1 Iwe, lon rüe me fisuen ierin mwün Jeropoam ewe kingen Israel, Ussia nöün Amasia we mwän a tolong lon wisan wisen king o nemeni Juta, 2 lupwen a ierini engol me wonu. A nom Jerusalem o nemenem lon ükükün lime me ruu ier. Iten inan Jekolia seni Jerusalem. 3 Iwe, Ussia a föri mine a pwüng me fän mesen ewe Samol mi Lapalap, usun chök Amasia saman we. 4 Nge ekewe lenien fel won ekewe leni tekia resap katala. Iwe, ekewe aramas ra chök sopwela le asor o keni ar apach mi pwokus wor. 5 Iwe, ewe Samol mi Lapalap a afeiengaua ewe king, pwe a üri rupun pwötür tori an mäla. A imwüla o nonom lon eu imw. Nge Jotam nöün ewe king we mwän a samolun chon leimwen ewe king o nemeni aramasen ewe fanü. 6 Nge lusun pworausen än Ussia föför meinisin a mak lon puken uruwon ekewe kingen Juta. 7 Iwe, Ussia a mäla, nge ra peiaseni ren an kewe lewo lon ewe telinimwen Tafit. Nge Jotam nöün we mwän a siwili lon wisan wisen king. ✡ Ais 6.1

8 Iwe, lon ilik me waluen ierin mwün Ussia ewe kingen Juta, Sekaria nöün Jeropoam we mwän a tolong lon wisan wisen king o nemeni Israel. A nom lon Samaria o nemenem lon ükükün wonu maram. 9 Nge Sekaria a föri mine a ngau me fän mesen ewe Samol mi Lapalap, usun semelapan kewe ra föri. Esap likitala ekewe tipis ewe king Jeropoam nöün Nepat we a föri, lupwen a emweni chon Israel ngeni tipis. 10 Iwe, Salum nöün Japes we mwän a rawangauei ewe king Sekaria o niela me lon Ipleam. Mürin a siwili lon wisan wisen king. 11 Nge lusun pworausen än Sekaria föför meinisin a mak lon puken uruwon ekewe kingen Israel. 12 Iei usun ewe pwon ewe Samol mi Lapalap a eäni ngeni Jehu a pwönüetä, “Mwirimwirum kana repwe nom lon ewe wisen king lon Israel tori arüanün tettelin aramas.” ✡ 2.King 10.30

13 Iwe, lon ilik me tiuen ierin mwün Ussia ewe kingen Juta, Salum nöün Japes we mwän a tolong lon wisan wisen king o nemeni Israel. A nom lon Samaria o nemenem lon ükükün eu maram. 14 Mürin, Menahem nöün Kati we mwän a feila seni Tirsa o feila Samaria. Iwe, a niela Salum nöün Japes we mwän me lon Samaria o siwili lon wisan wisen king. 15 Nge lusun pworausen än Salum föför meinisin, ewe rawangau a föri, a mak lon puken uruwon ekewe kingen Israel. 16 Lon ena fansoun, lupwen Menahem a feila seni Tirsa, a ataela ewe telinimw Tapua me ekewe fanü ünükün. A pwal niela meinisin mi nom lon, pun resap fangatä ngeni an epwe tolong lon ar telinimw. Iei mine a ataela ewe telinimw, a pwal mwo nge esetina luken ekewe fefin mi pwopwo meinisin.

17 Iwe, lon ilik me tiuen ierin mwün Ussia ewe kingen Juta, Menahem nöün Kati we mwän a tolong lon wisan wisen king o nemeni Israel. A nom lon Samaria o nemenem lon ükükün engol ier. 18 Nge Menahem a föri mine a ngau me fän mesen ewe Samol mi Lapalap. Lon unusen ränin manauan esap likitala ekewe tipis Jeropoam nöün Nepat we mwän a föri, lupwen a emweni Israel ngeni tipis. 19 Iwe, Tiklat-pileser ewe kingen Asiria a tolong lon ewe fanü pwe epwe maun ngeni. Nge Menahem a ngeni Tiklat-pileser ilik me walu ton silifer pwe epwe alisi le anüküchara an nemenem. 20 Iwe, Menahem a angei ewe moni seni ekewe mwän mi pisekisek me lon Israel. A ariani seni iteiten eman me eman leir ükükün lime föün moni silifer, pwe epwe ngeni ewe kingen Asiria. Iei mine ewe kingen Asiria a liwinsefäl, nge esap nonomotiu lon ewe fanü. 21 Nge lusun pworausen än Menahem föför meinisin a mak lon puken uruwon ekewe kingen Israel. 22 Iwe, Menahem a mäla, nge ra peiaseni ren semelapan kewe, nge Pekahia nöün we mwän a siwili lon wisan wisen king.

23 Iwe, lon alimen ierin mwün Ussia ewe kingen Juta, Pekahia nöün Menahem we mwän a tolong lon wisan wisen king o nemeni Israel. A nom lon Samaria o nemenem lon ükükün ruu ier. 24 Nge Pekahia a föri mine a ngau fän mesen ewe Samol mi Lapalap. Esap likitala ekewe tipis Jeropoam nöün Nepat we mwän a föri, lupwen a emweni Israel ngeni tipis. 25 Iwe, eman nöün Pekahia meilapen sounfiu itan Peka nöün Remalia we mwän a rawangauei Pekahia. Lime re Kiliat ra eti, lupwen a niela Pekahia me lon Samaria lon ewe leni mi pöchökül me lon imwen ewe king. Mürin a siwili lon wisan wisen king. 26 Nge lusun pworausen än Pekahia föför meinisin a mak lon puken uruwon ekewe kingen Israel.

27 Iwe, lon lime me ruuen ierin mwün Ussia ewe kingen Juta, Peka nöün Remalia we mwän a tolong lon wisan wisen king o nemeni Israel. A nom lon Samaria o nemenem lon ükükün rüe ier. 28 Nge Peka a föri mine a ngau fän mesen ewe Samol mi Lapalap. Esap likitala ekewe tipis Jeropoam nöün Nepat we mwän a föri, lupwen a emweni chon Israel ngeni tipis.

29 Iwe, lupwen Peka a kingen Israel, Tiklat-pileser ewe kingen Asiria a feito o liapeni ekewe telinimw Ion, Apel-petmaka, Janoa, Ketes, Hasor, pwal ekewe fanü Kiliat, Kaliläa me Naftali. A pwal uweela ekewe aramas chon oola ngeni Asiria. 30 Mürin, Hosea nöün Ela we mwän a rawangauei ewe king Peka, a niela o siwili lon wisan wisen king. Ei a fis lon arüen ierin mwün Jotam nöün Ussia we mwän ewe kingen Juta. 31 Nge lusun pworausen än Peka föför meinisin a mak lon puken uruwon ekewe kingen Israel.

32 Iwe, lon aruuen ierin mwün Peka nöün Remalia we mwän ewe kingen Israel, Jotam nöün Ussia we mwän a tolong lon wisan wisen king o nemeni Juta, 33 lupwen a ierini rüe me limu. A nom lon Jerusalem o nemenem lon ükükün engol me wonu ier. Iten inan Jerusa nöün Satok we fefin. 34 Iwe, Jotam a föri mine a pwüng me fän mesen ewe Samol mi Lapalap, usun chök Ussia saman we. 35 Nge ekewe lenien fel won ekewe leni tekia resap katala. Ekewe aramas ra chök sopwela le asor o keni apach mi pwokus wor. Iwe, Jotam a förätä ewe asamalapen imwen ewe Samol mi Lapalap me efeng. 36 Nge lusun pworausen än Jotam föför meinisin a mak lon puken uruwon ekewe kingen Juta. 37 Lon ekana rän ewe Samol mi Lapalap a popuetä le tinala Resin ewe kingen Siria me Peka ewe kingen Israel, pwe repwe maun ngeni Juta. 38 Iwe, Jotam a mäla, nge ra peiaseni ren an kewe lewo lon ewe telinimwen Tafit. Nge Ahas nöün we mwän a siwili lon wisan wisen king.