1 Mürin, chon Israel meinisin ra mwicheto ren Tafit lon Hepron o üreni, “Nengeni, äm chaom me fitukom. 2 Lon ekewe fansoun lom, lupwen Saul a chüen nemenikem, en ewe ka fen emweni ewe mwichen sounfiun Israel lon maun. Iwe, ewe Samol mi Lapalap om we Kot a ürenuk, ‘En kopwe chon masen nei aramasen Israel, kopwe pwal ar king.’ ” 3 Lupwen ekewe souakomwen Israel meinisin ra feito ren ewe king Tafit lon Hepron, Tafit a eäni eu pwonen atipeeu ngeniir fän mesen ewe Samol mi Lapalap me lon Hepron. Nge ir ra epiti Tafit pwe epwe kingen Israel, usun Samuel a fen apasa fän alon ewe Samol mi Lapalap.

4 Iwe, Tafit me chon Israel meinisin ra feila Jerusalem pwe repwe maun ngeni. Ei telinimw a iteni Jepus me lom, nge ekewe chon Jepus ra imweimw lon, pun ir chon wiliposun ewe fanü. ✡ Jos 15.63; Souk 1.21 5 Iwe, ekewe chon Jepus ra üreni Tafit, “Kosap fokun tolong ikei.” Nge Tafit a liapeni ewe leni mi pöchökül itan Sion, iei mine a iteni telinimwen Tafit. 6 Tafit a üra, “Iö epwe akomwen niela ekewe chon Jepus, epwe meilapen ekewe mwichen sounfiu.” Iwe, Joap nöün Seruia we mwän a akomwen nirela, iei mine a wiseni ewe wisen meilap. 7 Pokiten Tafit a nom lon ewe leni mi pöchökül, iei mine a iteni telinimwen Tafit. 8 Iwe, Tafit a aüsefälietä ewe telinimw pwelin ünükün, a popuetä seni ewe leni mi amasou peliötiuen ewe pal o awesöchüela meinisin, nge Joap a aüsefälietä ekewe lusun leni lon ewe telinimw. 9 Nge Tafit a pöpöchökülela, pun ewe Samol mi Unusen Manaman a eti.

10 Ikkei ir ekewe meilapen nöün Tafit kewe sounfiu mi pwora. Ir ra seikätä Tafit pwe epwe king fiti chon Israel meinisin, o apöchöküla mwün, usun ewe Samol mi Lapalap a fen pwon. 11 Ikei iten nöün Tafit kewe sounfiu mi pwora: Aemanün Jasopeam seni än Hakmon cho. Ätei i ewe meilap me lein ekewe ülüman. A aea wokun siles le niela ükükün ülüpükü mwän lon eu chök fansoun.

12 Iwe, ewe aruomanün lein ekewe ülüman mwän Eleasar nöün Toto we mwän seni än Aho cho. 13 Ätei a eti Tafit lon Pas-tamin, lupwen ekewe chon Filistia ra chufengen, pwe repwe maun ngeniir. Lon ei leni a wor eu tanipin parli, ia ekewe chon Israel ra sü ren ekewe chon Filistia me ie. 14 Nge i a chök ütala lukalapen ewe tanipi o tümwünü, a pwal niela ekewe chon Filistia. Iwe, ewe Samol mi Lapalap a amanaueer ren eu win mi lapalap.

15 Iwe, lon eu rän ülüman me lein ekewe ilik meilapen sounfiu ra feila ngeni ewe achau ren Tafit lon ewe föimw Atulam, lupwen eu mwichen sounfiun Filistia a nom lon ewe lemolun Refaim. 16 Lon ena fansoun Tafit a nom lon ewe lenien op mi pöchökül, nge eu mwichen sounfiun Filistia a nom Petleem. 17 Iwe, Tafit a äleäl, “Amwo eman epwe üfato ünümei koluk seni ewe chönüttu mi nom Petleem ren asamalapen ewe tit.” 18 Mürin, ekewe ülüman sounfiu mi pwora ra töfochofocholong lon lenien ekewe chon Filistia o üfi koluk seni ewe chönüttu mi nom Petleem ren asamalapen ewe tit. Iwe, ra uwato ren Tafit, nge Tafit esap mochen ün. A ninätiu ewe koluk, pwe eu asor ngeni ewe Samol mi Lapalap 19 o üra, “Üsap fokun tongeni ünümi ei koluk, pun ika üpwe ünümi, epwe usun chök ai üpwe ünümi chan ekei mwän mi fangala manauer, lupwen ra uwato ei koluk.” Iei mine Tafit esap mochen ünümi ewe koluk. Ekei föför ekewe ülüman sounfiu mi pwora ra föri.

20 Iwe, Apisai pwin Joap i meilapen ekewe ilik. A aea wokun siles le niela ükükün ülüpükü mwän. Ren ei Apisai a pach ngeni ekewe ülüman le iteföüla. 21 Iwe, a fokun iteföüla me lein ekewe ilik o wiliti nöür meilap, nge esap kon iteföüla usun ekewe ülüman.

22 Iwe, Penaia nöün Jehoiata we mwän seni Kapsel, pwal i eman sounfiu mi pwora, a föri sokun föför mi amwarar. A niela ruoman sounfiun Moap mi fokun pöchökül. Lon eu rän a pwal tötiu lon eu pwang o niela eman laion, lupwen snow a püngütiu. 23 A pwal niela eman re Isip mi fokun langatam ükükün taman fisu esop fiit. Iwe, ewe re Isip a amwöchü efoch siles mi öümong usun chök öün waaseres, nge Penaia a feila ren fän efoch chök wok. A turufi seni lepöün ewe re Isip wokun siles o ni ngeni. 24 Ikkei ekei föför Penaia a föri. Iei mine a pach ngeni ekewe ülüman mwän mi pwora o iteföüla. 25 Ätei a fokun iteföüla me lein ekewe ilik, nge esap kon iteföüla usun ekewe ülüman. Iwe, Tafit a seikätä won nöün we mwichen sounfiu mi wisen tümwünü inisin.

26 Ikkei iten ekewe mwän mi pwora lon ewe mwichen sounfiu: Asael pwin Joap, Elhanan nöün Toto we mwän seni Petleem, 27 Samot seni Harot, Heles seni Pelet, 28 Ira nöün Ikes we mwän seni Tekoa, Apieser seni Anatot, 29 Sipekai seni Husa, Ilai seni Aho, 30 Maharai seni Netofa, Helet nöün Pana we mwän seni Netofa, 31 Itai nöün Ripai we mwän seni Kipea mi nom lon ewe fanü Peniamin, Penaia seni Piraton, 32 Hurai seni ewe lemol mi nom arun Kaas, Apiel seni Arpa, 33 Asmafet seni Paharum, Eliapa seni Salpon, 34 Hasem seni Kison, Jonatan nöün Sake we mwän seni Harar, 35 Ahiam nöün Sakar we mwän seni Harar, Elifal nöün Ur we mwän, 36 Hefer seni Mekera, Ahia seni Pelon, 37 Hesro seni Karmel, Narai nöün Espai we mwän, 38 Joel pwin Natan, Mipar nöün Hakri we mwän, 39 Selek seni Amon, Naharai seni Perot, nöün Joap chon uwei an pisekin maun, 40 Ira me Karep seni Jattir, 41 Uria ewe re Hit, Sapat nöün Alai we mwän, 42 Atina nöün Sisa we mwän, i eman souemwen seni ewe ainangen Rupen, a nemeni ilik sounfiu, 43 Hanan nöün Maka we mwän, Josafat seni Mitan, 44 Usia seni Astera, Sama me Jeiel nöün Hotam kewe mwän seni Aroer, 45 Jetiael nöün Simri we mwän me Joha pwin we seni Tis, 46 Eliel seni Mahawa, Jeripai me Josawia nöün Elnam kewe mwän, pwal Itma seni Moap, 47 Eliel, Opet me Jasiel seni Sopa.