81
Vania na tinoni gehelinge: na linge nina Asaph, linge taonia na gittith
1 Linge togotogo vania God, gaia na lagalagada:
linge rivurivu vania God ni Israel.
2 Huluvia na linge uto ma kau nia hulu ghalevu:
te manilu na rongoviana.
3 Lovua na tavuli ni savukolu:
tana torogha ni vula, maia ghua tana vovogho.
4 A eni gaia na vetena ni Israel:
ma nina arevaghi a God ta Jacob.
5 Gaia te hera na vure ni Israel na vetena keri,
Tana bona te suravia na komu i Egypt.
6 Inau tu rongovia na talama na manga keha te ghaghua,
“Inau ku huia vanighau na hahala te mavatighau:
mu ku hangaghau ta nimiu na lutu vahola.”
7 Lokana na gunaguna tau holou mu volaghau.
Tana maraghata ma na viviha tu tala mai,
igaa nigua na vatei polo.
Inau tu tabotaboghau i Meribah,
tana bona tau nia kokoe na beti te taho igaa.
8 Ghau kulagu na vure, kau rongovia na bosagu:
Israel, e liogu ngangata ko rongovia mai!
9 Kau bei holohabaa siki god keha.
Kau bei nia kikinima didira god vana voo.
10 Inau a Lord, nimiu God:
tu lavihorughau mai Egypt,
Kau hangavi utoi na mangamiu,
mu ku kutighau nia na lei totobo uto.
11 Hauvaa, mara mua rongovia na bosamu na lei kulagu na vure:
Israel te mua taonia nigua na vetena.
12 Keri ke, ge u sanira ga vamua:
ma kara tona taonia na liodira.
13 E liogu sughua kara rongovia na bosagu, kulagu na vure!
Me liogu sughua ghua kara sakutua taoniu!
14 Keri ke, ge ku mina kuku lagavulera ghadira na kana!
Mu ku pisura ghadira na levunimate!
15 Gaira tara niu sika kara kikinima vaniu nia a Lord vamua,
ma kara lavia na totoro ke va me vaa.
16 Inau ku kutighau nia na lei puku ni vanga:
mu ku mu inuinughau nia na midua ni talu.