12
Eberam ana duduwo tetelina
1 E boi Eberam nava Ura goi ikaaiyaka go, Yauwe iduduwe idigo kana,
‘Kutāoya, moe im kasayana kwalāve.
Osemowo be im bodayauwo nakae
tamam ina vada goi kwalavēdi go,
kūna asa tayamo bei avatulukoim.† Gui 7:2-3; Ibe 11:8.
2 Bei akisailim,
tubumowo boda tayamo gagaina.
Bei akaipakuyem,
tauna you gagaina avinim.
Tauna kūna bei kom aba kaipaku tomota liliudi yaidi.
3 Avatauwa neta sikaipakuyem,
e tauyadi nakae bei akaipakuyedi.
Avatauwa neta sikaosevem,
bei akatubolatedi.
Boda liliudi poyapoya ame goi
bei siyagoi kom goi akaipakuyedi.’† Abv 18:18, 22:18, 26:4-5, 28:14; Gal 3:8.
4-5 E tauna tutayana Eberam ana tala seventipaibi (75), e ina nakae Yauwe boi bogina ilatuwoko. Monena Serai be ana gómana natuna Loti be nakae konana liliudi be ina pakonayao asa Karani goi bogina ikabidi, e taiyao sitaoya, Karaniyana sikalave go, sina asa Kenani. Tutayana sisowóduwo Kenani dadavina goi, 6 e Eberam kidi sisiu sina asa Sekem goi. Amoko goi More‡ More: Ame livalayana ana yagoina moe tovatulúkwana. Nakona ame alovayana goi da Kenani sitapwaroro be nakae idi tovatulúkwana sinove. alovaina gagaina goi situnagu. Amo tutayana da Kenani asa amo goi nava sikaaiyaka. 7 E amoko goi Yauwe isowóduwo Eberam yaina idigo kana,
‘Eberam, ame asayana bei im boda avinidi.’† Gui 7:5; Gal 3:16.
Tuwo dídiya ikabidi, ikaudakodako, aba kasala imadagi Yauwe ana kaba wowoina manuna.
8 Niga Eberam kidi sitaoya, sina koya tayamo goi idi yoyou parai siyowo situnagu. Koyayana koiboga dadavina goi asa Beteli ikaaiyaka go, bomatu dadavina goi asa Ai ikaaiyaka. E amoko goi aiyuwoina Eberam dídiya ikaudakodako, aba kasala imadagi Yauwe ana kaba wowoina manuna, e Tauyana yaina isaakululu. 9 E niga sitaoya situliya sina Negevi, moe Kenani sinaena go, youya dadavina.
Eberam inonoina Itipita tetelina
10 Sikaiyaka aaa, e Kenani goi loga isowóduwo. Logayana gagaina, tauna Eberam kidi sitaoya sina Itipita goi bego sisuvadavada; loga ana kaba lukavava situyaosi. 11 Ego tutayana Itipita goi sivakakana, e monena ilatuwoko idigo kana,
‘Serai, kunōve. Kom vavina gumaboim. 12 Tutayana Itipita korotoidi sigitem, bei sinuwonúwana kadi, “Ame vavinayana Eberam monena.” Tuwo bei sikaumategu go, kom sem maa yawoim sikabim. 13 Tuwo monegu, akawanoi yaim kulatuwokōidi bego yau nium,† Abv 20:2, 26:7. e bei kom pasim guna dedevina ababane be nakae sitagonegu maa yawoigu akaaiyaka.’
14 E tuwo moitamo tutayana Itipita goi sisiu, Itipita korotoidi sikandobala Serai sigite idi nuwonúwana kadi,
‘Amo vavinayana gumaboina toina.’
15 E Pero ina topaisewayao adi tovakumgoyao maniyedi sikandobala Serai sigite, tuwo sina Pero silatuwoko sidigo kadi,
‘Ima tomoya, vavina tayamo kagite, tauyana gumaboina toina.’
Tuwo Pero ina lovina goi sina Serai sikabi sime Pero ina vada goi. Idi nuwonúwana bego Serai moe Eberam niuna. 16 E Serai pasina Eberamyana ana dedevina ibabane. Sipi, bulumakau, ase bolamo, paakonidi koroto be vevina, ase bovavina, be nakae kameri ikabidi, madabokidi Pero ivini. 17 E kina Yauwe igitedi, tuwo Pero mana bodayauwo vísiya gagaidi ivinidi Eberam monena Serai pasina. 18 E Peroyana inuwonúwana kana, ‘Ame vavinayana geya Eberam niuna geya, go sem monena!’ Tuwo Eberam iduduwe ima idigo kana,
‘Eberam, ame kaga kuguinuwe yau yaigu! Kaga unana geya kulatuwokoiguta bego Serai monem! 19 Kaga unana kam, “Serai niugu”! Kaga unana kutagona vavinayana akabi bego monegu! Tuwo. Monem kwābi kunāve!’
20 E Peroyana ina topaisewayao ilatuwokoidi idigo kana,
‘Eberam kidi konavēdi kovalilivēdi bei Itipita sikalave.’
Tuwo Eberam ma monena be nakae ma konana madabokidi asa sikalave.