1 Iwe, a wor künaei seni Kot ewe Samol mi Lapalap. Üa küna pwe a föri epwi pwiin lifichimas mürin chök än ewe king fetil a pöküpök, nge ewe fetil mi fö ekärän pwükütä. 2 Üa küna pwe ekewe lifichimas ra eni fetilin ewe fanü meinisin. Mürin üa apasa, “Ai Kot, Samol mi Lapalap, üa tüngor ngonuk pwe kopwe amusala än noum aramas tipis. Ifa usun ar repwe tongeni manau? Ra fokun chokükün o apwangapwang.” 3 Mürin, ewe Samol mi Lapalap a siwili an ekiek o üra, “Mine ka küna esap fis.”

4 Iwe, a pwal wor künaei seni Kot ewe Samol mi Lapalap. Üa küna pwe Kot ewe Samol mi Lapalap a amolätä an epwe apwüngü nöün aramas ren ekkei. Iwe, ewe ekkei a apwasätä ewe matau mi alolol o popuetä le kenala ewe fanü. 5 Mürin üa apasa, “Ai Kot, Samol mi Lapalap, üa tüngor ngonuk pwe kopwe ükütiu le föri ei. Ifa usun än noum aramas repwe tongeni manau? Ra fokun chokükün o apwangapwang. 6 Iwe, ewe Samol mi Lapalap a siwili an ekiek o üra, “Mine ka küna esap pwal fis.”

7 Iwe, a pwal wor künaei seni ewe Samol. Üa küna pwe i a ütä ünükün eu tit eman a senätä ren efoch selin awenewen. Iwe, efoch selin awenewen a nom lepöün. 8 Iwe, ewe Samol mi Lapalap a aisiniei, “Amos, met ka küna?” Nge üa pälüeni, “Üa küna efoch selin awenewen.” Mürin, ewe Samol a apasa, “Üa aea ei selin awenewen pwe üpwe aiti ngeni nei aramasen Israel, pwe ra wewe ngeni eu tit mi pwor. Iwe, üsap chüen siwili ai ekiekin apwüngüür. 9 Ekewe leni mi tekia ia mwirimwirin Isaak ra fel ie repwe tala, ekewe leni mi pin lon Israel repwe tatakisitiu. Nge ngang üpwe ü ngeni chon leimwen Jeropoam o aükätiu mwün.”

10 Mürin, Amasia ewe souasor mi nom lon Petel a titila ren Jeropoam ewe kingen Israel o apasa, “Amos a rawangaueek lein chon Israel. An kapas a angauala chon ei fanü. 11 Pun iei usun alon Amos, ‘Jeropoam epwe fokun mäla lon maun, nge chon Israel repwe oola seni fanüer.’ ” 12 Iwe, Amasia a üreni Amos, “En soufos, kopwe feila me ikei o liwinla ngeni ewe fanü Juta, pwe kopwe küna anom ren om afalafal me ikenan. 13 Nge kosap chüen osunisefäli me lon Petel, pun ikei a nom än ewe king lenien fel me än ewe mwü imwenfel.” 14 Mürin, Amos a pälüeni Amasia, “Sap ngang eman soufos, sap pwal ngang eman nöün soufos. Ngei ngang chök eman chon masen sip me chon tümwünü ekewe irä sikamor. 15 Nge ewe Samol mi Lapalap a angeei seni ai wisen tümwünü pwiin sip o üreniei, ‘Kopwe feila o osuni ngeni nei aramasen Israel.’ 16 Iei kopwe rongorong mine ewe Samol mi Lapalap a üra. En ka apasa pwe üpwe ükütiu le osuni mine a ngau fän iten chon Israel, üsap pwal afalafala mine a ngau ngeniir. 17 Iei mine ewe Samol mi Lapalap a ürenuk, ‘Pwülüom we epwe wiliti eman fefin mi amömö inisin fän iten lisowu me lon ei telinimw, nge noum kewe mwän me fefin repwe mäla lon maun. Fanüom epwe aükük o ainet, nge en kopwe mäla lon eu fanü mi toau. Iwe, chon Israel repwe fokun oola seni fanüer.’ ”