1 Iwe, lon ewe fansoun ewe Sisar Aukustus a atowu eu allük pwe epwe wor eu makken it lon ekewe fanü meinisin mi nom fän nemenien Rom. 2 Iei aeuin makken it lupwen Kirenius a kepinan Siria. 3 Iwe, aramas meinisin ra feila lon en me an telinimw pwe repwe makkei iter. 4 Iwe, Josef a pwal feila seni ewe telinimw Nasaret lon Kalilea, nge a feitä Jutea lon ewe telinimwen Tafit itan Petleem, pun i eman mwirimwirin Tafit. 5 A feila ikenan pwe epwe mak itan fiti Maria kofotun we mi pwopwo. 6 Nge lupwen ar nonom ikenan, a tori fansoun än neminewe epwe nöünöü. 7 Iwe, a nöünätiu nöün we mwänichi, a finitala lon roron o akonala lon eu lenien amongöü man, pun esap wor eu leni fän iter lon ewe imwen wasöla.

8 Iwe, mi wor ekoch chon mas sip ra nonom lemälen ewe fanü, ra tümwünü folenier pwiin sip lepwin. 9 Iwe, nöün ewe Samol we chon läng a pwä ngeniir o lingen ewe Samol a tinetiu wor, iwe, ra fokun niuokus. 10 Nge ewe chon läng a üreniir, “Ousap niuokus. Pun nengeni, üa arongato remi ewe Pworaus Allim mi aworato pwapwa chapur, epwe tori aramas meinisin. 11 Lon ei rän ikenai eman Chon Amanau a uputiu ngenikemi lon ewe telinimwen Tafit, i Kraist ewe Samol. 12 Nge ei epwe eu asisil ngenikemi: Oupwe küna eman mönükol a finifinila lon roron o konola lon eu lenien amongöü man.”

13 Lon ewe chök otun eu mwichen chomong chon läng ra nom ren ewe chon läng, ra mwareiti Kot o apasa, 14 “Kot epwe ling lon läng, epwe wor kinamwe won fanüfan ngeni aramas, chokewe Kot a pwapwa rer.” 15 Nge lupwen ekewe chon läng ra feila seniir o feitä läng, ekewe chon mas ra kapasfengen lefiler, “Ousipwe feila Petleem o nengeni ei mettoch a fisitä, ewe Samol a asile ngenikich usun.” 16 Iei mine ra feila fän pacheu, nge ra küna Maria me Josef, pwal ewe mönükol mi kon lon ewe lenien amongöü man. 17 Wesin ar küna ewe mönükol, ra asilefeili ewe pworaus ra rong usun ewe mönükol. 18 Iwe, aramas meinisin mi rong ei pworaus ra mairü ren met ekewe chon mas ra üreniir. 19 Nge Maria a amwöchü ekei mettoch meinisin o ekieki usur lon letipan. 20 Iwe, lupwen ekewe chon mas ra liwiniti lenier, ra alinga o mwareiti Kot fän iten ekewe mettoch ra rong o küna, pun a usun chök met ewe chon läng a asile ngeniir.

21 Lupwen a tori awaluen ränin ewe mönükol, wesin an sirkomsais, ra aita ngeni Jesus. Iei ewe it ewe chon läng a aita ngeni mwen Maria esamwo pwopwo. ✡ Lif 12.3; Luk 1.31

22 Iwe, lupwen a tori ewe fansoun ar repwe föri ewe angangen alimelim fän iter usun met a fen mak lon Allükün Moses, Josef me Maria ra uwala ewe mönükol Jerusalem pwe repwe anomu mwen mesen ewe Samol. 23 Pun iei usun a fen mak lon än ewe Samol Allük, “Iteiten mwänichi meinisin repwe pin fän iten ewe Samol.” ✡ Eks 3.2,12 24 Ra pwal uwato ar asor usun a mak lon än ewe Samol Allük: Ruoman lisom are ruoman apansüsün lisom. ✡ Lif 12.6-8

25 Lon ena fansoun mi wor eman mwän lon Jerusalem itan Simeon. Ätei a pwüng o aleasochisi än Kot kewe Allük meinisin, a pwal witiwiti ätewe epwe echipa Israel. Iwe, Ngünmifel a nonom won. 26 Ngünmifel a pwäri ngeni, pwe esap mäla mwen an epwe küna Kraist, ätewe Kot epwe tinato. 27 Simeon a feila lon ewe imwenfel fän emwenien Ngünmifel. Iwe, lupwen Josef me Maria ra uwala ewe mönükol Jesus lon ewe imwenfel pwe repwe föri fän itan met örünier lon pwüngün ekewe Allük, 28 Simeon a ekietä ewe mönükol fän mwärin, a mwareiti Kot o apasa, 29 “Ai Samol, iei ka apwönüetä om pwon, iei mine kopwe mwüt ngeni noumw chon angang pwe epwe feila fän kinamwe. 30 Pun üa küna ren mesei om angangen amanau, 31 ewe ka amolätä mwen mesen aramas meinisin. 32 Epwe eu saram mi pwärala letipom ngeni chon lükün Israel, nge epwe awarato ling ngeni noumw aramasen Israel.” ✡ Ais 42.6; 49.6; 52.10

33 Iwe, semen me inen ewe mönükol ra weitifengeniir ren ekewe kapas Simeon a apasa usun ewe ät. 34 Mürin Simeon a afeiöchüür o üreni Maria, “Nengeni, ei mönükol a fil me ren Kot pwe epwe eu lenien pöütüla me eu lenien küna manau fän iten chomong lon Israel. Ätei epwe pwal eu asisil me ren Kot chomong aramas repwe ü ngeni lon ar kapas, 35 pwe ekiekin chomong aramas epwe pwäla ren. Iwe, lolilen watte epwe akinasa lelukom, usun efoch ketilas a akinasa aramas.”

36 Iwe, mi pwal wor eman soufos fefin itan Anna nöün Fanuel seni ewe ainangen Aser. Ei fefin a fokun chinlap, ra manaufengen me pwülüan lon ükükün fisu ier chök mürin ar apwüpwülü. 37 Iwe, lupwen pwülüan a mäla, a lipichsefäl tori iei a ierini walik me rüanü. Neminei esap feila seni ewe imwenfel, pwe a chök fel ngeni Kot lerän me lepwin fän echikefel me ikiotek. 38 Lon ewe chök otun a wareitiir, a kilisou ngeni Kot o kapas usun ewe mönükol ngeni chokewe meinisin mi witiwiti än Kot epwe angasala Jerusalem.

39 Iwe, lupwen Josef me Maria ra wes le föri meinisin usun met mi mak lon än ewe Samol Allük, ra liwiniti Nasaret lon Kalilea, iei poputän telinimwer. ✡ Mat 2.23 40 Iwe, ewe ät a mämäritä o pöchökülela. A uren tipachem o än Kot feiöch a nonom won.

41 Iteiten ier semen me inen Jesus ra soun feila Jerusalem fän iten ewe chulapen Pasofer. ✡ Eks 12.1-27; Tut 16.1-8 42 Iwe, lupwen Jesus a ierini engol me ruu, a etiir le feila fiti ewe chulap lon pwüngün örünier. 43 Nge wesin ewe chulap ra liwiniti lenier, nge ewe ät Jesus a nomotiu Jerusalem. Iwe, saman me inan resap silei, 44 pun ra ekieki pwe a fiti ekewe mwichen aramas ra akom mwer. Iei mine ra fetal lon unusen ewe rän, mürin ra popuetä le kütta lein aramaser me chiechier kewe. 45 Nge lupwen resap küna, ra liwinsefäliti Jerusalem o kütta Jesus ikenan. 46 Mürin ülüngat rän ra küna me lon ewe imwenfel, pwe a mot lein ekewe sense, a aüseling ngeniir o kapas ais ngeniir. 47 Iwe, ir meinisin mi rongorong ngeni ewe ät ra mwar ren an weweöch me an silelap le pölüeni ekewe kapas ais. 48 Lupwen saman me inan ra küna, ra weitifengeniir. Iwe, inan we a üreni, “Nei, pwota ka föri iei usun ngenikem? Nengeni, semom me ngang aia lolilen me weires le küttok.” 49 Iwe, Jesus a pölüeni, “Pwota oua küttaei? Ousap silei pwe ngang üpwe fokun nonom lon imwen Semei?” 50 Nge ir resap weweiti mine a eäni kapas ngeniir. 51 Mürin Jesus a etiir le liwinsefäliti Nasaret, iwe, a aleasochis ngeniir. Nge inan a iseis ekei mettoch meinisin lon lelukan. 52 Iwe, Jesus a mämäritä lon an tipachem, lon inisin pwal lon an küna chenin me ren Kot o pwal me ren aramas kana. ✡ 1.Sam 2.26; SalF 3.4