Dónbeenì páaníi fĩnle vũahṹ Kalasiisa 1

Ho vũahṹ na ó o Poole túara nɔn ho

Kalasii

kèrètĩ́ɛwa kuure yi

Vũahṹ túaró ɲúhṹ

Ho vũahṹ mu lé o Poole túara ho nɔn ho Kalasii kɔ̃hṹ kèrètĩ́ɛwa kuure yi. Bìo ó o yánkaa buera le Dónbeenì bín-tente bĩ́n, á ɓa nùpua ɓúi dó mí sĩa o Yeesu yi (Bè-wénia 16.6).

Ɓa ɓúi ló ɓueé bía le bìa yínɔń ɓa *zúifùwa ko ɓa kúio míten làa bìo ho làndá bòráa mu. Ó o Poole túara ho vũahṹ nɔn ɓa yi le ɓa yí bè hón kàránló so yi, lé bìo ho yí héhaa là a Yeesu *Krista bín-tente. O bía le bìo ɓa dó mí sĩa o Yeesu yi, lé bṹn te bìo ɓa térénnanáa le Dónbeenì yahó, ká yínɔń bìo ɓa bò ho làndá yi. O Poole nín-yání zéenía bìo ó o Yeesu yánkaa vonnáa wo ó o wó a tonkaro (1–2).

O Poole dĩ̀n le Dónbeenì vɔ̃n-kĩ́a wán á zéenía le yìa dó mí sĩi o Yeesu yi, á wón ǹ kã̀ní, ká yínɔń ɓa zúifùwa làndá bèró lé bìo ò kã̀ní ɓànso (3–4).

Ho vũahṹ lii véeníi ó o bía le ɓa ko ɓa ɓua miten lòn nùpua na wi miten bìo síi. Ɓa ko ɓa día le le Dónbeenì Hácírí dí ɓa yahó, á ɓa à yí le mukɔ̃n-fĩnle, á mún ǹ wań mín (5–6).

Le tɛ̀ɛníi

1 Ĩnɛ́n Poole lé o Yeesu *Krista tonkaro. Mu yínɔń nùpua wó mi là a tonkaro, á ĩ mún yí dĩ̀n nìi woon wán á wóráa wo. Mu lé o Yeesu Krista là a Maá Dónbeenì lé bìa tonkaa mi, lerɛ́n Dónbeenì mu na vèenía wo léra ɓa nì-hía tĩ́ahṹ. 2 Mu lé ĩnɛ́n lè wàn zàwa na làa mi páanía wi ɓúenɓúen lé warɛ́n wee túa ho vũahṹ na kà á à na minɛ́n kèrètĩ́ɛwa kuio na wi ho Kalasii kɔ̃hṹ yi.

3 Le wàn Maá Dónbeenì lè wa Ɲúhṹso Yeesu Krista à wé mí sãamu làa mia, à na ho hɛ́ɛrà mia. 4 O Krista tà nɔn míten á wó wa bè-kora sɛ́ndíaró muinì yìa, á kã̀níanáa wɛn ho zuia dĩ́míɲá kohó na kà níi yi. Lé kà síi ó o Krista wóráa wàn Maá Dónbeenì sĩi bìo, 5 wón na ho cùkú bìo sã̀ yi hã lúlúio na ɲii mía yi. *Amiina!

Le Dónbeenì bín-tente lée dà-kéní mí dòn

6 Bìo mi pã́ le Dónbeenì na von mia o *Krista sãamu pànká yi à mi yèrèmáa bò bín-tente veere na bìo yí bon yi fùafùa ɓɛ̀ntĩ́n lée bìo na vã̀ mi làa sòobɛ́ɛ. 7 Mu yí máa zéení le bín-tente ɓúi bĩnía wi, ɓùeé! Ɓa nùpua ɓúi lé bìa wee lùnka mi yilera, á wi ɓa yèrèmá a Krista bín-tente. 8 Àwa! Ká a ɓúi, tàá warɛ́n wa bɛɛre, tàá wáayi tonkaro ɓúi khíi ɓueé buera bín-tente ɓúi na wi mí dòn làa dìo á warɛ́n buera nɔn mia, à wón ɓànso à hã dánkáa yí. 9 Wa bía mu, á ĩ pá bĩnía wee bío mu: Hen ká a ɓúi ló ɓueé buera bín-tente na wi mí dòn làa dìo mi tà bìo, à ɓànso à hã dánkáa yí. 10 Àwa! Á mi so wee leéka le ĩ wi à ɓa nùpua tà ĩ bìo lée, tàá lé le Dónbeenì? Lé ɓa nùpua á ĩ so wi à ĩ bìo wé sĩ yi le? Ká mu lé à wé à ĩ bìo wé sĩ ɓa nùpua yi, se ĩ lá máa wé Krista ton-sá.

Bìo ó o Ɲúhṹso vonnáa o Poole wó là a tonkaro

11 Wàn zàwa lè wàn hĩ́nni, le ĩ bío bìo kà na mia: Le Dónbeenì bín-tente na á ĩ buera nɔn mia á yí ló nùpue cɔ̃́n. 12 Á le mún yínɔń dɛ̀ɛ na á ĩ yú nùpue ɓúi cɔ̃́n, tàá dɛ̀ɛ na ó o ɓúi kàránna làa mi. Le bín-tente na á ĩ wee bue lé o Yeesu *Krista mí bɛɛre lé yìa zéenía le làa mi. 13 Mi yàá ɲá bìo á ĩ kuio lá cannáa ɓa *zúifùwa làndá bèró yi. Ĩ lá wee ɲíiní le Dónbeenì nìpomu sãnía làa sòobɛ́ɛ, á wi à ĩ ɓúe mu ɲúhṹ. 14 Ɓa zúifùwa làndá bèró á ĩ lá henía bìo po wa ninzàwa na ká. Á bìo á wàn maáwà bò henía á ĩ lá wee là hɛɛrè á po ɓa nùpua na ká. 15 Ɛ̀ɛ ká le Dónbeenì màhã́ fèra léra mi bàrá mí dòn ká ĩ yàá dĩǹ yí ton. Le sãamu na le wó làa mi lé bṹn bìo yi á le vonnáa mi. 16 Le zéenía mí Za Yeesu bìo làa mi, à ĩnɛ́n ɓɛ̀n bĩní zéení mu làa bìa yí zũ le Dónbeenì. Á ĩ dɛ̀ɛnía hĩ́nɔn wà à ĩ yí tùara nùpue yi làa bìo á ĩ ì wé. 17 Ĩ yàá yí van ho Zeruzalɛɛmu á yí vaá mɔn mín làa bìa wó a Yeesu tonkarowà ló mi, à ĩ wà van ho Arabii kɔ̃hṹ, á dĩ̀n bĩ́n bĩnía ɓuararáa ho Damaasi lóhó yi. 18 Lúlúio bìo tĩn bṹn mɔ́n á ĩ wà van ho Zeruzalɛɛmu á vaá zũna a Sefaasi, á wó hã wizooní pírú hònú bĩ́n làa wo. 19 O Yeesu tonkarowà na ká ó o ɓúi á ĩ yí mɔn ká yínɔń o Ɲúhṹso ɓàn za Zaaki. 20 Le Dónbeenì lé ĩ sɛɛ́ràso, bìo á ĩ wee túa á à na mia kà yínɔń sabéré. 21 Bṹn mɔ́n á ĩ wà van ho Siirii lè ho Silisii kãna yi. 22 Ɛ̀ɛ ká ho *Zudee kɔ̃hṹ kèrètĩ́ɛwa kuio màhã́ lá dĩǹ yí mɔn mi. 23 Bìo ɓa ɲá mí dòn lé bìo kà: «Yìa lá wee ɲíiní wa sãnía lé wón wã́a wee bue le sĩidéró bìo na ó o lá wi ò o ɓúe ɲúhṹ». 24 Á ɓa wee khòoní le Dónbeenì ĩ bìo yi.