1 Iwe, lon ewe rän, lupwen Moses a wes le aüetä ewe imwenfel, a pwal apiti o apini fiti pisekin meinisin. A pwal apiti o apini ewe rongen asor fiti pisekin meinisin. 2 Mürin, ekewe souemwenin Israel, ir mwänirelan ar cho pwal souemwenin ar kewe ainang mi nemenem won chokewe mi alea, 3 ra uwato ar kewe asor ngeni ewe Samol mi Lapalap: wonofoch woken mi imweimw me engol me ruoman ätemwänin kow, efoch woken nge ruoman souemwen, pwal iteiten eman me eman souemwen nge eman ätemwänin kow. Ra uweereto leasamalapen ewe imwenfel seni mangaku. 4 Mürin, ewe Samol mi Lapalap a üreni Moses, 5 “Kopwe angei ekei asor seniir o ngeni ekewe mwän seni ewe ainangen Lefi pwe repwe aea le angang ngeni ewe imwenfel seni mangaku fän awenewenen en me wisan.” 6 Iwe, Moses a angei ekewe woken me ekewe ätemwänin kow o ngeni ekewe mwän seni ewe ainangen Lefi. 7 Iwe, a ngeni nöün Kerson kewe mwän ruofoch woken me föman ätemwänin kow fän awenewenen angangen wiser kewe. 8 Nge fofoch woken me waluman ätemwänin kow a ngeni nöün Merari kewe mwän fän awenewenen angangen wiser kewe. Ir meinisin ra nom fän nemenemen Itamar nöün ewe souasor Aaron we mwän. 9 Nge nöün Kohat kewe mwän esap ngeniir och, pun ir ra wisen tümwünü ekewe mettoch mi pin repwe mwärei won afarer. 10 Lon ewe rän, lupwen ewe rongen asor a kepit, ekewe souemwen ra pwal uwato ar kewe asor fän iten apinipinin ewe rongen asor o anomu mwen ewe rongen asor. 11 Pun ewe Samol mi Lapalap a üreni Moses, “Kopwe üreniir pwe repwe uwato ar kewe asor fän iten apinipinin ewe rongen asor, eman souemwen nge eu rän.”

12 Iwe, lon aeuin rän Nason nöün Aminatap we mwän seni ewe ainangen Juta a uwato an asor. 13 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina a nofit ngeni apüra pwe asoren mongö. 14 A pwal eäni asor eu sepi seni kolt ükükün choun rüanü aunus, a ur ren apach mi pwokus, 15 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 16 A pwal eäni asor eman ätemwänin kuuch fän iten asoren tipis, 17 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Nason nöün Aminatap we mwän.

18 Iwe, lon aruuen rän Netanel nöün Suar we mwän ewe souemwenin ewe ainangen Isakar a uwato an asor. 19 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 20 A pwal eäni asor eu sepi seni kolt ükükün choun rüanü aunus, a ur ren apach mi pwokus, 21 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 22 A pwal eäni asor eman ätemwänin kuuch fän iten asoren tipis, 23 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Netanel nöün Suar we mwän.

24 Nge lon aülüngatin rän Eliap nöün Helon we mwän ewe souemwenin ewe ainangen Sepulon a uwato an asor. 25 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 26 A pwal eäni asor eu sepi seni kolt ükükün choun rüanü aunus, a ur ren apach mi pwokus, 27 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 28 A pwal eäni asor eman ätemwänin kuuch fän iten asoren tipis, 29 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Eliap nöün Helon ewe mwän.

30 Iwe, lon arüanün rän Elisur nöün Seteur we mwän, ewe souemwenin ewe ainangen Rupen a uwato an asor. 31 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 32 A pwal eäni asor eu sepi seni kolt ükükün choun rüanü aunus, a ur ren apach mi pwokus, 33 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 34 A pwal eäni asor eman ätemwänin kuuch fän iten asoren tipis, 35 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Elisur nöün Seteur we mwän.

36 Nge lon alimuen rän Selumiel nöün Surisatai we mwän, ewe souemwenin ewe ainangen Simeon a uwato an asor. 37 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 38 A pwal eäni asor eu sepi seni kolt ükükün choun rüanü aunus, a ur ren apach mi pwokus, 39 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 40 A pwal eäni asor eman ätemwänin kuuch fän iten asoren tipis, 41 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Selumiel nöün Surisatai we mwän.

42 Iwe, lon awonuen rän Eliasaf nöün Teuel we mwän, ewe souemwenin ewe ainangen Kat a uwato an asor. 43 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 44 A pwal eäni asor eu sepi seni kolt ükükün choun rüanü aunus, a ur ren apach mi pwokus, 45 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 46 A pwal eäni asor eman ätemwänin kuuch fän iten asoren tipis, 47 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Eliasaf nöün Teuel we mwän.

48 Nge lon afisuen rän Elisama nöün Amihut we mwän, ewe souemwenin ewe ainangen Efraim a uwato an asor. 49 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 50 A pwal eäni asor eu sepi seni kolt ükükün choun rüanü aunus, a ur ren apach mi pwokus, 51 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 52 A pwal eäni asor eman ätemwänin kuuch fän iten asoren tipis, 53 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Elisama nöün Amihut we mwän.

54 Iwe, lon awaluen rän Kamaliel nöün Petasur we mwän, ewe souemwenin ewe ainangen Manasa a uwato an asor. 55 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 56 A pwal eäni asor eu sepi seni kolt ükükün choun rüanü aunus, a ur ren apach mi pwokus, 57 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 58 A pwal eäni asor eman ätemwänin kuuch fän iten asoren tipis, 59 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Kamaliel nöün Petasur we mwän.

60 Nge lon atiuen rän Apitan nöün Kiteoni we mwän, ewe souemwenin ewe ainangen Peniamin a uwato an asor. 61 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 62 A pwal eäni asor eu sepi seni kolt ükükün choun rüanü aunus, a ur ren apach mi pwokus, 63 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 64 A pwal eäni asor eman ätemwänin kuuch fän iten asoren tipis, 65 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Apitan nöün Kiteoni we mwän.

66 Iwe, lon aengolun rän Ahieser nöün Amisatai we mwän, ewe souemwenin ewe ainangen Tan, a uwato an asor. 67 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 68 A pwal eäni asor eu sepi seni kolt ükükün choun rüanü aunus, a ur ren apach mi pwokus, 69 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 70 A pwal eäni asor eman ätemwänin kuuch fän iten asoren tipis, 71 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Ahieser nöün Amisatai we mwän.

72 Nge lon engol me aeuin rän Pakiel nöün Okran we mwän, ewe souemwenin ewe ainangen Aser, a uwato an asor. 73 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 74 A pwal eäni asor eu sepi seni kolt ükükün choun rüanü aunus, a ur ren apach mi pwokus, 75 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 76 A pwal eäni asor eman ätemwänin kuuch fän iten asoren tipis, 77 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Pakiel nöün Okran we mwän.

78 Iwe, lon engol me ruuen rän Ahira nöün Enan we mwän, ewe souemwenin ewe ainangen Naftali, a uwato an asor. 79 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö. 80 A pwal eäni asor eu sepi seni kolt ükükün choun rüanü aunus, a ur ren apach mi pwokus, 81 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek. 82 A pwal eäni asor eman ätemwänin kuuch fän iten asoren tipis, 83 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Ahira nöün Enan we mwän.

84 Iwe, ie ükükün asoren apinipinin ewe rongen asor seni ekewe souemwenin Israel lon ewe rän a kepit: engol me ruu peleich seni silifer, engol me ruu sepi seni silifer pwal engol me ruu sepi seni kolt. 85 Iwe, ükükün choun eu me eu peleich seni silifer ülüngat eu lerüanü paun, nge ükükün choun eu me eu sepi seni silifer eu ülüngat lerüanü paun, pwe ükükün choun ewe silifer seni ekewe sepi meinisin wone paun, a för won ewe kilo ra aea le aükük lon ewe imw mi pin. 86 Iwe, ükükün choun eu me eu ekewe engol me ruu sepi seni kolt mi ur ren apach mi pwokus rüanü aunus, a för won ewe kilo ra aea le aükük lon ewe imw mi pin. Nge ükükün choun ewe kolt seni ekewe sepi meinisin ülüngat paun. 87 Iwe, ükükün ekewe man fän iten ewe asoren kek: engol me ruoman ätemwänin kow, engol me ruoman ätemwänin sip me engol me ruoman ätemwänin lam eu ierir repwe chu ngeni ekewe asoren mongö, pwal engol me ruoman ätemwänin kuuch fän iten asoren tipis. 88 Nge ükükün ekewe man fän iten ewe asoren kinamwe: rüe me föman ätemwänin kow, wone ätemwänin sip, wone ätemwänin kuuch me wone ätemwänin lam eu ierir. Iei ükükün asoren apinipinin ewe rongen asor mürin an kepit.

89 Iwe, lupwen Moses a tolong lon ewe imw mangaku ia aramas ra churi Kot ie, pwe epwe kapas ngeni ewe Samol mi Lapalap, a rongorong eu möngüngü a fosowu seni lefilen ekewe ruoman kerop mi nom won öppüngün ewe pworofel. Iwe, Kot a kapas ngeni Moses.