
Tauna ami dedevina bogina koobabane.
11 Tutayana tomota sikaogoyoemi, siyogedegedemi, o idi pola goi siwowokoimi imi numisa yau yaigu pasina,† 1Pi 4:14. e ami dedevina bogina koobabane. 12 Tutayana nakae siguuinuwe yaimi, komi ami vaiwówana yábana goi bei gagaina. Tubumiyao boi nimatu idi sinapu nakae. Yaubada ina tokabivalavala siyogedegededi go, kidi tokabivalavalayadi adi vaiwówana dedevina sibabane.† 2Te 36:16; Gui 7:52. E komi nakae bei koobabane. Tauna kouyāwana gagaina.’
Yeisu ina vatulúkwana koya goi:
Yaubada ina bodayauwo soroti be mavada nakae
Yaubada ina bodayauwo soroti be mavada nakae
(Maki 9:50; Luke 14:34-35)
13 Tuwaina Yeisu kana,
‘Komi da poyapoya adi soroti‡ Soroti: Ame livalakaibala go, ana yagoina geya imavadeta. Tayamo ana yagoina nakona Yeisu ina tonumisayao da poyapoya sowodi. Aiyuwoina Yeisu ina tonumisayao da poyapoya adi dedevina manuna nakae soroti awoinu ana káika ivaite. Aitonina ana yagoina nakona nanamsa. Yeisu ina tonumisayao goi da poyapoya Yaubada ina nanamsa sibabane. nakae. Go neta sorotiyana ina togaga bogina ikavava, manakaena idedevinamna? Geya ae? Geya basabasainamo dogoi liliudi manudi. Tuwo kolaveyāmo moetala goi tomota sivakavate.
14 Komi da poyapoya adi mavada nakae,† Iyo 8:12, 9:5. tauna tomota itoboinedi sigitemi. Asa tayamo koya yatana goi ikaaiyaka nakae. Geya itoboinemita bei asayana kovamou. 15 Nakae geya vatau tayaamo ina rampa igabu go, bayao goi ivatum,† Mak 4:21; Luk 8:16, 11:33. go sem ikabi rampa ana kaba yata yatana iyato, e bei vada sinaena itapasigi tomota liliudi adi mavada. 16 Komi nakae. Imi mavada kokaiwoduwēdi sininínima tomota matadi goi bei imi guinuwa dedevidi sigitedi, e Tamada guma yábana ina togaga ana káeyana bei sikamoitamoe.’† 1Pi 2:12.
Yeisu ina vatulúkwana koya goi:
Yeisu tokabivalavala idi livala adi kaba kamoitamo
Yeisu tokabivalavala idi livala adi kaba kamoitamo
17 Tuwaina Yeisu kana,
‘Taabu konuwonūwana bego yau ama Yaubada ina Katukeda o Yaubada ina tokabivalavalayao idi vatulúkwana atauwedi. Geya kada ama bego atauwedi geya, go sem yau ama bei kaga liliuna boi sitalavaaitedi yaimi, yau goi simalatomota. 18 U ame pasina ama go, ame alatuuwokoimi konōve: Yaubada ina Katukedayana goi geya tayaamo kaga giyaina bei itagau ana kadókana yábana be poyapoya sitagau be nakae ana kadókana kaga liliuna Atukedayana goi simalatomota dókana.† Luk 16:17. 19 Tauna avatau neta lovina tayamo giyaina Yaubada ina Katukeda goi ikapipilave be nakae tomota ivatulukoidi nakae siguuinuwe, e Yaubada ina kalibúbuna goi bei ivayoko tauyana toosobuna. Go avatau neta lovinayadi Yaubada ina Katukeda goi be tokabivalavala idi gínina goi ikabikaonedi be nakae tomota ivatulukoidi sikabikaonedi, Yaubada ina kalibúbuna goi bei ivayoko tauyana toolagaina. 20 Moitamo. Ame alatuuwokoimi konōve: Itoboine imi kibóbwata Yaubada ina Katukeda ana tovatulukwanayao be nakae Parisi idi kibóbwata ikalisave. Go geya, e Yaubada ina bodayauwo geya kosiiukoidi bego ikalibubumi.’
Yeisu ina vatulúkwana koya goi:
Egamogamogu be abivekoveko manudi
Egamogamogu be abivekoveko manudi
21 Tuwaina Yeisu kana,
‘Komi bogina koyagoi bego tubudao adi lovina Yaubada ivinidi kana,
“Taabu kokaaumāta.”
Tateta 20:13; Atukeda 5:17
Tuwo avatau neta ikaumata, Yaubada ina liuna bei ibabane.† Atu 16:18. 22 Go ame yau alatuuwokoimi konōve: Lovinayana ana yagoina toina ame nakae: Avatau neta siyana iegamogamoguye, e Yaubada ina liuna bei ibabane. Avatau neta siyana ilatuwoko kana, “Dabam ipatu”, kotu bei ibabane. Avatau neta siyana ilatuwoko kana, “Kom kuyaluwo”, asagabugabu bei ibabane.
23 E tauna neta imi vininabeso komedi aba kasala goi bego kokasaledi Yaubada yaina go, siyami ina egamogamogu yaimi goi konuwopeye, 24 e amoko aba kasalayana goi imi vininabeso koyatōidi go, kōna konūwala siyami yaina namliyeta baige kokaluvīla kōma imi vininabesoyadi kokasalēdi Yaubada yaina.
25 Tutayana imi kaleya taiyao kononoina kotu ana totakínona manuna, woilīmi imi bágala kokitotomōi, govila bei tauyana inavemi kotu ana totakínona yaina. Ago totakinonayana bei ina tovaita ilatuwoko ikabimi, deri goi ivaisiumi. 26 U, moe bei isowóduwo go, ame alatuuwokoimi konōve: Amoko goi geya koosowóduwo ana kadókana imi rowaga madabokiina koyotuli.’
Yeisu ina vatulúkwana koya goi:
Roerata manuna
Roerata manuna
27 Tuwaina Yeisu kana,
‘Lovina tayamo bogina koyagoi kana,
“Taabu korooerāta.”
Tateta 20:14; Atukeda 5:18
28 Go ame yau alatuuwokoimi konōve: Lovinayana ana yagoina toina ame nakae: Avatau neta vavina imatakililiyeyamo, bogina nuwona goi iroerata. 29 E ava mátana ami píkwana ana toyomátula, nakona matakakataimi, e kokipōsi, kokalāve. Neta talaimi tayamo itagau, moe dedevina go, neta matami aiyuwo adi goyo pasidi wowomi madabokina silave asagabugabu goi sikaiyako vata, e moe igoyo toina.† Mad 18:9; Mak 9:47. 30 Ava nímana ami píkwana ana toyomátula, nakona nimakakataimi, e kokūpo kokalāve. Neta nimami tayamo itagau, moe dedevina go, neta nimami aiyuwo adi goyo pasidi wowomi ana madabokina silave asagabugabu goi sikaiyako vata, moe igoyo toina.’† Mad 18:8; Mak 9:43.
Yeisu ina vatulúkwana koya goi: Vaisobu manuna
(Madiu 19:9; Maki 10:11-12; Luke 16:18)
31 Tuwaina Yeisu kana,
‘E lovina tayamo bogina koyagoi kana,
“Ava koroto neta monena ivaisobuye, pwepwa goi ana katae italavāite monenayana yaina.”† Mak 10:4.
Atukeda 24:1
32 o ame yau alatuuwokoimi konōve: Lovinayana ana yagoina toina ame nakae: Ava koroto neta monena geya iroerateta go, ivaisobuyebeso, e ina vaisobubesoyana pasina monena iroerata. Ava koroto neta vavina vaaisobuna inai, bogina iroerata.’† 1Ko 7:10-11.
Yeisu ina vatulúkwana koya goi:
Bóbwara moitamo manuna
Bóbwara moitamo manuna
33 Tuwaina Yeisu kana,
‘Aiyuwoina tubudao idi lovina boi Yaubada ivinidi bogina koyagoi, kana,
“Taabu nimami kokatulagata polapōla, go sem imi katótula Yauwe yaina koguinuwēdi.”† Yoy 30:2; Atu 23:21.
Vininabeso 19:12
34 Go ame yau alatuuwokoimi konōve: Lovinayana ana yagoina toina ame nakae: Nimami taabu kokatulaagasīdi. Geya kada tayaamo kaga itoboinemi kovatoi bego imi livala ana kamoitamo manuna unana kaga liliuna Yaubada ina kaba lovina. Neta yábana kovatoi, geya itoboineyeta unana moe Yaubada kebana esaaesaina.† Ais 66:1; Mad 23:22. 35 Neta poyapoya kovatoi, geya itoboineyeta unana ame Yaubada aena ana kaba yata.†a Sam 48:2; Ais 66:1. Neta Yerusalema kovatoi, geya itoboineyeta unana amo Tokalibúbuna Toolagaina ina kasa.†b Sam 48:2. 36 Neta toinimi dabami kovatoi, geya itoboineyeta unana moe Yaubada ina kaba lovina. Komi geya kolovineta neta kokawou o kunumi sikalakoiwo. 37 E kobōbwara moitamo tuta liliuna. Imi bobwarayana goi kami, “Moitamo.” O kami, “Geya.” Ame tauna. Go neta tuwaina, e moe Togoyoinayana goi ima.’† Yem 5:12.
Yeisu ina vatulúkwana koya goi:
Tomota idi goyo adi katumapu manuna
Tomota idi goyo adi katumapu manuna
(Luke 6:29-30)
38 Tuwaina Yeisu kana,
‘Lovina tayamo bogina koyagoi, kana,
“Avatau neta siyana matana ikaigoyai, e tobugoyoyana matana kokaigoyāi. Neta salana, e salana.”† Vin 24:20; Atu 19:21.
Tateta 21:24
39 Go ame yau alatuuwokoimi konōve: Lovinayana ana yagoina toina ame nakae: Toogoyoidi taabu kokatuumapūdi, go sem avatauwa neta padipadimi kakataimi sikailavako,‡ Padipadimi kakataimi sikailavako: Kidi idi sinapu ame nakae: Avatau neta padipadimi kakataimi ikailavako nimana goi moe nakae aba omayamaya. e padipadimi kekelimi kotagōne nakae sikailavako. 40 Avatauwa neta siekotuyemi bei ami kwama sikabidi, kovinīdi go, ami tanigo nakae kotagōne taiyao sikabidi. 41 Ava tovayaviya neta ilovinaemi konana kokavale kona asa tayamo goi, e nakae koguinūwe go, kotagōna kokavale kona asa aiyuwoina goi. 42 Avatauwa neta sikawanoiyemi, e kovinīdi. Nakae avatauwa neta latuwodi bego konami sikatoguye, taabu kovaagagāle.’† Atu 15:8.
Yeisu ina vatulúkwana koya goi:
Ida kaleyayao adi matakoi manuna
Ida kaleyayao adi matakoi manuna
(Luke 6:27-28,32-36)
43 Tuwaina Yeisu kana,
‘Lovina tayamo bogina kooyagoi, lovinayana kana, “Siyami komataakoīye”† Vin 19:18; Mad 19:19, 22:39; Mak 12:31,33; Luk 10:27; Rom 13:9; Gal 5:14; Ibe 13:1; Yem 2:8. go, imi kaleya kokaolilīve. 44 Go ame yau alatuuwokoimi konōve: Lovinayana ana yagoina toina ame nakae: Imi kaleyayao siyogedeegedemi komatakoiyēdi be nakae manudi kokawanōi 45 bego komi Tamada guma yábana natunao, e imi sinapu nakae Tauyana ina sinapu. Yaubada tomota liliuda imatakoiyeda. Nakae iilovina níyala ituko bei toogoyoidi be nakae todedevidi itapasigidi. Aiyuwoina kúwana iietune ima tokibóbwata be nakae tokapipilova manudi. Tauna komi nakae imi kaleyayao komatakoiyēdi. 46 Neta tomota simatakooiyemi go, tomotayadi aditava komatakooiyedi, ava vaiwówana bei kobabane? Geya. Moe sinapuyana kidi takisi adi togogo idi sinapu nakae ae? 47 Nakae neta semiyao aditava kokaodedevinedi kami, “Yaubada komi taiyao”, e komi imi sinapu tomota liliudi nakae. Moe kidi Totuyoyowo idi sinapu nakae!
48 Tauna komi bei imi sinapu madabokina goi komatūwo, Tamada guma yábana nakae.’† Vin 19:2; Atu 18:13.
†5:4 Ais 61:2.
†5:5 Sam 37:11.
†5:6 Ais 55:1-2.
†5:8 Sam 24:3-4.
‡5:13 Soroti: Ame livalakaibala go, ana yagoina geya imavadeta. Tayamo ana yagoina nakona Yeisu ina tonumisayao da poyapoya sowodi. Aiyuwoina Yeisu ina tonumisayao da poyapoya adi dedevina manuna nakae soroti awoinu ana káika ivaite. Aitonina ana yagoina nakona nanamsa. Yeisu ina tonumisayao goi da poyapoya Yaubada ina nanamsa sibabane.
†5:15 Mak 4:21; Luk 8:16, 11:33.
†5:21 Atu 16:18.
†5:33 Yoy 30:2; Atu 23:21.
†a5:35 Sam 48:2; Ais 66:1.
†b5:35 Sam 48:2.
†5:38 Vin 24:20; Atu 19:21.
‡5:39 Padipadimi kakataimi sikailavako: Kidi idi sinapu ame nakae: Avatau neta padipadimi kakataimi ikailavako nimana goi moe nakae aba omayamaya.
†5:42 Atu 15:8.
†5:43 Vin 19:18; Mad 19:19, 22:39; Mak 12:31,33; Luk 10:27; Rom 13:9; Gal 5:14; Ibe 13:1; Yem 2:8.
†5:48 Vin 19:2; Atu 18:13.