Yeisu ina paisewa Tonúwala Toolagaidi liliudi
idi paisewa idedevinasavedi
idi paisewa idedevinasavedi
8
(Iberiu 8:1—10:18)
Yeisu ina paisewa núwala goi
anasiuna vau dedevina toina iguinuwe
anasiuna vau dedevina toina iguinuwe
1 E guna bóbwara ana masi ame nakae: Kita mada Tonúwala Toolagaina; Tauyana moe Yeisu. Tauyana aba wowoina Tokanayatanatoina kebana esaaesaina kakataina yábana goi iitusobu.† Sam 110:1. 2 Tauyana Yaubada ana katumapu Bateta Kimaasabaina Yaubada ina Kaba Kaiyaka toina sinaena goi ipaaisewa. Aba Kaiyakoyana yábana goi ikaaiyaka, tauna tomota geya siyowoeta, go sem Tomoya iyowo. 3 Moitamo Tauyana Bateta Kimaasabaina goi ipaaisewa. Tonúwala Toolagaidi tamo tamo poyapoya ame goi Yaubada ivayokoidi bei idi kauyagu ana yabobona be nakae vininabeso yoguyogu sikasaledi Tauyana yaina. Moe pasina tauna Yeisu ida Tonúwala Tolagainayana nakae itoboine vininabeso tayamo ikasale Yaubada yaina. 4 Tauna neta Yeisu poyapoya ame goi ikaaiyaka, geya itoboineyeta bei ietonúwala unana Tonúwala bogina sikaaiyaka, vininabeso sikaasaledi Yaubada yaina nakae ina Katukeda goi boi bogina idige nakae. 5 Aba Kaiyakoyana poyapoya ame goi sitaaimámina moe Yaubada ina Kaba Kaiyaka yábana goi ana tapata o kada, ‘Makayauna.’ Moe pasina boi tutayana Mosese giyakainava Yaubada ina Kaba Kaiyaka ivatowo imadagi, Yaubada ikatusinapu idigo kana,
‘Mosese, am dodōkana bei kaga liliuna boi mainao koya goi bogina avatulukoim, e nakae kutapatēdi.’
Tateta 25:40
6 E ame tuta kita ida Tonúwala Toolagaina moe Guyau. Go ina paisewa Yaubada ivini moe tonuwalayadi idi paisewa idedevinasavedi unana Tauyana Yaubada ana katumapu, e ina guinuwa goi Yaubada ikanasiunamna kita taiyao. Go moe anasiuna vauyana anasiuna bogo idedevinasave. Atótula dedevidi goi toinina ilovina anasiuna vau manuna. Anasiuna vauyana unana moe atótula dedevidi, nakae anasiuna bogo ana katótula sidedevinasavedi. 7 Neta gimikanasiunayana geya ana goyomo, anasiuna vau geya iguinuweyeta ae? 8 Ame moitamo. Boi nimatu Yaubada Isileli tubunao igitedi idi sinapu igoyo, tauna ina livala ina tokabivalavala Yeremaya italavaite idigo kana,
‘Yauwe idigo kana,
“Gwa! Tuta imamaima
bei anasiuna vau aguinuwe Isileli tubunao yaidi goi
be nakae Yuda tubunao yaidi goi.”
9 Tuwaina Yauwe kana,
“Go guna kanasiuna vauyana
geya nakae boi akanasíuna tubudiyao yaidi
tutayana nimadi akabidi
avakededi Itipita goi sisowóduwo geya;
unana amo anasiunayana geya siyoisikavateyeta,
tauna akataedi.”
10 Yauwe tuwaina kana,
“Bego amo tutayana akanasíuna
Isileli tubunao yaidi goi ame nakae:
Bei nuwodi goi guna lovina ayatoidi
nakae kidi atedi goi aginidi,
tuwo bei yau kidi idi Yaubada go,
kidi yau guna bodao.
11-12 Tuwo idi guinuwa goyogoyoidi bei anuwotaoidi
nakae idi goyo geya anuwokaavatedi.
Tauna tomota liliudi,
tauyadi maa yoidi gagaidi nakae tauyadi you tagau,
bei siyagoigu.
Tauna geya vatau tayaamo itoboine
semiyao o osemiyao bei ivatulukoidi
idigo kana,
‘Yauwe koyagōi’,
unana bogina siyagoigu.” ’
Yeremaya 31:31-34
13 Tutayana Yaubada idigo kana, ‘Anasiuna vau bei aguinuwe’, moeko goi ina kanasiuna bogo bogina ikaibogo nakae geya basabasainamo. E anasiuna bogoyana giyakainava bogina isaosáwala.