1 Ghau kulagu na vure, kau rongovia mai nigua na tarai.

kau rongovi utoa mai na hava tu bosa.

2 Inau ku kokoe vanighau nia na bosa vavaghaha.

Mu ku bosa madalai na lei bosa te polo mai dania.

3 Na lei tutugu ta rongovighi, ma ghilalai mai tua,

na lei tutugu tara tutugui vanighita na lei kukuada mai dania.

4 Mi ghita ka bei poloi na lei utuni raeni vanira na lei daleda.

Ka ghoi tughunitatei vanira ghua na lei vavata ke mai a nina rongoragha na Lord.,

5 Gaia te nia hevei horu na bosa vania Jacob,

me hera nina lei vetena na vure ni Israel,

A gaia te keikerira na lei kukuada ge kara taraira na lei daledira nia nina vetena.

6 Keri ke, ge na vavata ke mai kara ghilalai ghua.

Ge gaira ghua, kara taraira na lei daledira

7 Keri ke, gaira ghua kara ghanaghana kodo itatana God,

ma kara bei nighi ponolio na hava te gonighi tua:

Ma kara taonighi haia na lei nina vetena.

8 Ge kara bei vaghara gea na lei kukuadira

tara diu bosa mara hughuhughu

didira ghanaghana ta God te mua kakai,

me mua kabu ngasi didira taluutuni itatana.

9 Didira malaghai ni kisu mate tana Ephraim,

tara pitu dila tua, kolui didira baghe mana kuali.

mara sama polo tana bongi ni kisu mate.

10 Gaira tara mua taonia nina baubahu God.

Mara mua liona ge kara taonia nina vetena.

11 Gaira tara nia ponolio na hava te gonia vanira

na lei butuli tara righighi te nei vanira.

12 Mara vaevane so na lei kukuadira, me gonighi na lei butuli God.

Tara nanatana i Zoan tana komu i Egypt.

13 Ma gaia te vokasia na tahi me hola halavura.

Mana tahi te tughuru dato vagha na voko i lilighidira i levu mi levu.

14 Mi tana dani gaia te hulira nia na parako,

mi tana bongi na marara ni lake.

15 A gaia te tagi vokai na vatu tana bona mamaha,

me hera na beti te siki dato mai loka ni vatu vagha na beti toghotogho.

16 A gaia te nea na bei ge tave horu mai loka ni vatu,

me nea vei tave vaghi na lei betitina.

17 A gaira tara tona haliu so na kabu tangohahi tana matana God.

Mara diu bosana na puku ni haba tana bona mamaha.

18 A gaira tara liona ge kara tabotaboa God tana tobadira,

ge ra nia kokoe na vanga tana tobadira itatana.

19 Ma gaira tara pasapasa God, mara ghaghua,

“Ke mua tangomana God ge ke heghita siki vanga, ilokana na bona mamaha eni.”

20 E utuni so, agaia te tagi voka na vatu me tave hovu mai ga na beti toghotogho.

me ke tangomana so ge ke heghita na vanga, me ke hera kulana vure ni vinahi.

21 Ma maghutu te rongovira ge rutu, me matera kulana vure nia na lake, me sule

22 Na pukuna tara mua taluutunia God.

mara mua ghanaghana mavaa ghua gaia te righitaonira.

23 Keri ge keikeria na parako ge ke hahangavi;

me hangavighi na lei mataula i kokou.

24 Ge kovalaha horu na maana vanira ge kara ghania.

Agaia te vahera na vanga ni kokou.

25 Keri ge ra ghania ghadira na vanga na lei tarunga,

Ma God te va hera udolu na vanga te liodira.

26 Agaia te nea na ara ge tavuvu mai i ulu,

me hulia na koburu nia nina maana te laga.

27 Ma gaia te vetenara na manu vanira kulana na vure.

Tara subo vaghara na saghalea tana posoposo ni tahi.

28 Mana manu tara tumu horu kililia na bona tara ghahara iga,

Talighutia na vale tapole.

29 Mana vure udolu tua tara vanga mara nia mahu,

Na hava God te hera mai te liodira.

30 Hauva mara mua mua na ghaniana,

na vanga te liodira ngangata.

31 Ma God te rutu vanira tua, ge matera na eli mane laga itadira,

maia ghua na lei gari mane ni Israel.

32 Me nera mana te vagha keri na vure tara nia tona haliu so na tangohahi hahi,

mara hove na taluutuniani nina na lei butuli.

33 Keri ge va soko butoi na bongidira,

mana voladira kolua nia na kakale.

34 Tana bona te matera na balu, ma gaira udolu tara ririu oli vania.

tara tughu lio mara holohaba.

35 Vaho ge ra ghilala God te pilupilura

Me mai hui olira gaia na puku ni haba.

36 Hauva mana bosadira te sori udolu,

me taho tua siki utuni tana hava tara bosaa.

37 Gaira tara mua talu mavaa nia na tobadira,

mara mua pangotia nina baubahu.

38 Hauva, ma gaia te arovira so kula na vure

me talu kehai so na paludira me mua nira ghighirou.

Subo na bona gaia te lavi olia nina rutu vanira.

39 Agaia te ghanaghana gaira tara tinoni ni maramana vamua,

te vaghara na ghuri tona haliu vamua.

40 Engiha na tughuru ni hughutiana tana bona mamaha

me ngiha na bona tara nea ge dikalio.

41 Agaira tara tabotaboa haia God,

Mara nea te vahaghitailia God, Tabu ni Israel.

42 Gaira tara mua ghanaghana olia nia maana,

mana bongi te volara tana limadira ghadira levunimate.

43 Ma nia nina maana te nei nia na lei butuli

te haeharegha tana nanata i Zoan, lokana na pari Egypt.

44 Ma gaia te nei na lei beti tavetave ge liliu ni ghabu:

me taho na beti kara inuvia na vure ni Egypt.

45 Gaia te vetenara na lango vanira ge ke vahaghitailira,

mana ovu ni kulau ke dikalai na komudira.

46 A gaia te vetenara na ma ka me ghanighi ghadira na vanga.

Mana puku te pisui didira na leghai.

47 Gaia te matei didira na ghai, ghania nia na uha binoru,

Ma didira saghau te mate nia na kolobu ni labota.

48 Gaia te matei didira na buluka nia na uha bololo,

ma didira maumanu nia na viti.

49 Agaia te nera sodora na vahaghitaili sule.

nia nina rutu papara vaghara rana [ladavaghi]/[tarunga] ni mate.

50 A gaia te mua hola olia nina rutu, pe ke arovia na vure

Agaia te pisura nia na maemate.

51 Agaia te va matera na lei meomeo mana kamanagho

itadira na lei sopa binaboli tadira na lei binaboli te talighutia i Egypt.

52 Gaia te hulira na kulana vure vagha na righitaoni sheep.

Te righitaonira i lokana na bona mamaha.

53 Gaia te huli tatavahalera ge ra mua mataghu.

Hauva mana tahi te saopo savura ghadira na kana.

54 Me hulira vaa tana komu, na komu tabu,

tana lei ghotu te sagui tana sura.

55 Agaia te tiva kehara na vure tana bona tara ghadaru.

Me tuvalighi didira pari, ge talura na kema ni Israel tana komudira.

56 Ma gaira tara hughuhughu kolua God, puku ni maana mara tabotaboa.

Ma gaira tara mua taonighi na lei nina vetena.

57 ara hughu bosana, mara mua ghanaghana mava vagha tara nea ga lei kukuadira; me taho tua hei ke ghanaghana mavara.

58 A gaira tara lavi rutuna nia didira na lei bela ni sukaghi vanira na lei God keha.

Me nighi rutu ghua didira na lei titinoni ni God keha.

59 Tana bona God te rongovira, ge rutu ngangata vanira.

me nira sika tua na lei kulana vure.

60 Keri ge sogha sania na valena i Shiloh,

Lokana na komu te ghanaa iga ighobuda.

61 Agaia te talana na ghada na kana ge ra sagua na bokisina na vetena,

na marena nina maana mana rongoragha.

62 Agaia te rutu vanira na kulana vure heghena,

Me taladira ghadira na kana ge ra labura.

63 Na lei gari mane tara matera tana veitotoghoni,

me taho siki sakai kara taudira na lei tahula.

64 Na lei mane gehegehe tara matera tana gunaguna,

ma lei taudira tara hovera ge kara vei tangihira.

65 Na Lord te tughuru dato vagha te vaho rarai tana maturu,

Te vagha na mane laga te inuvia na wine.

66 A gaia te ghuru olira ghana kana,

te laga vulera, ge ra ririu oli nia na maa ke mua ghoi soko tua.

67 A gaia te nira sika na lei vinavahuhuna Joseph,

Me mua vilira na kemana Ephraim.

68 Hauva me vilia na kemana Judah,

Mana ghotu Zion, te dolovi ngangatara.

69 Iga te kisua nina vale taba vagha na komuna i kokou.

Me goni ngasilia vaghaa na maramana te kabu ngasi haia tua.

70 Agaia te vilia David nina ghairau,

me lavi keha tadira na lei sheep te righitaonira.

71 Iga te righitaonira na lei nina sheep,

me talua ge vunaghidira na vure ni Israel.

Te righitaonira nina vure God.

72 David te righitaonira nia na toba maghora,

Me hulira nia nina puku ni ghilala.