31
Farao me nöün aramas repwe feiengau
31.1-18
1 Lon engol me aeuin ierin ach oola, lon aeuin ränin ewe aülüngatin maram, ewe Samol mi Lapalap a kapas ngeniei, 2 “Nöün aramas, kopwe üreni Farao kingen Isip me nöün mwicheichen aramas:
Iö ka wewe ngeni
lon om ling me itetekia?
3 Üpwe awewe ngonuk Asiria.
Me lom a usun efoch irä setar won Lepanon.
Iwe, palen ewe setar ra fokun mwuresires,
a pwal fokun tekia pwe ülülan a tori lein kuchu.
4 Ekewe koluk ra achöchönü,
nge kolukun fän pwül a amärätä pwe a tekiatä.
Chanpupu ra pupu ünükün,
nge an kewe öüwö ra pula ngeni ekewe lusun irän lemäl meinisin.
5 Iwe, a tekia seni ekewe irän lemäl meinisin,
nge palan ra fokun öümong
o mwuresires pokiten chomongun ewe koluk.
6 Ekewe machang meinisin ra fas won palan,
ekewe mönün lemäl ra nöünöü fan,
nge chomong mwü mi tekia ra nonom fän nürün.
7 Ewe setar a fokun mürina
ren tekian me langatamen palan,
pun waran ra feitiu tori ekewe kolukun fan.
8 Ekewe setar lon tanipin Kot resap mürina seni,
ekewe palen saipires resap wewe ngeni palan,
fasaren ekewe irä plein resap pwal wewe ngeni fasaran.
Ewer, esap wor efoch irä lon ewe tanipin Kot a wewe ngeni lingan. ✡ Ken 2.9
9 Üa alinga pwe a mwuresires,
nge ekewe irän Eten meinisin lon tanipin Kot ra lolowoiti.
10 Iei ngang Kot ewe Samol mi Lapalap üa apasa: Pokiten ewe setar a fokun tekia, pwe ülülan a tori lein kuchu, pwal pokiten a lamalamtekia ren tekian, 11 üa asechala ngeni eman sounemenemen ekewe mwü. I a wesewesen liwini ngeni ükükün liwinin an föföringau. Ngang üa pöütala, 12 nge chon ekis seni ekewe mwü mi fokun eniwokus ra pöküela o likitala. Palan kewe ra turutiu won ekewe chuk, pwal lon ekewe lemol, nge ülün kewe ra kup o turutiu lepekin chanpupun ewe fanü meinisin. Iwe, aramas meinisin won fanüfan ra towu seni fän nürün o likitala. 13 Ekewe machang meinisin ra so won ewe irä mi turula, nge mönün lemäl meinisin ra nom lein palan kewe. 14 Iei mine esap chüen wor efoch irä mi mär ünükün ekewe koluk epwe tekiatä, pwe ülün epwe tori lein ekewe kuchu. Esap pwal chüen wor irä mi pöchökül ünükün ekewe koluk repwe üwenewenetä o tekia. Pun ir meinisin repwe mäla, repwe feitiu leutun fanüfan ren ekewe somä ren chokewe mi fen feitiu lon lenien sotup.”
15 Iei alon Kot ewe Samol mi Lapalap, “Lon ewe rän, lupwen a feitiu lon lenien sotup, üa pwölüela ekewe kolukun fän pwül ren letipeta, üa pwal pinei ekewe chanpupu, pwe resap chüen pula. Iwe, üa pwölüela Lepanon fän rochopwak, nge ekewe irän lemäl meinisin ra pwasala pokitan. 16 Üa achecha ekewe mwün fanüfan ren akürangen an tur, lupwen üa aturätiu lon lenien sotup ren chokewe mi fen nom lon. Lon ewe fansoun ekewe irän Eten, pwal ekewe irä mi fokun mürina o chöchön ren üt me won Lepanon mi fen nom leutun fanüfan ra chipila ren an tur. 17 Iwe, chokewe mi nom fän nürün me chon pelieni me lein ekewe mwü ra eti le feitiu lon lenien sotup ren chokewe mi mäla lon maun. 18 Meni lein ekewe irän Eten ka wewe ngeni lon lingom me om itetekia? Nge pwal en kopwe eti ekewe irän Eten le turutiu leutun fanüfan, kopwe kon lein chokewe resap sirkomsais, pwal lein chokewe ra mäla lon maun. Iei usun mine epwe fis ngeni Farao me nöün mwicheichen aramas,” iei alon Kot ewe Samol mi Lapalap.