33
Yauwe ina anerose tomota
ivakumgooiyedi tetelina
ivakumgooiyedi tetelina
1 E nakae Yauwe ilatuwokoigu idigo kana,
‘Kutāoya, kom be nakae tomotayadi Itipita goi kukabidi kumemedi, taiyao kōna poyapoyayana boi Eberamo be Aisake be Yakobo yaidi akatotule kagu, “Tubumiyao poyapoya bei avinidi.”† Abv 12:7, 26:3, 28:13. 2 Anerose tayamo bei aetune iwo ivakumgoiyemi. Go kidi toni poyapoya bei avatapiyedi sina. Tauyadi moe Kenani tubunao, Emori tubunao, Eta tubunao, Perisi tubunao, Ivai tubunao be nakae Iyebusi tubunao. 3 Poyapoyayana maaliina be lobooinina, tuwo komi kōna amoko goi go, maisigu bei avamoukoimi kutoto taiyami tuntunidi. Tauna geya awoita, govila bei enao goi akaumatematemi. Moe pasina guna aneroseyana bei ivakumgoiyemi.’
4 E tutayana ame livalayana moumouna sinove, nuwodi simou gagaina sitáiya, nakae liliudi sivabúbula. 5 Kutoto Yauwe bogina ilatuwokoigu kana,
‘Isileli tubunao kulatuwokōidi kam,
“Komi moitamo taiyami tuntuniidi! Neta tuta kaakupina goi akaiyaka yaimi, bei amtulimi. Ame tuta imi pasapasa kovalilivīdi koyatōidi. Bei alovina manakaegu aguinuwe yaimi.” ’
6 E tuwo moitamo Koya Korevi goi idi pasapasa sivalilividi, siyatoidi go, idi tuta Koya Koreviyana goi go, nakae tuta simamaima goi geya idi pasapasamo sinonoina.
Mosese ina kaba valoboda parai
7 E yau go parai‡ Parai: Ame yoguyogu sakavaidi sikabidi sigilumidi bego tayamo. tayamo akabi, tunagu moetala goi tupwana masigava yoyou ayowo. Go paraiyana aduduwe parai ana kaba valoboda. Avatau neta latuwona Yauwe ina nuwonúwana iyagoi, itoboine ina yoyouyana parai tunagu moetala goi ikawanoi Yauwe yaina. 8 Tuta tamo tamo neta ana yoyouyana goi, e tomota liliudi idi parai totomdi goi siitaoya, siipotegu ana kadókana asiu. 9 Tutayana asiu, gaota taaoyaina isou ima yoyouyana totomna goi iitaoya go, gaotayana sinaena goi Yauwe ivaadigoigu. 10 E tomota liliudi sikandobala gaotayana taaoyaina sigitegite yoyou totomna goi iitaoya, e toinidi idi parai totomdi goi aedi sivatugúyala sisakululu Yaubada yaina. 11 E Yauwe ivaadigoigu, matana matagu, nakae koroto neta siyana ivadigo. Ivadigoigu ikavava, akaluvila ana guna tunagu goi go, tubuwau tayamo moe guna tovaita Nuni natuna Iyosuwa, e yoyouyana sinaena ikaaiyaka imataakavate.
Mosese ina kawanoi
Yauwe ina kaiyaka manuna
Yauwe ina kaiyaka manuna
12 E Yauwe alatuwoko, adigo kagu,
‘Neta kunove. Bogina kulatuwokoigu kam,
“Ame tomotayadi kuvakedēdi.”
Go kom nava geya kulatuwokoiguta avatau bei kuetune ima taiyao kavakededi. Go kom kam,
“Bogina ayagoidokoim be akanuwoiyem.”
13 Tauna akawanoi yaim, neta moitamo im kanuwóiya bogina ababane, tauna neta im sinapu kuvatulukoigu bei ayagoim, e bei ayagoi nava woi kukanuuwoiyegu. Go neta kunuwokavate bego amo tomotayadi kom im bodao.’
14 Tuwo Yauwe idigo kana,
‘Yau toinigu bei avakitaum, e aba waiwasi avinim.’
15 Go yau kagu,
‘Neta toinim geya kuvakitaumeta, e taabu kulatuuwokōima ame asayana kakalave. 16 Yau be nakae im bodao liliuma manakaema bei kayagoi woi im kanuwóiya bogina kababane? Tauna neta toinim kuvakitauma bei tomota poyapoya ana madabokina goi siyagoi kai boda taviileima unana kai im bodao liliuma kuvakitauma.’
17 E Yauwe idigo kana,
‘Moe dogoiyana kudigedige nakae bei aguinuwe kutoto moitamo woi akanuwoiyem be nakae ayagoidokoim.’
18 E adigo kagu,
‘Akawanoi yaim, neta am káeyana tomoeeyalina kuvatulukoigu agite.’
19 E kina Yauwe idigo kana,
‘Yau guna sinapu dedevina madabokina bei matam goi ivaatabale. Ago Yau yoigu Yauwe bei avatoi. Avatau neta latuwogu akanuwoiye, bei akanuwoiye. Avatau neta latuwogu anuwokapisiye, bei anuwokapisiye.’† Rom 9:15.
20 Tuwaina kana,
‘Geya itoboinemta maisigu kugite. Geya kada tayaamo tomota itoboine igitegu geya, govila bei ikámasa.’
21 Kana,
‘Gwa, kébana tayamo gurewa kikigu goi ikaaiyaka, e yatana goi kutāoya. 22 E tutayana guna káeyana tomoeeyalina ivaatabale, e tukubu goi bei ayatoim go, nimagu goi matam atabode ana kadókana bogina ana. 23 Ivatabalegu ikavava, nimagu bei akabimnei go, tolugu kugiteyamo. Go geya itoboineyeta maisigu kugite.’