10
Isileli tubunao idi goyo yaubada polapola goi
1 Ame moitamo, segowo, itoboineda takabikunuida. Tubudao aba gita tayamo yaida. Ame nakae: Konuwāisi boi nimatu Yaubada ina gaota tubudao madabokidi ivainugonedi†a Tat 13:21-22; Sam 105:39. be nakae madabokidi Négwasa Kayakayaina nauyayanaina goi sivadámana.†b Tat 14:22-29; Sam 66:6. 2 Madabokidikova sisayóyova gaota be négwasa goi, e sispwagógana Mosese taiyao, e ina lovina sisabokuliyedi. 3 Madabokiidi avadi tayamo sikakáika, avadiyadi Baloma Kimaasabaina goi sima.† Tat 16:35; Atu 8:16; Sam 78:24; Iyo 6:31,49. 4 Madabokiidi adi bwae tayamo sinimnim; bwaeyana Baloma Kimaasabaina goi ima. Ame moitamo. Bwaeyana sinimnim moe gurewa tayamo goi idaudau. Ago gurewayana Baloma Kimaasabaina goi ima ivakitaudi go, gurewayana moe Guyau.† Tat 17:6; Yoy 20:11; Sam 78:15, 105:41. 5 Amo nakae Yaubada ivaaitedi go, badabadaidi idi sinapu pasina geya iuyaonedita. Boi yoyowo goi ikaumatematedi.† Yoy 14:29-30; Ibe 3:17; Yud 1:5.
6 E moe dogoiyadi sisowóduwo kita ida kaba gita, e bei goyo geya tayaleyeta nakae boi tauyadi idi sinapu nakae.† Yoy 11:4. 7 Taabu kosaakulūlu yaubada polapola yaidi nakae tubudao maniyedi boi nimatu siguuinuwe. Moe nakae Gínina Kimaasabaina italavaaitedi tutayana bulumakau goi sisaakululu. Gininayana idigo kana,
‘Tomota situsobu sikáika, oine sinim, madi uyáwana besobeso taiyao simasisi goyogoyo.’
Tateta 32:6
8 Taabu tamasisi goyogōyo nakae tubudao maniyedi boi nimatu siguuinuwe, e niga kidi adi badabada tuwenti teri tausani (23,000) maliyalina tayamo goi sikámasa.† Yoy 25:1-18. 9 Taabu Guyau‡ Guyau: Gínina Kimaasabaina kopi maniyedi kadi, ‘Tomoya.’ Ago kopi dedevidi kadi, ‘Guyau.’ kovaakakōne nakae boi nimatu tubudao maniyedi siguuinuwe go, niga moteta sina tauyadi sikaumatedi.† Yoy 21:4-7. 10 Taabu takaukuulukūluwo nakae tubudao maniyedi boi nimatu siguuinuwe, e niga tómtula ina imtulidi.† Yoy 16:41-50.
11 E amo dogoiyadi siisowóduwo tubudao yaidi goi moe kita ida kaba gita. E tetalayadi Mosese iginidi bego kita tuta ana kaba lukavava goi takaaiyaka ikatumatalida ida sinapu manuna. 12 Tauna avatauwa komi neta konuwonúwana itoboinemi aba vakakona goi bei kotaoyakavata, korugwausīmi, govila bei kokapusi. 13 Vakakona liliudi siimekoida moe tomota liliudi adi vakakona nakae. Go Yaubada aba numisa. Geya kada tayaamo vakakona itagone bei itogagasaveda geya, go sem tutayana vakakona tababane, Tauyana bei aba siya tayamo ivatulukoida, e bei itoboineda tatogaga.
14 Tauna guna kaloyao, yaubada polapola ana sakululu kovakilīsi. 15 Komi nukotomi taapolaidi avaadigoimi, livala ame kodovatusīdi, livalayadi moitamo o geya. 16 Oine keigaina manuna Yaubada yaina takauyagu go, tutayana keigayana goi tanim moe nakae Guyau ikaikaina tasiuko, e taeboda tayamo Tauyana taiyao ae? Beredi nakae. Takivisivisi go, tutayana berediyana takáika, moe nakae Guyau wowona tasiuko, e taeboda tayamo Tauyana taiyao ae?† Mad 26:26-28; Mak 14:22-24; Luk 22:19-20; 1Ko 11:23-25. 17 Beredi tayamo toito ikaaiyaka, tauna kita boda badabadaida go, wówana tayamo. Ame moitamo. Madabokiida taiyao beredi tayamo takáika. 18 Isileli tubunao manudi konuwonūwana tutayana idi vininabeso aba kasala goi sikasale Yaubada yaina. Sikasale ikavava, tomota sima sikáika go, moeko goi tokaikayadi tokasala sisiukoidi idi sakululu Yaubada yaina ae?† Vin 7:6,14-15. E nakae neta awoinu kaasalaidi yaubada polapola yaidi kokáika, e moeko goi yaubada polapolayadi kosiukoidi. 19 Tauna guna masi kaga? Awoinu Totuyoyowo sikasale idi yaubada polapola yaidi kaga? Awoinu tauna ae? Idi yaubada polapola kaga? Geya kada tayaamo kaga geya, 20 go sem kaga kaga Totuyoyowo sikaasaledi moe dimoni yaidi goi sikaasaledi go, Yaubada yaina goi geya. E geya latuwogu komi dimoni kosiukoidi.† Vin 17:7; Atu 32:17; Sam 106:37; Nuw 9:20. 21 Geya itoboinedeta ida Tomoya ina keiga goi be nakae dimoni idi keiga goi tanimyuwedi. Geya itoboinedeta ida Tomoya ina kaba káika goi be nakae dimoni idi kaba káika goi takakáika. 22 Manakae? Latuwoda ida Tomoya ivakókala kita ina boda yaida? Geya ae? Manakae? Tauyana tatogagasave? Geya ae?† Atu 32:21; 1To 14:22; Sam 78:58; Yer 44:8.
23 Komi kodigo kami,
‘Dogoi liliudi mama tagona kaguuinuwedi.’
Go yau kagu,
‘Dogoiyadi maniyedi geya basabasaidimo kita yaida.’
Komi kami,
‘Dogoi liliudi mama tagona kaguuinuwedi.’
Go yau kagu,
‘Dogoiyadi maniyedi ida numisa geya sikitogagedita.’† 1Ko 6:12.
24 Taabu tomota toinina ana dedevina manuna ipooisōgana, go sem siyana ana dedevina manuna ipoisōgana.
25 Aba gita tayamo ame nakae: Ava kanina aba maketi goi sikaiigimone kokāika. Neta boi sikasale yaubada polapola yaidi o geya, mada tagona takáika go, imi nanayuwo pasina taabu koluumadādana neta aninayana moe kaasalaina yaubada polapola yaidi goi. Madabokinakova mada tagona takanidi. 26 Moitamo. Gínina Kimaasabaina idige kana,
‘Poyapoya ana madabokina
be nakae kaga liliuna poyapoyayana goi
moe Yauwe ina kaba lovina.’
Same 24:1
27 Neta tomota geya sinumiseta siduduwemi áika manuna go, latuwomi kona, e kōna go, kaga liliuna sivinimi kokāika. Ago imi nanayuwo pasina taabu koluumadādana neta awoinu boi siikasale yaubada polapola yaidi goi. 28 Go neta tomota tayamo ilatuwokoimi kana, ‘Ame sikasale yaubada polapola yaidi goi’, e tauyana pasina be nakae nanayuwo pasina taabu kokakāika. 29 Ego geya kada komi imi nanayuwo pasina geya, go sem tauyana ina nanayuwo pasina. Go nakona tomota tayamo bei inuwonúwana kana,
‘Yau magu tagona awoinu liliudi akanidi, tauna kaga unana tomota idi nanayuwo pasina go, yau guna guinuwa sitakino igoyo? 30 Neta yau bogina akauyagu Yaubada yaina avagu manuna, geya vatau tayaamo itoboine itagiwoigu.’
31 Tauna guna nuwonúwana ame nakae: Imi guinuwa madabokidi, nakona imi káika o imi nim o ava guinuwa koguuinuwe, moe Yaubada ana taimámina manuna koguuinuwēdi. 32 Avatauwa neta geya sinumiseta, nakona Diyuu o nakona Totuyoyowo, e taabu kokaaigoyāidi bei numisa odi ikai. Aiyuwoina Yaubada ana totugugunayao taabu kovakapuusiyēdi. 33 Moe yau guna sinapu nakae. Apooikíkina bego kaga liliuna goi tomota liliudi avauyaonedi ame nakae: Toinigu guna dedevina manuna geya, go sem apooikíkina bego tomota badabadaidi adi dedevina manuna apoisógana. Nakae aguuinuwe bego adi yava sibabane.
†a10:1 Tat 13:21-22; Sam 105:39.
†b10:1 Tat 14:22-29; Sam 66:6.
†10:3 Tat 16:35; Atu 8:16; Sam 78:24; Iyo 6:31,49.
†10:4 Tat 17:6; Yoy 20:11; Sam 78:15, 105:41.
†10:5 Yoy 14:29-30; Ibe 3:17; Yud 1:5.
†10:6 Yoy 11:4.
†10:8 Yoy 25:1-18.
‡10:9 Guyau: Gínina Kimaasabaina kopi maniyedi kadi, ‘Tomoya.’ Ago kopi dedevidi kadi, ‘Guyau.’
†10:9 Yoy 21:4-7.
†10:10 Yoy 16:41-50.
†10:16 Mad 26:26-28; Mak 14:22-24; Luk 22:19-20; 1Ko 11:23-25.
†10:18 Vin 7:6,14-15.
†10:20 Vin 17:7; Atu 32:17; Sam 106:37; Nuw 9:20.
†10:22 Atu 32:21; 1To 14:22; Sam 78:58; Yer 44:8.