2 A ifan me öchün inemi?

A usun chök eman liafefinin laion lein ekewe ätemwänin laion.

A konola lein ekewe nienifön laion o oupwu nöün kewe.

3 Iwe, a foleni eman lein nöün kewe,

tori a wattela o nönnö ngeni eman nienifön laion.

A kaiö usun an epwe liapeni liapan o ochei aramas.

4 Iwe, lupwen ekewe mwü ünükün ra rongorong usun, ra atupwalong lon tuwer pwang.

Ra riri ngeni selimächä o emwenala Isip.

5 Nge lupwen ewe liafefinin laion a küna pwe mine a apilüküni esap fis, pwal mine a witiwiti esap tori,

a foleni pwal eman lein nöün kewe,

tori a wattela o nönnö ngeni eman nienifön laion.

6 Iwe, lupwen a watte, a aniffetal lein ekewe laion,

a kaiö usun an epwe liapeni liapan o ochei aramas.

7 A atai ekewe imwen maun mi pöchökül me ar kewe telinimw.

Iwe, chon ewe fanü meinisin ra fokun niuokus

ren osomongun an wörüwör.

8 Mürin, chon ekewe mwün ünükün ra feito seni ekis meinisin,

pwe repwe maun ngeni.

Ra aturala ar toloia won

o atupwalong lon tuwer pwang.

9 Iwe, ra riri ngeni efoch selimächä

o isenalong lon eu tittin man.

Ra pwal uweela ren ewe kingen Papilon

o aturalong lon imwen fötek,

pwe esap chüen wor eman epwe rongorong wörüwörün

me won ekewe chukun Israel.

10 Inom a usun chök efoch irän wain lon eu tanipin wain,

a fot ünükün eu koluk, a pwal uaöch o palapal

pokiten chomongun ewe koluk.

11 Iwe, palan kewe ra fokun pöchökül

o fich ngeni wokun king.

Ewe irän wain a märitä pwe a langatamatä tori ekewe kuchu.

Aramas meinisin ra küna tekian me chomongun palan.

12 Nge eman a üttätä ewe irän wain fän an song

o aturala won pwül.

Iwe, asepwälin ötiu a eniti pwe a pwasala,

uan ra mworomworotiu, nge palan kewe mi pöchökül ra pwasala o kekila ren ekkei.

13 Nge iei ewe irän wain a fotetiu lon fanüapö

lon eu pwül mi pwas.

14 Iwe, ekkei a ngetewu me lon palan o kenala uan,

pwe esap chüen wor efoch palan mi pöchökül

a fich ngeni wokun king.”

Iei echö kölün kechü aramas repwe eäni kölün kechü.