57
Eu iotekin tüngor alilis
57.1-11
(1.Sam 22.1; 24.3)
Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl, lupwen a sü seni Saul o sülong lon ewe föimw.
1 Kopwe ümöümöch ngeniei, ai Kot, kopwe ümöümöch ngeniei,
pun üa eänuk lenien op.
Üa op fän nürün poum,
tori ewe mölümölün feiengau a feil seniei.
2 Üa siö ngeni Kot, Ewe mi Unusen Tekia,
ewe Kot mi alisiei lon mettoch meinisin.
3 I epwe tinato an alilis seni läng o amanauaei,
i epwe akufu chokewe mi chök tatapweriei.
Kot epwe tinato an we tong ellet me an allükülük ngeniei.
4 Chon oputaei mi wewe ngeni laion mi mwäräräiti le ochei aramas ra pwelifeiliei,
ngir ra usun chök siles me föün esefich,
nge chönawer ra usun chök ketilas mi ken.
5 Ai Kot, kopwe pwäri om tekia asen ekewe läng.
Om ling epwe pwä won unusen fanüfan.
6 Chon oputaei ra anomu eu sär fän itei.
Ai osukosuk a chouitiei.
Ra tuw eu pwang lon alei,
nge ra püsin turulong lon.
7 Üa apilükülükuk, ai Kot, üa apilükülükuk,
üpwe köl o mwareituk.
8 Ngüni, kopwe pwök,
ekewe kitar me ükülele repwe pwök.
Üpwe apwökü mallen rän.
9 Ai Samol, üpwe kilisou ngonuk me lein ekewe mwichen aramas,
üpwe kölün mwareituk me lein chon ekewe mwü.
10 Pun om tong ellet a tekia seni ekewe läng,
om allükülük a tori ekewe kuchu.
11 Ai Kot, kopwe pwäri om tekia asen ekewe läng.
Om ling epwe pwäla won unusen fanüfan.