Yemesa
Yemesa ina leta
Livala Aba Vaita
Leta ame Yemesa igini. Ame Yemesayana tuwowona toina moe Yeisu, sinadi tayamo. Aiyuwoina Tomoya ana totugugunayao Yerusalema goi ivakumgooiyedi.
Ame letayana nakona tala 45 o 46 sinaena goi Yemesa igini ietune ina Diyuu nuumisaidi yaidi.
Boi nimatu Isileli tubunao o tadigo kada, ‘Diyuu’, sisapa sina asa liliudi Roma ina kaba lovina sinaena goi sigala. Niga Yeisu valena sinove, maniyedi sinumise. Nakona idi numisayana pasina mou sibabanedi. Leta ame moe amo tonumisayadi adi leta.
E ame letayana goi Yemesa latuwona ivatulukoidi manakaedi bei Yeisu sisabokuliyedoko tutayana mou o aba vakakona sibabanedi.
Leta Luluna
1. Leta ana togínina be ana tokatuyaivayao 1:1
2. Imi mou kovaayokōidi aba uyáwana toina 1:2-11
3. Ami vakakona manudi taabu kokatuubaūmi 1:12-18
4. Yaubada ina livala ana totaiyakekayao mooitamoidi moe ina livalayana ana toguinuwao 1:19-27
5. Tomota adi kaigigita goi taabu kowowooinēdi 2:1-13
6. Imi guinuwa dedevidi goi imi numisa kovagiitakōe 2:14-26
7. Sopami kokabikuunuīdi 3:1-12
8. Nanamsa yábana goi ima kosabookulīye 3:13-18
9. Yaubada koononōko be nakae kokisoobuyēmi Tauyana yaina 4:1-12
10. Taabu mami gágasa kokaayomāna imi losinapu manudi 4:13-17
11. Komi toesaesa ami dodōkana imi váobuna manuna 5:1-6
12. Imi mou goi mami mesayágana ida Tomoya kotuuyaōsi 5:7-12
13. Semiyao awanoi goi kovaaitēdi be nakae tosuláiga kokaluvilemnēidi 5:13-20
1
Leta ana togínina be ana tokatuyaivayao
1 Komi Yaubada ina bodao dala yawou aiyuwo asa liliudi goi bogina kogala,
Yau Yemesa,† Mad 13:55; Mak 6:3; Gui 12:17, 15:13, 21:18; 1Ko 15:7; Gal 1:19, 2:9; Yud 1:1. ida Yaubada be ida Tomoya Yeisu Guyau idi pákwana, leta ame agini iwo yaimi.
Uyagu!
Imi mou kovaayokōidi aba uyáwana toina
2 Segowo, tutayana aba vakakona liliuudi kobaabanedi, kovaayokōidi aba uyáwana toina. 3 Bogina kooyagoi bego imi numisa ana vakakona goi mesayágana idaalaóduwo. 4 Go aramaitanayana kootagōne ikeuwo dókana sinaemi bego imi numisa goi koomatuwo be nakae imi sinapu madabokina bogina sidedevina, e geya kada tayaamo sinapu dedevina bei kokiseyeseye geya.
5 E avatauwa komi neta nanamsa kokiseeyeseye, Yaubada yaina kokaawanōi. Tauyana Tokaiguyau tomota liliuda yaida go, geya iibolagu. Tauna neta Tauyana yaina kokaawanoi, bei ivinimi. 6 Go taabu konaanayūwo, go sem mami numisa kokaawanōi. Avatauwa neta sinaanayuwo, kidi aivaya nakae neta yágira iyaosalesaledi, e sitalasa besobeso. 7 Amo tomotayadi taabu sinuuwonūwana bego tayamo dogoi Tomoya goi bei sibabane 8 unana kidi tonanayuwo; idi guinuwa madabokina goi nuwodi siwówana.
9 E komi tonumisa tookaimi kouyawana gagāgasa ame manuna: Yaubada matana goi komi toesaesa imi numisa pasina, e ikilagasimi. 10 E komi go tonumisa esaaesaimi kouyawana gagāgasa tutayana imi esaesa geya konumisedita, go sem Yaubada matana goi toinimi kokisoobuyemi unana imi esaesa bei sitagau nakae náuna keuboidi sitagau.† Ais 40:6-7; 1Pi 1:24. 11 Moitamo. Níyala ituko, ikalamadimadiya, keuboidiyadi ivayamemelidi. Tauna simémala sisou, e adi kaigigita kaausaraidi sikavava. Kidi toesaesa nakae. Nava idi esaesa manuna sipooisógana go, bei sitagau.
Ami vakakona manudi taabu kokatuubaūmi
12 Avatauwa komi neta mou goi kootogaga, e ami dedevina bogina kobabane, unana mouyadi kotogoisavedi. Tauna ami vaiwówana moe yawoimi vau bei kobabane. Moe Yaubada ikatotule kita Tauyana ana tomatakoiyao yaida. 13 Ago avatauwa komi neta vakakona koobabane, taabu kodigodīgo kami,
‘Yaubada ivakakonegu bego agoyo.’
Moitamo. Kita tomota geya itoboinedeta Yaubada tavakakone bego goyo iguinuwe. E kina go Yaubada nakae, geya ivakakonedeta bego goyo taguinuwe. 14 E kita go tamo tamo ada vakakona moe toinida ida yalagau iibiuda. 15 Niga ida yalagauyana ikéuwama, e ivenátuna, natuna moe goyo. E kina go goyoyana ibíbina, e ivenátuna ámasa.
16 Taabu tomota sikatuubaūmi, guna kaloyao. 17 Aiguyau dedevidi liliudi be nakae yabobona mooitamoidi liliudi Tamada diligaema goi sisou simamaima. Tauyana yábana mavadainao adi tomadágina. Núgana iitavívila go, Tauyana ina sinapu geya nuganayana nakae geya, go sem ina sinapu geya iitavívila. 18 Tutayana toinina ilovina, e yawoida vau ivinida tabibinamna ame nakae: Tutayana Yaubada ana Nanamsa Mooitamoina tanumise, e yawoida vauyana ivinida, bei kita ina togiminumisayao ina keuwokumgo nakae ina madágina liliudi yaidi.
Yaubada ina livala ana totaiyakekayao mooitamoidi
moe ina livalayana ana toguinuwao
moe ina livalayana ana toguinuwao
19 Guna kaloyao, neta livala ame konuuwaisi, kana,
‘Liliuda tataiyakeka dōkana be mainao tanuwonūwana baige tabóbwara go, egamogamogu tatōto.’
20 Kita tomota neta taegamogamogu, ida egamogamoguyana geya itoboineyeta bei Yaubada ina takínona vavasa ikeuwoe. 21 Tauna imi sinapu baailidi liliudi be imi goyo badabadaidi kwama bogo nakae kovalilivīdi kokalavēdi go, ma sakuululumi Yaubada ina vala atemi goi bogina iibaguli kokabiikaōne unana valayana itoboine iyaveda.
22 E Yaubada ina valayana taabu kotaiyakeekeyāmo, go sem valayana koguuinūwe. Neta kotaiyakeekeyamo, e toinimi kokatuubaumi. 23 Avatauwa neta valayana sitaiyakeekeyamo go, geya siguinuweyeta, tauyadi koroto tayamo nakae saribu goi toinina maisina ipotekavate. 24 Maisina ipotekavate ikavava, ina go, geya mgoninamo bogina inuwoilave maisinayana ana kaigigita nakonakae! 25 E Yaubada ina Katukeda mooitamoina italigeida, tauna avatauwa neta Atukedayana sigitedoko go, geya sitaiyakeekeyamo nakae geya sinuwoilaveyeta, go sem sikabiikaone, e tauyadi idi guinuwa madabokina goi adi dedevina sibabane.
26 Avatauwa neta toinidi sinuwonúwana bego kidi Yaubada ana totaimaminao mooitamoidi go, sopadi geya sikabikunuidita, go sem toinidi sikatuubaudi, e idi taimaminayana geya basabasainamo. 27 Yaubada Tamada ana taimámina maavadaina go, geya ana pikwanamo matana goi ame nakae: Gumalau be kóbuya idi kaiyakomou goi sivaaitedi go, toinidi simatakaavatedi bego poyapoya sinapuna geya ikibaibailidita.