2
Än Kot tong ngeni nöün aramas mi kirikiringau
2.1-23
1 Iwe, ämi aramas, oupwe aita ngeni pwimi kewe, “Ämi nöün Kot aramas,” nge oupwe aita ngeni fefinemi kewe, “Ämi oua küna chenimi me ren Kot.”
2 Nei, oupwe tüngormau ngeni inemi, inamwo ika i esap chüen pwülüeniei, nge ngang üsap chüen pwülüan. Oupwe tüngormau ngeni, pwe epwe ükütiu le föri föförün eman fin lisowu o emwen seni an kirikiringau. 3 Nge ika esap ükütiu, üpwe aseleloi o föri pwe epwe usun chök an selela lon ränin an uputiu. Üpwe föri pwe neminewe epwe wewe ngeni eu fanüapö me eu fanü mi pwas, iwe, epwe mäla ren an kaka. 4 Üsap pwal tongei nöün kana, pun ir nöün eman fin lisowu. 5 Iner we a kirikiringau, a nöüniir fän an föri föför mi ässäw, pun a apasa, “Üpwe tapwela mürin nei kewe kamwet mi ngeniei enei mongö me ünümei koluk, ai ülen man me mangaku mi pwechepwech, ai apüra seni föün olif me wain.” 6 Iei mine üpwe pineela alan ren iräfölüföl, üpwe epeti ngeni eu tit pwe esap tongeni küna alan. 7 Epwe tapwela mürin nöün kewe kamwet, nge esap toriir. Epwe kütteer, nge esap küneer. Mürin epwe apasa, “Üpwe liwiniti pwülüei akom, pun üa feiöch me mwan lap seni iei.” 8 Iwe, esap mochen mefi pwe ngang ätewe mi ngeni ewe wiich, ewe wain me ewe apüra seni föün olif, üa pwal ngeni chomong silifer me kolt. Nge i a aea ekei mettoch le fel ngeni ewe anü Paal. 9 Iei mine üpwe angeesefäli ai föün wiich me ai wain lupwen fansoun kinikin, üpwe pwal angei seni neminewe ai ülen man me mangaku mi pwechepwech üa fen ngeni pwe epwe pwölü ngeni an selela. 10 Iei üpwe aseleloi me fän mesen nöün kewe kamwet, nge esap wor eman me leir epwe tongeni amanaua seni lepei. 11 Üpwe aükätiu an kewe fansoun pwapwa meinisin, an kewe chulap mi watte me an kewe chulapen popun maram, an kewe ränin sapat me an kewe chulap meinisin mi kefilitä. 12 Üpwe ataela än neminewe kewe irän wain me an kewe irä fiik, a apasa usun pwe liwinin me ren nöün kewe kamwet. Üpwe awili an kewe tanipi ngeni eu wöllap, nge ekewe manmwacho repwe atarala. 13 Üpwe apwüngü neminewe fän iten ekewe rän a keni apach mi pwokus lon ngeni ekewe anü Paal, pwal fän iten an foutei ngeni ring me sokopaten fout o tapwela mürin nöün kewe kamwet, nge a manlükieila. Ngang ewe Samol mi Lapalap üa kapas.
14 Iei mine üpwe panala neminewe, üpwe emwenala lon ewe fanüapö o kapas pwetete ngeni. 15 Me ikenan üpwe aliwinisefäli ngeni an kewe tanipin wain o föri pwe ewe lemolun Akor * wewen Akor feiengau epwe wiliti eu asamen Apilüköch. Ikenan epwe kul letipan ngeniei usun chök leföpwülün, usun chök lon ewe fansoun lupwen a towu seni ewe fanü Isip. ✡ Jos 7.24-26 16 Lon ena rän epwe aita ngeniei pwe ngang pwülüan, nge esap chüen aita ngeniei pwe ngang an anü Paal. Ngang ewe Samol mi Lapalap üa kapas. 17 Üpwe aükätiu me lon awan iten ekewe anü Paal, pwe esap chüen föüni iter. 18 Lon ena fansoun üpwe eäni eu pwon ngeni ekewe manmwachon lemäl, ekewe machang me ekewe mantötö, pwe resap afeiengaua nei aramas. Üpwe kupi ewe esefich me ewe ketilas o aükätiu maun me lon ewe fanü. Üpwe föri pwe nei aramas repwe nom fän kinamwe.
19 Israel, üpwe angeek pwe pwülüei tori feilfeilachök.
Üpwe pwülüenuk lon pwüng me let,
lon tong ellet me ümöümöch.
20 Üpwe pwülüenuk fän allükülük,
nge en kopwe silei pwe ngang ewe Samol mi Lapalap.”
21 Iei alon ewe Samol mi Lapalap,
“Lon ena fansoun üpwe pälüeni än nei aramasen Jesrel † chon Jesrel wewen chon Israel iotek.
Seni läng üpwe apüngätiu üt won fanüfan.
22 Ewe fanü epwe awora wiich me wain me apüra seni föün olif,
pwe pälüen än chon Jesrel iotek.
23 Üpwe fotukätiu nei aramas lon ewe fanü o efefeitäär.
Üpwe pwäri ai chen ngeni chokewe mi iteni ‘Esechen’
o üreni chokewe mi iteni ‘Sap nei aramas’
pwe ir ‘Nei aramas’,
nge ir repwe üra, ‘En äm we Kot!’ ” ✡ Rom 9.25; 1.Pet 2.10