1 Iwe, lon mwün Tafit a fis eu lengita lon ükükün ülüngat ier. Iei mine Tafit a churi ewe Samol mi Lapalap ren ei mettoch. Nge ewe Samol mi Lapalap a üra, “Saul me chon leimwan ra tipisin nimanau, pun Saul a niela chon Kipeon.” 2 Ekewe chon Kipeon sap ir aramasen Israel, nge ir chokewe mi chüen manau me lein ekewe chon Amor. Ekewe aramasen Israel ra pwon fän akapel pwe repwe tümwünüür, nge Saul a ekiekin aroserela lon an tiliken fän iten ekewe aramasen Israel me Juta. Iwe, ewe king Tafit a titi ekewe chon Kipeon ✡ Jos 9.3-15 3 o aisiniir, “Met üpwe föri fän itemi? Met üpwe eäni ächächä, pwe oupwe afeiöchü nöün ewe Samol mi Lapalap kewe aramas?” 4 Nge ekewe chon Kipeon ra üreni, “Ei föför mi fis lefilem me Saul me chon leimwan esap wes ren silifer ika kolt. Äm aisap pwal mochen pwe chon Israel repwe mäla.” Mürin, Tafit a ais, “Met chök üpwe föri fän itemi?” 5 Iwe, ekewe chon Kipeon ra üreni ewe king, “Ewe mwän Saul a nikeemila o ekiekin arosakeemila, pwe esap chüen wor leniem lon unusen fanüen chon Israel. 6 Iei mine kopwe mwüt ngenikem füman mwän seni mwirimwirin Saul, pwe aipwe forusirela me fän mesen ewe Samol mi Lapalap lon Kipea ewe telinimwen Saul, ewe king ewe Samol mi Lapalap a filätä.” Iwe, ewe king a üra, “Üpwe ngenikemi ekewe mwän.”

7 Nge ewe king Tafit a achika Mefiposet nöün Jonatan we, nge Jonatan nöün Saul, pokiten ewe pwon a fis fän iten ewe Samol mi Lapalap lefilen i me Jonatan. ✡ 1.Sam 20.15-17; 2.Sam 9.1-7 8 Iwe, ewe king a angei nöün Rispa kewe ruoman mwän a nöüni me won Saul iter Armoni me Mefiposet. Rispa nöün Aia we fefin. A pwal angei nöün Merap kewe limman mwän a nöüni me won Atriel nöün Parsilai we mwän ewe re Meholat. Merap nöün Saul we fefin. ✡ 1.Sam 18.19 9 Iwe, a ngeni ekewe chon Kipeon ekewe füman mwän, nge ekewe chon Kipeon ra forusirela me won ewe chuk me fän mesen ewe Samol mi Lapalap. Ekei füman mwän ra mäpök, ra ninnila lepoputän fansoun kinikin föün parli.

10 Mürin, Rispa nöün Aia we fefin a angei mangaku seni tuk o emeresala, pwe kian won ewe achau ia ekewe mi for ra nom ie. Iwe, a nom ikenan seni lepoputän fansoun kinikin tori üt a püngütiu won ekewe somä. Esap mwüt ngeni ekewe machang pwe repwe sotiu won ekewe somä lerän, esap pwal mwüt ngeni ekewe manmwacho pwe repwe feito lepwin o ocheer. 11 Nge lupwen Tafit a rongorong mine Rispa ülüpwülüen Saul we a föri, 12 a feila o angei chün Saul me chün Jonatan nöün Saul we mwän seni ekewe re Japes-kiliat. (Ir ätekewe mi angei lemonomon inisin Saul me Jonatan seni lukalapen ewe telinimw Petsan, ia ekewe chon Filistia ra forusirela ie lon ewe ränin ra niela Saul me won ewe chuk Kilpoa.) ✡ 1.Sam 31.8-13 13 Mürin, Tafit a uwato seni ikenan chün Saul me chün Jonatan, a pwal achufengeni chün ekewe füman mwän mi for. 14 Iwe, ra peiaseni chün Saul me chün Jonatan lon peiasen Kis semen Saul we lon Sela fanüen ekewe chon Peniamin. Ra föri meinisin mine ewe king a allük ngeniir. Mürin, Kot a aüselinga ekewe tüngor fän iten ewe fanü.

15 Iwe, a fissefäl maun lefilen ekewe chon Filistia me ekewe chon Israel. Tafit me nöün kewe sounfiu ra feila o maun ngeni ekewe chon Filistia. Lon ei otun Tafit a popuetä malülü. 16 Iwe, Ispi-penop eman mwirimwirin ekewe mwänämong a wokuni efoch siles ükükün choun ina epwe fisu esop paun piras, a pwal rietä won wänükün efoch ketilas minefö. Ätei a ekiekin niela Tafit. 17 Nge Apisai nöün Seruia we mwän a feito pwe epwe alisi Tafit. Iwe, a fiu ngeni ewe re Filistia o niela. Mürin, nöün Tafit kewe mwän ra tüngormau ngeni Tafit pwe esap chüen etiir le maun, pwe esap kunula än chon Israel apilükülük. ✡ 1.King 11.36; Kölf 132.17

18 Mürin ei a fissefäl maun ngeni ekewe chon Filistia lon Kop. Iwe, Sipekai ewe re Husa a niela Saf, eman me lein mwirimwirin ekewe mwänämong. 19 A pwal fissefäl maun ngeni ekewe chon Filistia lon Kop. Nge Elhanan nöün Jair we mwän, eman re Petleem, a niela Koliat ewe re Kat, ätei a wokuni efoch siles, ilon a nönnö ngeni öwün efoch waaseres. 20 Iwe, a pwal fissefäl maun lon Kat, ia a nom ie eman mwän mi fokun tam. A wor wonofoch aütün pöün me ruofoch pwal wonofoch aütün pechen me ruofoch, pwe a wor ükükün rüe me fofoch aütün. Ätei pwal eman mwirimwirin ekewe mwänämong. 21 Lupwen ätei a turunufasei chon Israel, Jonatan nöün Simea we mwän a niela. Nge Simea pwin Tafit. 22 Ekei föman mwän ir mwirimwirin ekewe mwänämong lon Kat. Iwe, ra ninnila ren Tafit me nöün kewe sounfiu.