9
1 Amwo mökürei epwe eu lenien koluk,
nge mesei epwe eu puächen chönün mas,
pwe lerän me lepwin üpwe tongeni kechüeiti
chokewe mi ninnila me lein nei aramas.
2 Amwo epwe wor imwei likachoch lon ewe fanüapö,
pwe üpwe likitala nei aramas o feila toau seniir.
Pun ir meinisin ra chon lisowu,
ra eu mwichen aramas resap allükülük.
3 Iei alon ewe Samol mi Lapalap,
“Iteiten fansoun nei aramas ra chök kapas chofana.
Chofana a chöchöla lon ewe fanü, nge sap let.
Nei aramas ra chök föri föför mi ngau,
nge resap alletä pwe ngang ar Kot.”
4 Iteiten eman me eman epwe afäli ren chiechian,
esap pwal anomu an lükülük won pwin,
pun iteiten eman me eman pwipwi a atupu pwin,
nge iteiten eman me eman chiechi a aitengaua chiechian.
5 Iteiten eman me eman a atupu chiechian,
nge esap wor eman a apasa mine a let.
Ra aörüni ngeni chönawer kapas chofana,
resap fokun mochen ükütiu le föri tipis.
6 Ra chök achukuchukätä ar ariaföüü aramas
me ar föförün atuputup.
Ewe Samol mi Lapalap a apasa pwe nöün aramas ra likitala i.
7 Iei mine ewe Samol mi Unusen Manaman a apasa,
“Nengeni, üpwe limeti nei aramas usun eman chon ketel a limeti mächä,
üpwe sotuniir.
Pun met echök üpwe tongeni föri ren nei aramas
mi föri mine a ngau.
8 Chönawer a usun chök efoch föün esefich mi poison,
ra chök eäni kapasen atuputup.
Iteiten eman me eman a eäni kapas pwetete ngeni chon arun,
nge lon lelukan a ekiekietä usun an epwe sorongauei.
9 Ifa usun, üsap apwüngüür pokiten ekei föför?
Ifa usun, üsap ngeni chon ei sokun mwü chappen ar föför?
Ngang ewe Samol mi Lapalap üa kapas.”
10 Nge ngang üa apasa, “Üpwe ngüngüres fän iten ekewe chuk
o kechüeiti ekewe lenien fetil me lon ewe fanüapö,
pun ra pwasala.
Iei mine esap wor eman a pwerela lor,
esap pwal wor eman a rongorong wörüwörün kow me ie.
Ekewe machang me ekewe manmwacho ra sü seniir.”
11 Ewe Samol mi Lapalap a apasa, “Üpwe föri pwe Jerusalem epwe eu ioien mettoch mi tala,
eu leni ia ekewe kolak mi mwacho ra nom ie.
Üpwe pwal ataela ekewe telinimwen Juta pwe resap chüen so.”
Kot a eniwa chon Juta pwe repwe oola, nge fanüer epwe tala
9.12-22
12 Iwe, üa ais, “Ai Samol mi Lapalap, pwota ewe fanü a tala o pönüla usun eu fanüapö, pwe esap wor eman a pwerela lon? Iö a tipachem pwe epwe tongeni weweiti ei? Nge iö ka awewe ngeni, pwe epwe tongeni awewe ngeni aramas?” 13 Iwe, ewe Samol mi Lapalap a pälüeni, “Ei a fis pokiten nei aramas ra likitala ai allük üa ngeniir. Resap aleasochisiei ika föri mine üa üreniir. 14 Nge ra ülöförea o chei mochenin leluker, ra fel ngeni ekewe anü Paal usun ar kewe lewo ra aiti ngeniir. 15 Iei mine oupwe aüselinga met ngang ewe Samol mi Unusen Manaman ewe Koten Israel üa apasa: Üpwe amongöü ngeni nei aramas mongö mi maras o aünü ngeniir koluk mi poison. 16 Üpwe atoropaseer lein chon ekewe mwü, ir me ar kewe lewo resap sileer me mwan. Üpwe pwal tinala mürir mwichen sounfiu, pwe repwe maun ngeniir tori üpwe aroserela.” 17 Iei alon ewe Samol mi Unusen Manaman,
“Kopwe ekieki mine epwe fis.
Kopwe kökköri ekewe fefin mi ngüngüres pwe repwe feito.
Kopwe titi ekewe fefin mi sipeöch le eäni kölün kechü.” 18 Iwe, ekewe aramas ra üra,
“Repwe müttir feito o ngüngüres woch,
pwe epwe sürütiu chönün mesach,
nge apwölün mesach repwe chöchön ren kechü.” 19 Oupwe aüseling ngeni och ngüngüres seni Sion,
“Sa fokun feiengau, sa unusen itengau,
pun sa likiti fanüach,
pokiten aramas ra ataetiu imwach kewe.”
20 Iwe, üa üra,
“Ämi kana fefin, oupwe rongorong alon ewe Samol mi Lapalap,
oupwe aüselinga an kewe kapas.
Oupwe aiti ngeni nöümi kewe föpwül usun ar repwe ngüngüres,
nge iteiten eman me eman epwe aiti ngeni chon arun echö kölün kechü.
21 Pun mäla a tötä me lon asamwachon imwach
o tolong lon ekewe imwen king.
A ärala ekewe semirit me won ekewe al
me ekewe alüal lon ekewe lenien amwicheich.
22 Somän ekewe aramas repwe toropasfeil ekis meinisin
usun kiten mongö lon ekewe leni mi amassawa.
Repwe usun chök pilükün wiich ekewe chon pöküpök ra likiti,
nge esap wor eman a ionifengeniir.
Iei met ewe Samol mi Lapalap a akünö ngeniei pwe üpwe apasa.”
Än Kot tipachem iei än aramas ling
9.23-26
23 Iei alon ewe Samol mi Lapalap,
“Eman aramas mi tipachem esap aingaing fän an silelap,
eman mi pöchökül esap aingaing fän an pöchökül,
nge eman mi pisekisek esap aingaing lon an wöü.
24 Nge ewe mi aingaing epwe aingaing lon an eäni weweöch o sileei,
pwe ngang ewe Samol mi Lapalap mi eäni tong ellet,
pwüng me wenechar won fanüfan.
Pun ikei ekei föför üa pwapwa ren.
Ngang ewe Samol mi Lapalap üa kapas.” ✡ 1.Kor 1.31; 2.Kor 10.17
25 Iei alon ewe Samol mi Lapalap, “Epwe war ewe fansoun, lupwen üpwe apwüngü chokewe ra chök sirkomsais ren inisir: 26 Ekewe chon Isip me Juta, chon Etom me Amon, chon Moap me chokewe mi nonom lon ewe fanüapö mi toau. Pun chon ekei mwü meinisin resap sirkomsais, pwal chon Israel resap sirkomsais lon leluker.”