1 Iwe, lon ükükün rüe ier Salomon a aüetä imwen ewe Samol mi Lapalap me püsin imwan. 2 Salomon a pwal aüsefälietä ekewe telinimw Hairam a ngeni, o alenia aramasen Israel lor.

3 Iwe, Salomon a feila Hamat-sopa o liapeni. 4 A aüsefälietä Palmira me lon ewe fanüapö me ekewe telinimw meinisin lon Hamot, ia a nom ie an kewe lenien iseis pisek. 5 A pwal aüsefälietä Pet-horon-asan me Pet-horon-fan, pwe a pöchökül tittir, a pwal wor asamalaper me lokkur. 6 Iwe, a aüsefälietä Palat me ekewe telinimw meinisin ia a nom ie an kewe lenien iseis pisek, pwal ekewe telinimw fän iten wan woken me nöün oris. Salomon a pwal aüetä meinisin mine a chök mochen me lon Jerusalem, lon Lepanon, pwal lon unusen ewe fanü a nemeni. 7 Salomon a nöüni chon angang ekewe aramas mi chüen manau seni ekewe chon Hit, chon Amor, chon Peris, chon Hiw me chon Jepus. Ir sap aramasen Israel, 8 nge mwirimwirin chokewe mi chüen manau lon ewe fanü, ekewe aramasen Irael resap aroserela. Ikkei ir chokewe ra angangen kinroosi ngeni Salomon, usun a chüen fis tori ikenai. 9 Nge ekewe aramasen Israel resap angangen kinroosi ngeni Salomon, pwe ra nöün sounfiu, nöün meilap, chon nemeni wan woken me nöün chon wawa oris. 10 Iwe, iteiten nöün ewe king Salomon kewe nöüwis mi nemeni ekei chon angang ükükün ruopükü lime.

11 Iwe, Salomon a uwala pwülüan nöün Farao we fefin seni ewe telinimwen Tafit ngeni ewe imw i a aüetä fän itan, pun a apasa, “Pwülüei esap nom lon imwen Tafit ewe kingen Israel, pun ekewe leni ra pin, ia än ewe Samol mi Lapalap pworofel a nom ie.”

12 Mürin, Salomon a eäni asoren kek ngeni ewe Samol mi Lapalap won än ewe Samol mi Lapalap rongen asor i a senätä me mwen kengkangen ewe imwenfel. 13 A eäni asor ükükün mine a wisen eäni lon eu me eu rän, usun mine Moses a allük fän iten ekewe ränin sapat, fansoun popun maram me ekewe ülüngat fansoun chulap mi fis iteiten ier: ewe chulapen mongö pilawa esap wor iis lon, ewe chulapen kini mwen uän irä me ewe chulapen likachoch. ✡ Num 28.9-10; Num 28.11-15; Eks 23.14-17; 34.22-23; Num 28.16–29.39; Tut 16.16 14 Iwe, Salomon a awisa ekewe mwichen souasor ngeni ar angang, usun Tafit saman we a fen apwüngala. A awisa ekewe mwän seni ewe ainangen Lefi, pwe repwe kölün mwareiti Kot o alisi ekewe souasor lon ewe angang ra wisen föri iteiten rän. A pwal awisa ekewe mwichen chon mamas, pwe repwe mamasa ekewe asamalapen imwenfel, pun iei usun Tafit ewe aramasen Kot a fen allük. 15 Iwe, ra tichik le föri mine ewe king Tafit a allük ngeni ekewe souasor me ekewe mwän seni ewe ainangen Lefi usun ekewe sokopaten angang, pwal usun ekewe lenien iseis.

16 Iei usun än Salomon angang meinisin ra fis, seni ewe fansoun a popuetä longolongun imwen ewe Samol mi Lapalap tori a awesöchüela. Iwe, imwen ewe Samol mi Lapalap a unusöch.

17 Mürin, Salomon a feila Esion-keper me Elat arun ewe matau lon ewe fanü Etom. 18 Iwe, ewe king Hairam a tinala ren Salomon sip mi nom fän nemenien nöün meilap, pwal sälo mi repi lematau. Iwe, ra saila Ofair fiti nöün Salomon kewe chon angang o uwato seni ikenan ina epwe ükükün engol me wonu ton kolt ren ewe king Salomon.