11
Pita ina talavaita Totuyoyowo manudi
1 E Tomoya ina vamoleyanayao ma sediyao nuumisaidi liliudi Yudiya dadavina goi vala sinove bego kidi Totuyoyowo nakae Yaubada ina livala sinumise. 2 E tutayana Pita ituko ina Yerusalema goi, kidi Diyuu nuumisaidi maniyedi sima Pita sikamatanako 3 sidigo kadi,
‘Iyaa! Manakae kom boi kuna kidi sakavaidi geya sikupoidita taiyao kokabivekoveko be nakae taiyao kokakáika?’
4 E kina go Pita kaga kaga sisowóduwo madabokina ivatetelidokoidi idigo kana,
5 ‘Yau asa Yopa goi akaaiyaka akaawanoi go, nukotogu goi akalayáusa. Guna kalayausayana ame nakae: Dogoi tayamo agite isou. Dogoiyana moe areko gagaina maisiyana go, matakubuna aivasi. Ago ina souyana ana kaigigita moe nakae neta tomota matakubunayadi siyoisidi go, yábana goi arekoyana sisailave isou ima yau matagu goi. 6 Dogoiyana apotepote go, yatana agite yoguyogu ituli ituli, woiwoi ituli ituli, moteta ituli ituli be nakae mánuwo ituli ituli sikaaiyaka, maniyedi vaatabudi go, maniyedi taagonaidi. 7 E nakae níyana tayamo anove idigo kana,
“Pita, kutāoya go, kwaumatēdi be kwāika!”
8 Go yau kagu,
“Tomoya, geya toina! Unana geya kada tayaamo tuta yoguyogu vaatabuna o baailina akani geya, moe bomama.”
9 Go niyanayana yábana goi aiyuwoina anove idigo kana,
“Kaga kaga Yaubada ikimaavadedi taabu kuvaayokōidi baailidi, tauna taabu kwaatāedi!”
10 E ame livalayadi sivato anoveko. Ikavava, dogoiyadi liliudi Yaubada ibiudi situko sina yábana.† Gui 10:9-16. 11 Ago geya mgoninamo Totuyoyowo koroto adi taito Sesariya goi bogina sima vadayana goi kakaaiyaka siitaoya. 12 E Baloma Kimaasabaina ilatuwokoigu idigo kana,
“Korotoyadi taiyao kōna go, taabu kunaanayūwo.”
E ana go, segowo ame adi tainima tayamo nakae taiyao kana Totuyoyowo ina vada goi kasiu.† Gui 10:19-20. 13 Kasiu, e Totuyoyowoyana ilatuwokoima idigo kana,
“Guna vada goi anerose agite iitaoya, idigo kana,
‘Yopa goi koroto tayamo yoina Saimoni ikaaiyaka. Tauyana youyuwoina moe Pita. Tuwo livala kuetūne ina amoko goi Pitayana kududūwe ima. 14 Tauyana vala tayamo bei ilatuwokoim go, valayana goi kom mam bodayauwo bei ami yava kobabane.’ ”
15 E, bego abóbwara go, Baloma Kimaasabaina ina tauyadi yaidi goi nakae boi igimiima kita yaida! 16 E ida Tomoya ina livala anuwaisidi; boi idigo kana,
“Boi Iyoni bwae goi isayoyoimi go, Yaubada Balomaina Kimaasabaina goi bei isayoyoimi.”† Gui 1:5.
17 Tauna Yaubada neta ina yabobona moe Baloma Kimaasabaina boi ikaiguyauye kita Diyuu yaida tutayana ida Tomoya Yeisu Guyau tanumise go, ame tuta ame yabobonayana nakae ikaiguyauye Totuyoyowo yaidi, e manakae? Yau avatau bego Yaubada ina guinuwayana asanabode? Geya itoboineguta.’
18 E Pita ina livalayadi sinovedi, tuwo idi kaumakimaki goi situgaumo go, Yaubada ina togaga ana káeyana sikamoitamoe sidigo kadi,
‘Totuyoyowo nakae Yaubada iuyaonedi neta situgavila. Idi tugavilayana pasina yawoidi vata bei sibabane!’
Tomoya ana totugugunayao
idi gúguna tayamo Antiyoki goi isowóduwo
idi gúguna tayamo Antiyoki goi isowóduwo
(Guinuwa 11:19-30)
Tosiya maniyedi Antiyoki goi Vala Dedevina sitalavaite
19 E tutayana Diyuu Yerusalema goi Stiveni sikaumate, e mou gagaina isowóduwo Diyuu nuumisaidi yaidi. Tuwo sitaoya, sivagisapasapa; maniyedi sina Poinike dadavina, maniyedi sina simla Saipiro go, maniyedi sina asa Antiyoki. Ago sivanibiníbita Yeisu valena sitaalavaite kidi Diyuu aditava yaidi.† Gui 8:1-4. 20 Ego tovagisapasapayadi maniyedi Saipiro korotoidi go, maniyedi Sairini korotoidi. Ame tauyadi sina asa Antiyoki goi Diyuu yaidi goi sitaalavaita go, aiyuwoina kidi Totuyoyowo nakae yaidi goi Tomoya Yeisu Valena Dedevina sitaalavaite. 21 Ago Yauwe ina togaga ikaaiyaka tauyadi yaidi, tuwo idi livalayana Totuyoyowo badabadaidi sinumise, e Tomoya simeko. 22 E Tomoya ana totugugunayao adi tovakumgoyao Yerusalema goi vala sinove bego Totuyoyowoyadi Antiyoki goi sikaaiyaka bogina sinumisa. Tuwo Banabasi sietune isou ina Antiyoki goi bego igite kaga isowóduwo. 23-24 Banabasiyana koroto dedevina, mana numisa gagaina be nakae Baloma Kimaasabaina ivakayaaodei. Tauna tutayana ina amoko goi, igite Yaubada ikanuwoiyedi, e iuyáwana be nakae tonumisayadi iliwoledi bego atedi madabokina goi sitaoyakavata Tomoya yaina. Tuwo boda gagaina tuwaina sinumisa, Tomoya ina bodao sisiukoidi. 25 E tuwo Banabasiyana itaoya ina Tasosi goi Saulo ilusale. 26 Ibabane ikavava, ime Antiyoki goi. Tuwo tala tayamo goi adi taiyuwo sikaaiyaka Tomoya ana totugugunayao taiyao situgúguna go, boda gagaina sivatuulukoidi. Ego ame tutayana kidi da Antiyoki Yeisu ina tovatotowanayao bogina sigimivayoudi Keristiyani.‡ Keristiyani: Ame livalayana ana yagoina moe Guyau ina bodao. Kidi Yeisu geya sinumiseyeta livalayana sivatoi. Ago Yeisu ana tonumisayao geya siivatoi geya.
Tokabivalavala ina
Antiyoki goi italavaita loga manuna
Antiyoki goi italavaita loga manuna
27 E amo tutayana goi tokabivalavala maniyedi sitaoya, Yerusalema goi sisou sina Antiyoki. 28 E tokabivalavalayadi yaidi goi tayamo yoina Agabo. Tauyana itaoya, Baloma Kimaasabaina goi itaalavaita idigo kana,
‘Loga gagaina moitamo Roma ina kaba lovina madabokina goi bei isowóduwo.’
Ame logayana isowóduwo Sisa Kiladiyasi ina lovina ana tuta sinaena.† Gui 21:10. 29 E kidi go Yeisu ina tovatotowanayao sinove, tamo tamo silovina nakonakae itoboinedi, vininabeso bei silamgogo, sietune ina sediyao nuumisaidi Yudiya goi bei sivaitedi. 30 Nakae siguinuwe go, idi vininabesoyana silamgogo ikavava, Banabasi be Saulo nimadi goi siyato. Tauyadi sinave Yerusalema goi tomoyamoyayao nuumisaidi sivinidi, sikaiguyauye.
‡11:26 Keristiyani: Ame livalayana ana yagoina moe Guyau ina bodao. Kidi Yeisu geya sinumiseyeta livalayana sivatoi. Ago Yeisu ana tonumisayao geya siivatoi geya.