18 Moses bóktanórr Isrrael pamkolpamdó wagó, “Kürü ini bóktan yazebam, moboküpdü akó gyagüpitótókdó irrbünamke, da bamelamke yabiób tangdó akó yabiób müóngdü timamzan, yabiób gyagüpi bomanóm metat. 19 E wata yabiób olmal ini bóktan arüngi umul bain kwarilo. E metat ikik kwarilün ene gida bóktan pokoankwata, e müótüdü nóma mórrandakla ó e nóma agóltagóldakla, akó nóma ngón bagóndakla ó nóma bazebdakla.”

26 Moses akó bóktanórr wagó, “Ini ngürr, ka yabü obzek kwata nis bóktan angrindóla, bles bain bóktan akó amórr bain bóktan. 27 Errkya ini ngürrdü, ka ⌊Lodón⌋ yabü God, oya gida bóktan poko yabü alióndóla. E ene gida bóktan poko nóma mamoan kwarilo, bles bain bóktan sab yabüka yarile. 28 A sab amórr bóktan yabüka yarile, e ene gida bóktan poko koke nóma mamoan kwarilo akó e nóma tübyalüngórre ene kwatódógab, ka yabü ne kwat amtyandóla errkya, ama ngibürr godab solkwat atanóm, e ngaen umul-kók ne godbóka kwarilnürrü.

31 “E Zodan tobarr baurr kari pokoakla, ama sab ogobo Lod yabü God ne tüp akyanda. E nóma ipüdane ene tüp, akó ngyabenóm nóma bainane, 32 blaman ini arüng bóktan akó gida tai mumyamónlamke, ka ne kla arrbündóla yabü obzek kwata ini ngürr.”