50
Yakobo ina valiwoga tetelina
1 Tuwo Iyosepa isou tamana ivayavau, manuna itáiya be iyowoi. 2 Itáiya ikavava, itaoya ina pakonayao sakava ana tokatubayasi ilatuwokoidi idigo kana,
‘Kōna pútuma kokābi, kōme tamagu wowona kokatubayāsi ina valiwoga manuna.’
Tuwo moitamo tauyadi sima tamana Isileli wowona sikabi, sikatubayasi ina valiwoga manuna.‡ Da Itipita idi sinapu valiwoga manuna ame nakae: Geya latuwodi tokámasa wowona idáura. Tauna sikabi, sidabe. Sidabe ikavava, kaga liliuna sinaena sikabi; sileuna, ikaikaina, atena, nuwena be nuwamagina sikabidi, sikalavedi. Ago maliyalina tamo tamo wowona goi medisini o alova sisina sikikili. Ame nakae siguinuwe maliyalina ana badabada poti. Nakae siguinuwe bego tomata wowona geya idaureta. 3 Maliyalina ana badabada poti (40) goi sipaaisewa, wowonayana sikatubayasi. Bogina kuyagoi. Kidi da Itipita idi sinapu moe maliyalina ana badabada poti (40) goi wówana ana katubayasi siguuinuwe. Da Itipita madi nuwomou maliyalina ana badabada seventi (70) goi Yakobo manuna sitaiyakuwokúwala.
4 E tutayana idi taiyakuwokúwala ikavava, Iyosepa ina Pero ina tovaitayao ilatuwokoidi idigo kana,
‘Neta itoboinegu imi kanuwóiya ababane, latuwogu bego kona guna livala konave Pero goi. Livalayana kolatuwōko kami,
5 “Boi tutayana tamagu giyakainava bei ikámasa, latuwona akatótula bego Kenani goi avaliwoge.† Abv 47:29-31. Valiwogayana toinina bogina ikatubayasi. Tauna kutagonēgu ana tamagu avaliwoge. Avaliwoge ikavava, bei akaluvila.” ’
6 Tuwo moitamo sina Pero livalayana sivini, e tauyana idigo kana,
‘Kōna Iyosepa kolatuwōko kami,
“Dedevina, kūna tamam kuvaliwōge nakae boi im katótula.” ’
7 Tuwo Iyosepa ina tamana ivaliwoge. Pero ina tovakumgoyao paakonidi liliudi be koroto gagaidi be nakae da Itipita adi guyaguyauwo taiyao sina. 8 Iyosepa ina bodao liliudi, nakae senao madi bodayauwo be nakae tamana ina bodayauwo go, natudiyao be idi yoguyoguyao taudiva Goseni goi sikaaiyaka. 9 E koroto maniyedi sariyota goi sisowoya be nakae maniyedi osi goi situlaga taiyao sina. Tauna boda gagaina sina Kenani. 10 E madabokidi siketoiya. E sina asa Etada goi, moe Iyoridani kikina. Amoko goi witi ana kaba kausapisápina ikaaiyaka. Tuwo sisowóduwo, madabokidi niyadi gagaina goi sitaiyakuwokúwala. Maliyalina ainima aiyuwo kina Iyosepa ilibu tamana manuna. 11 Go da Kenani sikandobala tomota idi táiya Etada goi sigite sidigo kadi,
‘Kogīta! Da Itipita sitaiyakuwokúwala.’
Tuwo moe pasina asayana yoina Ebeli Misaraim.‡ Ebeli Misaraim: Ame youyana ana yagoina moe da Itipita idi taiyakuwokúwala. Moe Iyoridani koiboga dadavina.
12 E tuwo Yakobo natunao siguinuwe nakae tamadi idige. 13 Wowona sikavale sinave Kenani goi sivaliwoge tukubu sinaena. Tukubuyana ikaaiyaka Makipela goi, moe Mamre kikina. Tukubuyana be poyapoyayana Eberamo igimonedi Eta tubuna Epironi yaina.† Gui 7:16. 14 E Iyosepa kidi tamadi sivaliwoge ikavava, boda taiyao sikaluvilamna sina Itipita goi.
Iyosepa senao simaatoite tetelina
15 E Yakobo ina kámasa mlina, Iyosepa senao sinuwokubukubu, e sidigo kadi,
‘Nakona Iyosepa nava gamona igoyogoyo, e bei ikaoliliveda boi ida guinuwa pasina, tuwo ame tutayana bei ida goyo yaina ikatumapu. Bei manakaeda?’
16 Tuwo livala sietune ina Iyosepa yaina sidigo kadi,
‘Boi tamam nava maa yawoina lovina tayamo ivinima. 17 Tauyana idigodigo bego kalatuwokoim itoboine kai tuwowomowo ima kadoinana yaim kunuwotao. E tuwo kakawanoi kai tamam ina Yaubada ina pakonayao ima bágala yaim kunuwotao.’
Go livalayana Iyosepa inove, nuwona imou gagaina, itáiya. 18 E senao sima aedi sivatugúyala tauyana matana goi go, sidigo kadi,
‘Kai im pakonayao.’
19 Go kina Iyosepayana idigo kana,
‘Geya komatoiteguta geya. Manakae? Yau Yaubada? Geya! 20 Komi boi bego goyo koguinuwe yau yaigu go, Yaubada ina nuwonúwana bego dogoi dedevina isowóduwo. Dogoiyana moe tomota badabadaaidi ayavedi nakae bogina kogite. 21 E tauna geya komatoiteguta geya. Komi ma natumiyao bei amatakavatemi.’
Tuwo nakae ikipaiwoledi be nakae atedi ivapatupatudi.
Iyosepa ina kámasa tetelina
22 E Iyosepa Itipita goi ikaaiyaka senao taiyao. Tutayana ikámasa ana tala tayamo andedi ten (110). 23 Ego nava maa yawoina natuna Eparaim natunao be tubunao igitedi. Aiyuwoina natuna Manase natuna koroto Makiri natunao igitedi. Tutayana Makiri natunao sibíbina, Iyosepa sivini ivanatunedi.
24 E Iyosepa senao ilatuwokoidi kana,
‘Giyakainava bei akámasa go, Yaubada bei iwo ivaitemi. Tubumiyao bei ikabidi, inavedi poyapoyayana boi ikaatotule Eberamo, Aisake be Yakobo yaidi.’
25 Iyosepa ibobwaramna idigo kana,
‘Moitamo Yaubada bei iwo ivaitemi go, ame tuta kokatótula yaigu bego tutayana Yaubada ikabimi, e lulugu kokabīdi konavēdi Kenani goi kovaliwogēdi.’† Tat 13:19; Iys 24:32; Ibe 11:22.
Senaoyadi moitamo sikatótula. 26 Tuwo Iyosepa ikámasa go, ana tala tayamo andedi ten (110) bogina ibabanedi. Ina kámasa mlina, wowona sikatubayasi. Ikavava, siyato dedeoga‡ Dedeoga: Ame dedeogayana valiwoga manuna. Iyosepa wowona sidodoi namliyeta sikatukaboli ikaiyako vata. Ame da Itipita idi sinapu valiwoga manuna. sinaena go, Itipita goi ikaaiyaka.
‡50:2 Da Itipita idi sinapu valiwoga manuna ame nakae: Geya latuwodi tokámasa wowona idáura. Tauna sikabi, sidabe. Sidabe ikavava, kaga liliuna sinaena sikabi; sileuna, ikaikaina, atena, nuwena be nuwamagina sikabidi, sikalavedi. Ago maliyalina tamo tamo wowona goi medisini o alova sisina sikikili. Ame nakae siguinuwe maliyalina ana badabada poti. Nakae siguinuwe bego tomata wowona geya idaureta.
‡50:11 Ebeli Misaraim: Ame youyana ana yagoina moe da Itipita idi taiyakuwokúwala.
†50:25 Tat 13:19; Iys 24:32; Ibe 11:22.
‡50:26 Dedeoga: Ame dedeogayana valiwoga manuna. Iyosepa wowona sidodoi namliyeta sikatukaboli ikaiyako vata. Ame da Itipita idi sinapu valiwoga manuna.