1 Mürin än Ehut mäla, ekewe aramasen Israel ra pwal förisefäli mine a ngau me fän mesen ewe Samol mi Lapalap. 2 Iei mine ewe Samol mi Lapalap a asechirela ngeni Japin ewe kingen Kanaan mi nemenem lon Hasor. Iwe, ewe samolun nöün mwichen sounfiu itan Sisera, a imweimw lon Haroset-hakoim. 3 A wor ükükün tiupükü wän Sisera woken mi för seni mächä. Iwe, a fokun ariaföüü chon Israel lon ükükün rüe ier. Mürin, ekewe chon Israel ra siö ngeni ewe Samol mi Lapalap pwe epwe alisiir.

4 Lon ena fansoun Tepora ewe soufos fefin pwülüen Lapitot a soukapwüngün Israel. 5 Iwe, neminewe a soun momot fän efoch irä palm mi nom lefilen Rama me Petel won chukuchukutän ewe fanü Efraim. Iwe, ekewe aramasen Israel ra feito ren pwe epwe eäni ar kapwüng. 6 Lon eu rän, Tepora a titi Parak nöün Apinoam we mwän seni Ketes mi nom lon Naftali. Iwe, a üreni Parak, “Ewe Samol mi Lapalap, ewe Koten Israel a allük ngonuk, ‘Kopwe feila o amwichafengeni ükükün engol ngeröü mwän seni ekewe ainangen Naftali me Sepulon o emwenirela ngeni ewe chuk Tapor. 7 Üpwe panawu Sisera ewe samolun nöün Japin sounfiu. Epwe churuk me arun ewe chanpupu Kison fiti wan woken me nöün sounfiu. Iwe, üpwe föri met kopwe akufu ren.’ ” 8 Mürin, Parak a üreni Tepora, “Are en kopwe etiei, üpwe feila. Nge are kosap etiei, üsap feila.” 9 Iwe, Tepora a üra, “Üpwe fokun etuk. Nge ei sokun lapalap ka eäni, kosap ling ren, pun ewe Samol mi Lapalap epwe atolonga Sisera lepöün eman fefin.” Mürin, Tepora a ütä o eti Parak tori Ketes. 10 Iwe, Parak a amwichato chon ewe ainangen Sepulon me Naftali lon Ketes, nge ükükün engol ngeröü mwän ra tapwela mürin, pwal Tepora a eti.

11 Nge Heper ewe re Ken a imwü seni chon Ken ekewe mwirimwirin Hopap semen pwülüen Moses. Iwe, a aüetä imwan imw mangaku arun ewe irä ook lon Sananim, arap ngeni Ketes.

12 Iwe, lupwen Sisera a rongorong pwe Parak nöün Apinoam we mwän a feitä won ewe chuk Tapor, 13 a titi wan kewe woken meinisin ükükün tiupükü woken seni mächä, pwal nöün sounfiu meinisin mi nom fän nemenian, pwe repwe feila seni Haroset-hakoim tori ewe chanpupu Kison. 14 Mürin, Tepora a üreni Parak, “Kopwe feila. Pun iei ewe rän ewe Samol mi Lapalap a awinnok lon pwe kopwe akufu Sisera. Ifa usun, ewe Samol mi Lapalap esap akom mwom?” Iei mine Parak a feitiu seni ewe chuk Tapor, nge engol ngeröü mwän ra tapwela mürin. 15 Iwe, ewe Samol mi Lapalap a eniwa Sisera me nöün sounfiu meinisin mi wawa woken, lupwen Parak a maun ngeniir. Mürin, Sisera a tötiu seni wan woken o süla. 16 Nge Parak a tapweri ekewe woken me ekewe sounfiu tori Haroset-hakoim. Iwe, nöün Sisera sounfiu ra mäla meinisin ren ketilas. Esap wor eman a chüen manau.

17 Nge Sisera a sü ngeni imwen Jael pwülüen Heper ewe re Ken. Pun mi wor kinamwe lefilen Japin ewe kingen Hasor me ewe familien Heper ewe re Ken. 18 Iwe, Jael a towu seni imwan pwe epwe churi Sisera. A üreni, “Kopwe pwereto, ai samol, kopwe pwereto rei, nge kosap niuokus.” Iei mine a pwere ngeni o tolong lon ewe imw. Nge Jael a pwölüela fän echö planket. 19 Iwe, Sisera a üreni, “Kose mochen kopwe ngeniei ekis koluk pwe üpwe ünümi, pun üa kaka.” Nge neminewe a suki ewe lenien milik o aünü ngeni. Mürin a pwal pwölüela. 20 Nge Sisera a üreni Jael, “Kopwe ütä leasamalapen ewe imw, nge are eman aramas epwe feito o aisinuk ika eman a nom ikei, kopwe üreni, ‘Ap.’ ” 21 Mürin Jael pwülüen Heper a angei efoch chüfölün imw me efoch ama, a anifelong ren lupwen a kon o möürüchou ren an malülü, a amaanätiu ewe chuföl won esen mongön tori a pweretiu lepwül. Iwe, Sisera a mäla.

22 Lupwen Parak a tapweri Sisera, a tori imwen Jael. Neminewe a towu seni imwan pwe epwe churi. Iwe, a üreni, “Kopwe etto, üpwe apii ngonuk ewe mwän ka kütta.” Iei mine Parak a tolong lon imwan. Ikenan a küna Sisera a kon o mäla, nge efoch chüfölün imw a fotolong won esen mongön.

23 Lon ewe ränin, Kot a mwüt ngeni ekewe aramasen Israel pwe repwe akufu Japin ewe kingen Kanaan. 24 Iwe, ekewe aramasen Israel ra chök pöchökülela ngeni Japin ewe kingen Kanaan tori ra wesewesen niela.