1 Sasuri ne, nèti jaꞌa, Paulus. Aa angalai jaꞌa, Timotius paꞌadhu hia miu lii mahoꞌo kahèi. Jiꞌi dua mi se, ana sabꞌa nèti Yesus Kristus.

Jiꞌi paꞌadhu sasuri ne, hia mi dhèu unu Ama Lamatua dhu parcaya Yesus Kristus ètu kota Pilipi. Jiꞌi neo kahèi, ho dhèu dhu jꞌajꞌi kètu jumaꞌat dènge dhèu dhu soru-bara kètu jumaꞌat sèra, reꞌa mèu isi sasuri neꞌe.

2 Ama Lamatua èèna, Ama èdhi. Aa Yesus Kristus èèna, Kètu èdhi. Jiꞌi manèngi sèna ka Rèngu padꞌelo dꞌara hua iia Ra mi miu, ho bisa mamuri dènge mera-milu.

3 Masi ka nèbhu le jaꞌa paraga heka dènge miu, te ngaa jaꞌa bhèlu boe miu! Lodꞌo-lodꞌo jaꞌa sanèdꞌe miu, jaꞌa manèngi makasi mi Lamatua, lula miu parcaya Ne taruu. 4 Lodꞌo jaꞌa sabajꞌa hia miu, dꞌara jaꞌa karejꞌe-karae, 5 lula karèi nèti hiu-hiu miu sèmi mere Lii Lolo Beꞌa Lamatua, miu pakako taruu sasabꞌa Na, sama-sama dènge jaꞌa. 6 Èèna jꞌajꞌi mi tadha, peka na, Ama Lamatua mulai sabꞌa ètu dꞌara miu kèna. Aa jaꞌa keꞌa tareꞌa, na, Lamatua pakako taruu sasabꞌa Na dhu beꞌa èèna, toke pamèci aaꞌi mèu-mèu, toke dꞌai lodꞌo Yesus Kristus mai hari.

7 Mema lèke tareꞌa ladhe jaꞌa sue miu, lula dꞌara jaꞌa dhu paꞌèki le dènge miu karèi nèti uru ka. Ca hari nèi, miu sabꞌa le bera-bera dènge jaꞌa, lodꞌo jaꞌa lole dènge dhèu Lii Lolo Beꞌa Lamatua, aa ropa jaꞌa dhaa mi dhèu dhu labꞌa Lii Lolo Beꞌa èèna. Masi ka jaꞌa maso bui, te ngaa miu hari boe nèti baboa jaꞌa. 8 Ama Lamatua dhu neꞌa, na, dꞌara jaꞌa neo taruu paraga dènge miu. Te sasue jaꞌa mi dedha miu, èci èèna ka dènge sasue Yesus Kristus.

9-10 De jaꞌa sabajꞌa hia miu sèmi neꞌe ka: jaꞌa manèngi ho miu asa tabha pasue èci dènge èci. Jaꞌa manèngi kahèi sèna ka Ama Lamatua hia miu meꞌa mèu, mia dhu beꞌa, sèna ka miu mamuri mola-mèci. Pe dꞌai lodꞌo Kristus pamaꞌète lii langu dhèu aaꞌi-aaꞌi, Na peka na, miu sala boe ngaa-ngaa, 11 lula Nèngu mesa Na ka dhu tao dꞌara miu mola-mèci, ho bisa mamuri mola. Dènge mamuri mola sèmi èèna ka, dhèu leo dedꞌe padedha-dedha aa koa-kio kolongara Ama Lamatua.

12 Aꞌari pasue aaꞌi-aaꞌi! Jaꞌa dꞌèi sèna ka miu meꞌa, na, abhu dhèu dhu pasusa jaꞌa, toke pamaso jaꞌa asa dꞌara bèdho. Te ngaa teꞌa boe, na, Lii Lolo Beꞌa Lamatua pale-lème le ètu mia-mia, 13 toke sordadꞌu dhu madhenga èmu dhèu aae, dènge dhèu leo aaꞌi-aaꞌi reꞌa, na, jaꞌa maso bui lula madhutu Yesus Kristus.✡ Lii Lolo nèti Dhèu Pajuu-paleha 28:30 14 Ka dhèu unu Ama Lamatua ètu seꞌe se rèdhi, na, Lamatua ka dhu tao jꞌara èèna lodꞌo jaꞌa ètu dꞌara bui ne. Nèti èèna ka, rèngu asa tabha bani, toke reꞌa heka madhaꞌu. Hèia ra padhai paledꞌa-ledꞌa Lii Holo-Nori Lamatua ètu mia-mia.

15-17 Ètu neꞌe abhu dua rupa dhèu dhu majꞌèni ajꞌa jꞌara-jꞌara lula-nèti Kristus. Nèti èèna ka, abhu dhu sabꞌa dènge dꞌara mola, aa abhu dhu sabꞌa dènge dꞌara koe-kapengo. Dhu sabꞌa dènge dꞌara mola, rèngu beꞌa dènge jaꞌa. Dhèu se reꞌa mèu, na, jaꞌa dui sasusa ne, lula pakako sasabꞌa jaꞌa, dhu hari boe kabodho ciki sa.

Te ngaa dhu sabꞌa dènge dꞌara koe-kapengo, dꞌèi boe dhèu risi nèti rèngu aa tenge kolongara di. Rèngu pamae-pamanyèla dhèu-dhèu parcaya, sadꞌi abhu dhèu dhu madhutu ra. Te ra tenge jꞌara ho bisa padedha iisi ra, peka na, rèngu risi jaꞌa. Rèngu pangee, na, ladhe abhu dhèu dhu madhutu rèngu, èèna na asa tabha pajꞌèra jaꞌa ètu dꞌara bui.

18 Te ngaa hudꞌi rèngu sène! Jaꞌa pusi-pahae boe, ladhe dhèu ajꞌa dènge dꞌara mola, do aadꞌo. Sadꞌi dhu rèngu ajꞌa, dhoka lula-nèti Yesus Kristus di! Èèna ka dhu pakarejꞌe dꞌara jaꞌa.

Aa jaꞌa karejꞌe tareꞌa-reꞌa, 19 lula jaꞌa keꞌa, na, miu sabajꞌa hia jaꞌa, aa Roh Yesus Kristus dhu soru-bara jaꞌa. Nèti èèna ka, jaꞌa keꞌa, na, lèpa lodꞌo limuri, aaꞌi-aaꞌi se èle dènge sodꞌa-mole! 20 Masi ka jaꞌa muri do, madhe do, ngaa-ngaa tao boe. Sadꞌi Ama Lamatua pake jaꞌa, sèna ka dedꞌe padedha-dedha kolongara Yesus Kristus, aa ajꞌa mola-mola lula-nèti Nèngu, toke abhu boe ngaa èci sa dhu pamakae jaꞌa. Seꞌe se ka dhu jaꞌa sanao karèi nèti uru, toke doe neꞌe ne.

21-23 Te jaꞌa pangee sèmi neꞌe ka: ladhe jaꞌa mamuri, na, hudꞌi laa paꞌèki dènge Kristus, aa pakako taruu sasabꞌa-laꞌa Na. Èèna ka dhu beꞌa. Te ngaa ladhe jaꞌa madhe, jaꞌa oto risi hari, lula jaꞌa tèke eele rai-haha ne, aa mamuri hari ho pea paꞌèci dènge Kristus ètu sorga. Nèti èèna ka, dꞌara jaꞌa kajari, aa keꞌa boe mia ka dhu beꞌa risi eele! 24 De sèmi neꞌe ka laa! Lula miu parluu jaꞌa era ètu neꞌe, beꞌa risi jaꞌa pea paꞌèci dènge miu ètu rai-haha ne. 25 Jaꞌa keꞌa, na, mamuri jaꞌa madhera era, sèna ka paraga hari dènge miu. Te Lamatua neo ho jaꞌa paꞌèra dꞌara miu, hèia miu asa lèka Ne dènge dꞌara karejꞌe. 26 De bèli-camèdꞌa miu dedꞌe padedha-dedha kolongara Yesus Kristus, lula Na bhoke le jꞌara sèna ka jaꞌa lèpa paꞌasu-pareo hari dènge miu.

27-28 Masi ka tasa mera mia, mamuri miu hudꞌi lèke ku, te miu dhèu unu Lamatua. De miu hudꞌi mamuri dhu mèci ku, aa tao madhutu Lii Lolo Beꞌa Yesus Kristus dhu peka le dènge miu. Aa ladhe bèli-camèdꞌa jaꞌa lèpa hari dhiu pangadꞌo dènge miu, do tadèngi dhoka lii nèti dhèu di, peka na, miu mamuri mola, na, dꞌara jaꞌa karejꞌe. Te jaꞌa bisa keꞌa, na, miu dhu mamuri dꞌara èci, lula paꞌèki dènge Roh èci di. Aa bisa keꞌa, na, miu paꞌèra ho pakako sama-sama Lii Lolo Beꞌa Lamatua Yesus, sèna ka dhèu leo parcaya kahèi. Aa miu meꞌa boe madhaꞌu kahèi, masi ka abhu dhèu dhu labꞌa miu. Neꞌe ne jꞌajꞌi mi tadha hia musu, na, Ama Lamatua neo lalèta eele si. Te ngaa Ama Lamatua hia miu mamuri, ho bèli-camèdꞌa miu mamuri taruu dènge Nèngu. 29 Te, lula Ama Lamatua dꞌara hua iia risi, nèti èèna ka Na bhoke le jꞌara, sèna ka miu bisa parcaya Kristus, aa jꞌajꞌi dhèu unu Na. Mesa boe parcaya di, te ngaa Lamatua soro tèke miu abhu sasusa kahèi, lula miu madhutu Nèngu. 30 Te dhu jaꞌa tadèngi, abhu dhèu ètu sèra dhu labꞌa miu, lula miu pakako Lii Lolo Beꞌa Kristus. Sanèdꞌe, te ca hari ni rèngu labꞌa le jaꞌa kahèi, toke dꞌai doe neꞌe ne.✡ Lii Lolo nèti Dhèu Pajuu-paleha 16:19-40