1 Iwe, Tafit a achufengenisefäli ekewe re Israel meinisin mi kefil ükükür ilik ngeröü. 2 Mürin, Tafit me ekei aramas meinisin ra feila Pala lon Juta, pwe repwe angei seni ikenan än Kot we pworofel mi iteni iten ewe Samol mi Unusen Manaman, ewe mi mot won an lenien motun king asen ekewe kerop mi nom won ewe pworofel. ✡ Eks 25.22 3 Iwe, ra angei än Kot we pworofel me lon imwen Apinatap mi nom won ewe chuk, o anomu won efoch minefön woken. Nge Usa me Ahio nöün Apinatap kewe mwän ra wisen uwei ewe minefön woken, ✡ 1.Sam 7.1-2 4 ia än Kot we pworofel a nom ie. Iwe, Ahio a feila mwen ewe pworofel. 5 Nge Tafit me chon Israel meinisin ra pworuk fän ar pöchökül me fän mesen ewe Samol mi Lapalap ren köl me tikin ükülele me kitar, pwal ren sokopaten pisekin kaktai. 6 Iwe, lupwen ra tori än Nakon lenien wichiwich umwun wiich, Usa a aitewu pöün o amwöchü än Kot we pworofel, pun ekewe ätemwänin kow ra chepetek. 7 Nge ewe Samol mi Lapalap a song ngeni Usa o niela me ikenan, pun a aitiewu pöün o amwöchü ewe pworofel. Iwe, Usa a mäla ikenan ünükün än Kot we pworofel. 8 Iei mine ewe leni a iteni Peres-usa * Peres-usa wewen Usa a küna apwüng tori ikenai. Mürin, Tafit a riaföü, pokiten ewe Samol mi Lapalap a niela Usa. 9 Lon ewe ränin Tafit a niuokusiti ewe Samol mi Lapalap o apasa, “Ifa usun, än ewe Samol mi Lapalap we pworofel epwe tongeni nom rei?” 10 Iei mine Tafit esap mochen angei än ewe Samol mi Lapalap we pworofel pwe epwe uwalong lon Jerusalem. Nge a uwala ngeni imwen Opet-etom ewe re Kit. 11 Iwe, än ewe Samol mi Lapalap we pworofel a nonom lon imwen Opet-etom ewe re Kit lon ükükün ülüngat maram. Nge ewe Samol mi Lapalap a afeiöchü Opet-etom me chon leimwan meinisin. ✡ 1.Kron 26.4-5

12 Iwe, eman a asile ngeni ewe king Tafit, “Ewe Samol mi Lapalap a afeiöchü chon leimwen Opet-etom me meinisin mine a eäni, pokiten än Kot we pworofel a nom ren.” Iei mine Tafit a feila, a uwei än Kot we pworofel seni imwen Opet-etom o uwala ngeni Jerusalem fän pwapwa. 13 Nge lupwen ekewe mwän mi eki än ewe Samol mi Lapalap we pworofel ra aipwala woneipw, Tafit a öürela o eäni asor eman ätemwänin kow me eman nienifön kow mi kitinup. 14 Iwe, Tafit a pworuk fän mesen ewe Samol mi Lapalap fän an pöchökül, nge a üföüf echö üf mi pwechepwech itan efot. 15 Iei usun Tafit me chon Israel meinisin ra uwala än ewe Samol mi Lapalap we pworofel fän mweireir me tikin rappwa.

16 Iwe, lupwen ra mwärelong än ewe Samol mi Lapalap we pworofel lon Jerusalem, Mikal nöün Saul we fefin a newu seni ewe asammwacho o küna ewe king Tafit pwe a mwetemwet o pworuk fän mesen ewe Samol mi Lapalap. Iwe, a turunufasei Tafit lon lelukan. 17 Iwe, ra uwato än ewe Samol mi Lapalap we pworofel o uwalong lon ewe imw mangaku Tafit a aüetä fän iten ewe pworofel. Mürin, Tafit a eäni asoren kek me asoren kinamwe ngeni ewe Samol mi Lapalap. 18 Lupwen Tafit a wes le eäni ekewe asoren kek me asoren kinamwe, a afeiöchü ekewe aramas fän iten ewe Samol mi Unusen Manaman. 19 Iwe, a aineti efoch pilawa, eu kinikinin fituk me echö nokop seni föün wain mi apwas ngeni eman me eman mwän me fefin me lein ewe mwicheichen aramasen Israel. Mürin, ekewe aramas meinisin ra liwiniti en me imwan.

20 Lupwen Tafit a liwiniti imwan pwe epwe afeiöchü chon an famili, Mikal nöün Saul we fefin a towu pwe epwe churi. Iwe, a üra, “Mwa met, ewe kingen Israel a püsin aitöchü ikenai. A püsin aselelai ikenai me fän mesen ekewe chon angang fefin nöün nöün kewe nöüwis, usun eman mi akkochofäsä a säwemang le püsin aselelai.” ✡ 1.Kron 16.43 21 Mürin, Tafit a üreni Mikal, “Ngang üa pworuk fän mesen ewe Samol mi Lapalap mi filiei mwen semom pwal mwen chon leimwan meinisin, pwe epwe seikieitä samolun chon Israel nöün ewe Samol mi Lapalap aramas. Iei mine üpwe pworuk fän mesen ewe Samol mi Lapalap. 22 Üpwe atekisonaei lap seni ei. Üpwe itengau me reöm, nge ren ekewe föpwül ka kapas usur üpwe iteüöch rer.” 23 Iwe, Mikal nöün Saul we fefin a rit tori ränin an mäla.